30 Oct 2019, 12:21
ޑރ. މުހައްމަދު ޖަމީލް އަހްމަދާ ގުޅޭ ގޮތުން، ސުޕްރީމް ކޯޓުގައި މިހާރު ހިނގާ މައްސަލައެއްގެ ބެންޗުގައި ފަނޑިޔާރު އާދަމް މުހައްމަދު އަބްދުﷲ އިންނަވާއިރު، އޭނާގެ މައްޗަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ބަލަމުން އަންނަ ސުލޫކީ މައްސަލައިގެ ދިފާއީ ވަކީލަކަށް ޖަމީލް ގެންދިއުމުން އިތުރު ސުލޫކީ މައްސަލައެއް ފެންމަތި ވެއްޖެ އެވެ.
އާންމުކޮށް ހުޅުވާލައިގެން މިއަދު ބޭއްވި އެ އަޑުއެހުން ފެށުމާއި އެކު މައްސަލަ ބައްލަވާ ކޮމެޓީގެ ރިޔާސަތު ބެލެހެއްޓެވި އަދި ޖޭއެސްސީގެ ނައިބް ރައީސް މަސްތޫރު ހުސްނީ ވިދާޅުވީ، އާދަމް މުހައްމަދުގެ އަމަލު ކޮށްފައިވަނީ މައްސަލަ 'ފުށު އަރާފަދަ" ގޮތަކަށެވެ.
"އެއީ މައްސަލައިގެ ހަސްމަކާއި މެދު މައްސަލަ ބަލަމުން ދަނިކޮށް މުއާމަލާތް ކުރުމަށް އަދި ވަކީލެއްގެ ގޮތުގައި އައްޔަން ކުރުމަށް މިފަދަ ކަންކަން ކުރުމަކީ ފަނޑިޔާރެއްގެ ސުލޫކަށް އަސަރުކުރާނެ ކަމެއް ކަމަށް މި ކޮމެޓީއަށް ވެސް ފެންނާތީވެ ފަނޑިޔާރު އާދަމް މުހައްމަދުގެ މި ސުލޫކީ މައްސަލަ ޖުޑީޝަލް ސާވިސް ކޮމިޝަނަށް ހުށަހެޅުމަށް މި ކޮމެޓީން ވަނީ ނިންމާފައި،" މަސްތޫރު ވިދާޅުވި އެވެ.
އިތުރު ވަކީލަކާއި އެކު މައްސަލަ ކުރިއަށް ގެންދިއުމަށް އާދަމް މުހައްމަދު އެދިވަޑައިގެންފައިވާތީ، މިއަދުގެ އަޑުއެހުން ނިންމާލައި މާދަމާ އިތުރު އަޑުއެހުމެއް ބާއްވާނެ ކަން އެ ކޮމެޓީން ވަނީ އިއުލާން ކުރައްވާފަ އެވެ.
ކޮމެޓީ ނިންމާލެއްވުމުގެ ކުރިން ފަނޑިޔާރު އާދަމް މުހައްމަދު ވަނީ ފުރުސަތަކަށް އެދިވަޑައިގެންފަ އެވެ. ނަމަވެސް އޭނާ ވާހަކަ ދެއްކުމަށް ފުރުސަތު ނުދެއްވައި މަސްތޫރު ވަނީ ކޮމެޓީ ނިމުނު ކަން އިއުލާން ކުރައްވާފަ އެވެ. އަދި ކޮމެޓީގެ މެންބަރުން މާލަން ދޫކުރައްވައި ނިކުންނަވަން ފެއްޓެވުމާ އެކު އާދަމް މުހައްމަދު ވަނީ ހިތްހަމަ ނުޖެހުން ފާޅުކޮށް ވާހަކަ ދައްކަވާފަ އެވެ. އޭނާ ވިދާޅުވީ، ޖޭއެސްސީން އޭނާގެ ހައްގުތަކަށް އަރައިގަންނަނީ ކަމަށެވެ. އަދި އެ މީހަކު ބޭނުންވާ ވަކީލަކު ހަމަޖެއްސުމަކީ ކޮންމެ މީހަކަށް އޮންނަ ހަައްގެއް ކަމަށްވާއިރު އެ ހައްގު ވެސް ނިގުޅައި ގަނެފައިވާ ކަން އާދަމް މުހައްމަދު ވަނީ ފާހަގަ ކުރައްވާފަ އެވެ.
ފަނޑިޔާރު އާދަމް މުހައްމަދުގެ މައްސަލަ ބައްލަވާ ކޮމެޓީން ކަން ކުރެއްވި ގޮތުން ޑރ. ޖަމީލް ވެސް ވަނީ ހިތް ހަމަ ނުޖެހުން ފާޅު ކުރައްވާފަ އެވެ. އެގޮތުން ޖަމީލް ވިދާޅުވީ ޖޭއެސްސީ ސިޔާސީވެ ނިމިއްޖެ ކަމަށާއި ގާނޫނުއަސާސީން ދީފައިވާ ވަކީލެއްގެ އެހީ ހޯދުމުގެ ހައްގުވެސް ހަނިކޮށްފި ކަމަށެވެ. ފަނޑިޔާރު އާދަމް މުހައްމަދުގެ މައްސަލައިގައި ޖެހިގެން އުޅެނީ ހަސްމުންގެ މައްސަލައެއް ނޫން ކަމާއި އެއީ ވަކީލެއްގެ ހައްގު ހަޖަމްނުވުމުގެ މައްސަލަ ކަން ފާހަގަކޮށް ޖަމީލް ވަނީ ޖޭއެސްސީއަށް ވަރަށް ބޮޑަށް ފާޑު ވިދާޅުވެފަ އެވެ.
މީގެ ކުރިން ފަނޑިޔާރު އާދަމް މުހައްމަދުގެ މައްސަލަ ބަލައި ޖޭއެސްސީއިން ވަނީ އޭނާއަށް ނަސޭހަތް ދޭން ނިންމައިފަ އެވެ. އެކަމަކު، އެ ނަސޭހަތް އޭނާ ގަބޫލުފުޅެއް ނުކުރައްވަ އެވެ.
ޖޭއެސްސީއިން މިހާރު ބަލަމުން އަންނަނީ އެ މައްސަލަ އެވެ.
އާދަމް މުހައްމަދުގެ އަޑުއެހުން ހުޅުވާލައިގެން ކުރިއަށްގެންދަން ނިންމާފައިވާއިރު އެ ކޯޓުގެ އިތުރު ތިން ފަނޑިޔާރެއްގެ ސުލޫކީ މައްސަލަ އެއްވެސް ޖޭއެސްސީއިން އަންނަނީ ބަލަމުންނެވެ.
"ސަން" އަށް އެނގިފައިވާގޮތުގައި އެ ފަނޑިޔާރުންނަކީ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ އާއި ފަނޑިޔާރު އަބްދުﷲ އަރީފްގެ އިތުރުން ފަނޑިޔާރު އަބްދުލް ޣަނީ މުހައްމަދެވެ.