23 Oct 2019, 22:51
އުފެދުމުގައިވެސް ހިތުގައި އިން ލޯވަޅެއް ބެއްދުމުގެ އޮޕަރޭޝަނެއް ރާއްޖޭގައި ފުރަތަމަ ފަހަރަށް އޭޑީކޭ ހޮސްޕިޓަލް ކޮށް، އޮޕަރޭޝަން ކާމިޔާބުކޮށްފިއެވެ.
އޭޑީކޭގެ މެނޭޖިން ޑިރެކްޓަރު އަހުމަދު އަފްއާލް "ސަން" އަށް މިއަދު ވިދާޅުވީ އެ އޮޕަރޭޝަން ކުރީ މިދިޔަ ހޮނިހިރު ދުވަހު ކަމަށެވެ.
އަފްއާލް ވިދާޅުވީ އޮޕަރޭޝަން ކޮށްފައިވަނީ 37 އަހަރުގެ ފިރިހެނެއްގެ ކަމަށާއި އޭނާގެ ހާލު މަޑުމަޑުން ރަނގަޅުވަމުން އަންނަކަމަށެވެ.
އަފްއާލް ވިދާޅުވީ މިއީ އޭޑީކޭއިން މިދިޔަ އަހަރު ތައާރަފުކުރި ހިތުގެ ބައިޕާސް ސާޖަރީގެ ތެރެއަށް އެޅިގެން ދިޔަ އިތުރު ބޮޅެއް ކަމަށެވެ.
ހޮނިހިރު ދުވަހު ކުރި އޮޕަރޭޝަންގެ 75 ޕަސެންޓް އާސަންދައިން ކަވަރުކުރިކަމަށްވެސް އަފްއާލް ވިދާޅުވިއެވެ.
އެ އޮޕަރޭޝަނުގައި އިސްކޮށް އުޅުއްވީ ރާއްޖޭގެ ފުރަތަމަ ކާޑިއޯތޮރޭސިކް އެންޑް ވެސްކިއުލާ ސާޖަން ޑރ. މުހައްމަދު ޝާފިއުއެވެ. ސާޖަރީގެ ޓީމްގައި ޑރ. ޝާފިއުގެ ދަށުން އިސްކޮށް އުޅުނީ ދިވެހީން ކަމަށްވެސް އަފްއާލް ވިދާޅުވިއެވެ.
އަފްއާލް އިތުރަށް ވިދާޅުވީ ކުރިއަށް އޮތް ތަނުގައި ވަރަށް އަވަސް މުސްތަގުބަލެއްގައި ހިތުގައި ލޯވަޅު ހުންނަ ތުއްތު ކުދިންގެ ސާޖަރީވެސް ކުރަން ފަށާނެ ކަމަށެވެ.