12 Oct 2019, 11:19
ރާއްޖޭގެ އެންމެ ދެކުނަށް ކުރަމުންދާ ވިއްސާރާގައި ބައެއް ރަށްރަށުގައި ފެންބޮޑުވެއްޖެ އެވެ.
އެމްއެންޑީއެފް އިން ބުނީ އައްޑޫ ސިޓީގެ ބައެއް ރަށްރަށުގައި ފެންބޮޑުވުމުގެ ސަބަބުން ފެން ހިއްކުމުގައި ސަދަން އޭރިއާގެ ސިފައިން ހަރަކާތްތެރިވަމުންދާ ކަމަށެވެ.
ވިއްސާރަވާނެ ކަމަށް ލަފާކޮށް މެޓު އޮފީހުން ވަނީ ދެކުނުގެ ހަތަރު އަތޮޅަށް ރީނދޫ އެލާޓުވެސް ނެރެފައެވެ. މެޓުން ލަފާކޮށްފައިވާގޮތުން ގއ އިން އައްޑޫ ސިޓީ އާއި ހަމައަށް ގުގުރުމާއެކު ބޯކޮށް ވާރޭ ވެހޭނެއެވެ.
މެޓުން ބުނީ މިހާރު ރާއްޖެއަށް ކުރަނީ ހުޅަނގު މޫސުމުގެ ވިއްސާރަ ކަމަށެވެ. ރާއްޖޭގެ އެކި ހިސާބުތަކަށް ގުގުރުމާއެކު ވާރޭ ވެހޭނެ ކަމަށް މެޓުން ވަނީ ލަފާކޮށްފައެވެ.
މެޓު އޮފީހުގެ ތަފާސް ހިސާބުތަކަށް ބަލާއިރު ރޭގެ އަށަކުން މިއަދު އަށަކަށް ގއ ގެމަނަފުއްޓަށް 140.3 މިލިމީޓަރުގެ ވާރޭ ވެހިފައިވެއެވެ. އައްޑޫ ސިޓީ ގަމަށް 110.9 މިލިމީޓަރުގެ ވާރޭ ވެހިފައިވާއިރު ގެ ކޫއްޑޫ އަށް 92.5 މިލިމީޓަރުގެ ވާރޭ ވެހިފައިވެއެވެ.