03 Nov 2019, 19:20
ޖުޑިޝަލް ސާވިސް ކޮމިޝަން (ޖޭއެސްސީ) އިން ބަލަމުން ދާ ސުޕްރީމް ކޯޓުގެ ފަނޑިޔާރ އާދަމް މުހައްމަދު އަބްދުﷲ ގެ ސުލޫކީ މައްސަލައިގެ އަޑުއެހުން ފަސްކޮށްފިއެވެ.
ޖޭއެސްސީން ބުނީ އޭނާގެ އަޑުއެހުން ފަސްކުރީ ފަނޑިޔާރު އާދަމް ރާއްޖެއިން ބޭރުގައި މިވަގުތު އުޅުއްވާތީ ކަމަށެވެ. އަދި އެނބުރި ރާއްޖެ ވަޑައިގަތުމުން އަޑުއެހުން ބާއްވާނެކަމަށްވެސް ޖޭއެސްސީން ބުންޏެވެ.
ފަނޑިޔާރު އާދަމް މުހައްމަދު އަބްދުﷲގެ ސުލޫކީ މައްސަލައެއް ޖޭއެސްސީން ބަލަމުން ގެންދަނީ ސިވިލް ކޯޓުން ކޮށްފައިވާ ހުކުމެއް ތަންފީޒުކުރުމުގެ ގޮތުން އެ ކޯޓުން ބަލަމުން ދިޔަ މައްސަލައެއްގެ ފައިލް ފޮނުވުމަށް އަންގައި، އަދި އެ ފައިލް ސިވިލް ކޯޓުން ސުޕްރީމް ކޯޓަށް ގެނައުމާ ގުޅިގެން އެ މައްސަލަ ސިވިލް ކޯޓަށް ހުށަހެޅި ފަރާތަށް ގާނޫނުން ލިބިދީފައިވާ އިސްތިއުނާފުކުރުމުގެ ހައްގު ގެއްލި އަދި އަދުލު އިންސާފުގެ ހަމަޔާއި އުސޫލު ގެއްލޭކަމަށް ބުނެ ބެލި މައްސަލައަކާ ގުޅިގެން ޖޭއެސްސީން އޭނާއަށް ދިން ނަސޭހަތް ގަބޫލު ނުކުރުމުންނެވެ.
ފަނޑިޔާރު އާދަމްއަށް އޭނާގެ ފަރާތުން ވަކާލާތު ކުރުމަށް ވަކީލަކު ހަމަޖެއްސުމަށް ފަހު ފުރުސަތު ދީ މާދަމާ އިތުރު އަޑުއެހުމަށް ބޭއްވުމަށް ކުރިން އޮތީ ނިންމައިފައެވެ
ފަނޑިޔާރު އާދަމް މުހައްމަދު އަބްދުﷲގެ ސުލޫކީ މައްސަލައިގެ ފުރަތަމަ އަޑުއެހުމަށް އޭނާއާއެކު ދެ ވަކީލަކު ހާޒިރުވިއެވެ. އެއީ ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދާއި ޖުޑިޝަލް އެކެޑެމީގެ ކުރީގެ ޗަންސެލަރު އަހްމަދު މާޖިދެވެ. ނަމަވެސް އެ މައްސަލަ ބަލާ ކޮމިޓީން ވަނީ ވަކީލެއްގެ ގޮތުގައި ޑރ. ޖަމީލް ހަމަނުޖެއްސޭނެކަމަށް ނިންމާފައެވެ. ސަބަބެއްގެ ގޮތުގައި ބުނެފައިވަނީ، ޑރ. ޖަމީލްގެ ފަރާތުން ސުޕްރީމް ކޯޓަށް ހުށަހަޅުއްވާފައިވާ މައްސަލައެއް ބައްލަވާ ބެންޗުގައި ފަނޑިޔާރު އާދަމް މުހައްމަދު އިންނަވާތީއެވެ.
ފަނޑިޔާރު އާދަމް މުހައްމަދު އަބްދުﷲގެ ސުލޫކީ މައްސަލަ ބެލުމަށް އެކުލަވާލި ކޮމިޓީގައި ތިއްބަވަނީ ޖޭއެސްސީގެ ނައިބު ރައީސް މަސްތޫރު ހުސްނީ އާއި އޭޓާނީ ޖެނަރަލް އިބްރާހިމް ރިއްފަތު އާއި ހިސާން ހުސައިންގެ އިތުރުން އަބްދުލްމާނިއު ހުސައިން އަދި ޑރ. އަލީ ޝަމީމް އެވެ.
ފަނޑިޔާރު އާދަމް މުހައްމަދު އަބްދުﷲއަށް ނަސޭހަތްދިނުމަށް ޖޭއެސްސީން ނިންމި މައްސަލައާ ގުޅިގެން، އުއްތަމަފަނޑިޔާރު ޑރ. އަހްމަދު އަބްދުﷲ ދީދީއާއި ސުޕްރީމް ކޯޓުގެ ފަނޑިޔާރު އަބްދުﷲ އަރީފަށްވެސް ނަސޭހަތްދިނުމަށް ނިންމިއެވެ. ނަމަވެސް އޭގެ ތެރެއިން އުއްތަމަފަނޑިޔާރުވެސް ނަސޭހަތް ގަބޫލެއް ނުކުރެއްވިއެވެ.
އަދި ޖޭއެސްސީއާ ދެކޮޅަށް އުއްތަމަފަނޑިޔާރު ބަޔާނެއް ނެރުއްވުމާ ގުޅިގެން އެއީ ކަމުގެ ހަގީގަތް އޮޅޭ ބަޔާނެއް ކަމަށް ބުނެ. އުއްތަމަފަނޑިޔާރުގެ ސުލޫކީ މައްސަލައެއް ބެލުމަށް ޖޭއެސްސީން ވަނީ ނިންމާފައެވެ.