07 Oct 2019, 19:46
މޯލްޑިވިއަން ޑިމޮކްރެސީ ނެޓްވޯކް (އެމްޑީއެންއިން) ޝާއިއު ކުރި ދީނާ ހިލާފު ވާހަކަަތައް ހިމެނޭ ރިޕޯޓުގެ މައްސަލަ 2016 ވަނަ އަހަރުވެސް އިސްލާމިކް މިނިސްޓްރީއަށް ހުށަހެޅި ކަމަށް އެ މިނިސްޓްރީގެ ސްޓޭޓް މިނިސްޓަރު ޝެއިޚް އިލްޔާސް ޖަމާލް ވިދާޅުވެއްޖެ އެވެ.
އެމްޑީއެން އިން 2015 ވަނަ އަހަރު ޝާއިއު ކުރި ރިޕޯޓެއްގައި ދީނާ ޚިލާފު ވާހަކަތަކެއް ހުރި މައްސަލަ މި ފަހުުން ވަނީ ފެންމަތިވެ ވަރަށް ބޮޑަށް ހޫނުވެފައެވެ. އެކަމާ ގުޅިގެން މިއަދު އިސްލާމިކް މިނިސްޓްރީއިން ވަނީ ނޫސްވެރިންގެ ބައްދަލުވުމެއް ބާއްވައިފައެވެ.
އެ ބައްދަލުވުމެއްގައިެ ސްޓޭޓް މިނިސްޓަރު އިލްޔާސް ޖަަމާލް ވިދާޅުވީ، އެ ރިޕޯޓުގެ މައްސަލަ 2016 ވަނަ އަހަރު އަމިއްލަ ޖަމްއިއްޔާއަކުން އިސްލާމިކް މިނިސްޓްރީއަށް ހުށަހެޅި ކަމުގެ މައުލޫމާތު ލިބިފައިވާ ކަމަށެވެ.
"މިއީ 2016ގައިވެސް އިސްލާމިކް އެފެއާޒްއަށް [މިނިސްޓްރީއަށް] ކަންބޮޑުވުުން ފާޅުކޮށް ދީނީ ޖަމްއިއްޔާ އަކުން ހުށަހަޅާފައިވާ ކަމަށް އަޅުގަނޑަށް ވަރަަށް އިތުބާރު ހުރި ގޮތަކަށް މައުލޫމާތު ލިބޭ،" އިލްޔާސް ވިދާޅުވިއެވެ.
އިލްޔާސް ވިދާޅުވީ، އެ މައްސަލަ ވަންހަނާ ކުރަން ބަޔަކު އުޅުނީތީ ހިތާމަ ކުރައްވާ ކަމަށެވެ. އަދި މިއަދުގެ ސަރުކާރުން އެމްޑީއެންގެ މައްސަލަ ބަލައި ކުރަން ޖެހޭ ހުރިހާ ކަމެއް ކުރާނެ ކަމަށް އޭނާ ވިދާޅުވިއެވެ.
ދީނާ ހިލާފު ވާހަކަތަކެއް ހިމެނޭ އެމްޑީއެންގެ ރިޕޯޓަކީ އެ ޖަމްއިއްޔާ އިން 2015 ވަނަ އަހަރު އާންމުކުރި "ޕްރިލިމިނަރީ އެސެސްމަންޓް އޮން ރެޑިކަލައިޒޭޝަން އިން ދަ މޯލްޑިވްސް" މި ރިޕޯޓެވެ. އެ ރިޕޯޓަކީ ރާއްޖޭގައި ދީނީ ގޮތުން ހަރުކަށި ފިކުރު ފަތުރާ ގޮތްތަކާއި، އެ ފިކުރުގެ އަސަރު ރާއްޖޭގައި އަށަގެންފައިވާ މިންވަރު ބެލުމަށްޓަކައި އެ ޖަމިއްޔާއިން ކުރި ދިރާސާއެއްގެ މައްޗަށް ނެރުނު ރިޕޯޓެކެވެ.
އެ ރިޕޯޓު ފެންމަތިވުމުން އޭގެ މައްސަލަ އެންމެ ފުރަތަމަ ފުލުސް އޮފީހަށް ހުށަހެޅީ އާންމު ފަރާތަކުންނެވެ. އެފަހުން އިސްލާމިކް މިނިސްޓްރީއިންވެސް ވަނީ އެ ރިޕޯޓުގެ މައްސަލަ ފުލުހަށް ހުށަހަޅައިފައެވެ. ފުލުހުން ބުނީ އެ މައްސަލަ ބަލައި އަޅަން ޖެހޭ ފިޔަވަޅުތައް އަޅާނެ ކަމަށެވެ.
ރައީސް އިބްރާހިމް މުހައްމަދު ސޯލިހުވެސް މިއަދު ވަނީ އެ ރިޕޯޓު ކުށްވެރިކުރައްވައިފައެވެ. މިއަދު އެމަނިކުފާނު ނެރުއްވި ބަޔާނެއްގައި ވިދާޅުވީ އެ ރިޕޯޓުގައި އިސްލާމްދީނުގެ އަސްލުތަކާ ފުށުއަރާ އަދި އިސްލާމްދީނަށާއި ކީރިތި ރަސޫލާއަށް ތަވްހީނުވާފަދަ ބައެއް ވާހަކަތައް ހިމަނާފައިވާ ކަމަށާއި، އެއީ ބަލައިގަނެވޭނެ ކަމެއް ނޫން ކަމަށެވެ. އަދި އެ މައްސަލަ ބަލައި ފިޔަވަޅު އަޅާނެ ކަމަށް ވިދާޅުވިއެވެ.
އެމްޑީއެންގެ ރިޕޯޓުގެ މައްސަލައާ ބެހޭގޮތުން މިއަދު ރައްޔިތުންގެ މަޖިލީހުގައި ދެތިން ގަޑިއިރު ބަހުސް ކުރިއެވެ. އެމްޑީޕީގެ މެމްބަރުން ފާހަގަ ކުރައްވަމުން ގެންދެވީ އެއީ ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ވެރިކަމުގައި ނެރުނު ރިޕޯޓެއް ކަމަށެވެ. އަދި މިއަދު އެ ރިޕޯޓުގެ ވާހަކަ ފެންމަތިކޮށްގެން އުޅޭނީ ސިޔާސީ ބޭނުމަށް ކަމަށް އެމްޑީޕީ މެމްބަރުން ވިދާޅުވިއެވެ. އިދިކޮޅު މެމްބަރުން ވަނީ އެ ރިޕޯޓުގެ މައްސަލަ ބަލައި ފިޔަވަޅު އަޅަން ގޮވާލާފައެވެ.