04 Nov 2019, 23:48
އަންނަ އަހަރަށް ލަފާކޮށް މި ސަރުކާރުން ހުށަހަޅާފައިވާ 37.5 ބިލިއަން ރުފިޔާގެ ބަޖެޓަކީ ރައްޔިތުންގެ ލޮލުގައި އަޅުވާ އަނދުނެއް ނޫން ކަމަށާއި، ލިޔެވިފައިވާ ޕްލޭންތަކާއި ޖެހިފައިވާ މުއްދަތުތަކާ އެއްގޮތަށް ސަރުކާރުން މަޝްރޫއުތައް ނިންމާނެކަމަށް ރައީސުލްޖުމްހޫރިއްޔާގެ އޮފީހުގެ ޕޮލިސީ ސެކްރެޓަރީ އާމިނަތު ޝައުނާ ވިދާޅުވެއްޖެއެވެ.
ޕީއެސްއެމްގެ ރާއްޖެމިއަދު ޕްރޮގްރާމުގައި ވާހަކަ ދައްކަވަމުން ޝައުނާ ވިދާޅުވީ، މި ސަރުކާރުން ހުށަހެޅި ފުރަތަމަ ބަޖެޓަކީ ރައްޔިތުންގެ ޝަކުވާތަކަށް ހައްލު ހޯދައިދޭނެ، އުންމީދީ ބަޖެޓެއް ކަމަށެވެ.
މީގެ ކުރީގެ ބަޖެޓުތަކުގައި މަޝްރޫއުތައް ނުހިންގޭ ވަރަށްވެސް އަދަދު ޖަހާފައި ހުންނަ ކަމަށް ޝައުނާ ވިދާޅުވިއެވެ. މިސާލެއްގެ ގޮތުން ޝައުނާ ވިދާޅުވީ، ނަރުދަމާ އެޅުމަށް މީގެ ކުރިން 500،000 ރުފިޔާވެސް ބަޖެޓުކޮށްފައި ހުންނަ ކަމަށާއި ނަމަވެސް މިއީ އެކަން ކުރެވޭ ވަރުގެ އަދަދެއް ނޫންކަން ވިސްނާލުމުން އެނގޭނެކަމަށެވެ.
ޝައުނާ ވިދާޅުވީ 2020 އަށް ހުށަހަޅާފައިވާ ބަޖެޓުގައި އަދަދުތައް ޖަހާފައިވާނީ މަސައްކަތް ކުރެވޭނެ މިންވަރަށް ކަމަށެވެ.
"ރައްޔިތިންގެ ލޮލުގައި އަޅުވާ އަނދުނެއް ނޫން މިއީ. މިފަހަރު ބަޖެޓްކޮށްފައި މިހިރީ މަސައްކަތް ކުރެވޭ މިންވަރަށް، އަދި ޕްލޭން ކޮށްގެން ވަކި ތާވަލެއްގެ ތެރެއިން އެކަންކަން ނިންމަން މުއްދަތު ޖަހައިގެން މި މަސައްކަތްކުރަނީ." ޝައުނާ ވިދާޅުވިއެވެ.
މި ސަރުކާރުން ތަރައްގީގެ މަޝްރޫއުތައް ނުހިންގާ ކަމަށާއި ހިންގާ މަޝްރޫއުތަކުގެ ސްޕީޑް ލަސްކަމަށް ބުނެ އިދިކޮޅު ފަރާތްތަކުން ދައްކާ ވާހަކަތަކަށް ރައްދު ދެއްވަމުން ޝައުނާ ވިދާޅުވީ، މަސައްކަތްތައް ކުރިއަށްދާ މިންވަރު ބެލޭނީ އާ މަޝްރޫއުތައް ފެށެނީ ކިތައް ރަށުގައިތޯ ބަލައިގެން ކަމަށެވެ.
އެގޮތުން 80 އަށްވުރެ ގިނަ ރަށްރަށުގައި މިހާރުވެސް އެކި މަސައްކަތްތައް ކުރިއަށްދާ ކަމަށާއި، މި ހިނގާ ނޮވެމްބަރު މަހު އެކަނިވެސް 30 އަށްވުރެ ގިނަ ރަށުގައި ކްލާސްރޫމް އެޅުމާއި، އެތައް ރަށެއްގައި ފެނާއި ނަރުދަމާގެ ނިޒާމު އެޅުމުގެ މަސައްކަތް ފެށޭނެކަމަށް ޝައުނާ ވިދާޅުވިއެވެ.
ހަމައެއާއެކު ގިނަ ރަށްތަކެއްގައި ބަނދަރު ހެދުމާއި މަގުހެދުމުގެ މަޝްރޫއުތަކާއި ފަސް ހޮސްޕިޓަލް އިތުރަށް ތަރައްގީކުރުމުގެ މަސައްކަތް މިހާރުވެސް ކުރިއަށްދާކަން ޝައުނާ ފާހަގަކުރެއްވިއެވެ.
"އަޅުގަނޑަށް ހީވަނީ އިދިކޮޅު ސިޔާސީ ފަރާތްތަކުން ހިސާބު ޖެއްސެވުމާއި ސިޔާސަތުތައް ތަންފީޒުވަމުންދާ މިންވަރު ބެއްލެވުމުގައި ކޮންމެވެސް ކަހަލަ މައްސަލައެއް އެބައުޅޭ ކަންނޭނގެ. އެ ބޭފުޅުން އެހާ ފަރިތަ ނުވެދާނެ އަޅުގަނޑުމެން މި ދަންނަވާ މިންވަރަށް ކަންކަން މޮނީޓަރކޮށް، އިވެލުއޭޓްކޮށް، ހިސާބު ޖަހައި، އަދި ދެލިކުރަން." ޝައުނާ ވިދާޅުވިއެވެ.
އަންނަ އަހަރަށް ލަފާކޮށް ހުށަހަޅާފައިވާ ބަޖެޓުގައި އަލަށް ފަށާ ބޮޑު މަޝްރޫއުތަކެއް ވެސް ހިމަނާފައިވާއިރު، ޝައުނާ ވިދާޅުވީ އާ މަޝްރޫއުތަކުގެ އަމަލީ މަސައްކަތް ބަޖެޓު ފާސްވުމާއެކު ފެންނަން ފަށާނެ ކަމަށެވެ.
"އޭގައި މަޑުކުރަންޖެހޭ ހަމަ އެންމެ މިނެޓެއްވެސް ނޯންނާނެ. ޖެނުއަރީއިން ފަށައިގެން އިރާދަކުރެއްވިއްޔާ މި ބަޖެޓު ތަންފީޒުވަމުން ދާތަން ރައްޔިތުންނަށް ފެންނަން ފަށާނެ." ޝައުނާ ވިދާޅުވިއެވެ.