07 Oct 2019, 00:08
ހިޔާ މަޝްރޫއުގެ ދަށުން ހުޅުމާލޭގައި މިހާރު ހަދަމުންދާ ފްލެޓްތަކުގެ އެންމެ ތިރިން މައްޗަށް ލިފްޓުން އަރަން ހޭދަވާނީ އެންމެ 35 ސިކުންތުކަމަށް ޗައިނާއިން ރާއްޖެއަށް ކަނޑައަޅާފައި ހުންނަވާ ސަފީރު ޒޭންގް ލިޒްހޮންގް ވިދާޅުވެއްޖެއެވެ.
އެކަން ސަފީރު ހާމަކުރެއްވީ މިއަދު އެ ހައުސިން ޔުނިޓްތަކުގެ ސަލާމަތީ ކަންތައްތައް ހުރީ ކިހިނެއްތޯ ބައްލަވާލެއްވުމަށް އެތަންތަނަށް ޒިޔާރަތްކުރެއްވުމަށްފަހު ކުރެއްވި ޓުވީޓެއްގައެވެ.
އެތަންތައް ބައްލަވާލެއްވުމަށް ފަހު ސަފީރު ވިދާޅުވީ އެ ހައުސިން ޔުނިޓްތަކުގެ މަސައްކަތް ކުރިއަށްދާގޮތާ ދޭތެރޭ ހިތްހަމަޖެހޭ ކަމަށެވެ. މިއީ 25 ބުރީގެ ހައުސިން ޔުނިޓް ތަކެކެވެ.
އެ ހައުސިން ޔުނިޓްތައް ހިމެނޭ ކޮންމެ އިމާރާތެއްގައި ހަތަރު ލިފްޓް ހުރެއެވެ. ނަމަވެސް އެހާ ގިނަ އަދަދެއްގެ މީހުން ދިރުއުޅެން ހަދަން ފްލެޓްތަކުގައި އެހާ މަދު ލިފްޓް ހުރުމުން އެކަން ބޮޑު ތަކުލީފަކަށް ވާނެ ކަަމަށް ބުނެ ގިނަ ބައެއްގެ ފާޑު ކިޔުން ވަނީ އަމާޒުވެފައެވެ.
ކުރީގެ ސަރުކާރުގައި ހުޅުވާލި ހިޔާ މަޝްރޫއުގެ 7،000 ފްލެޓަށް 20،000 އަށްވުރެ ގިނަ މީހުން ކުރިމަތިލިއިރު އެތަންތަނުގެ ފްލެޓް ދޭން އެކުލަވާލާ ފްލެޓް ކޮމެޓީގެ މަސައްކަތް އަންނަ ޑިސެމބަރުމަހު ނިމޭނެކަމަށްވެސް ސަރުކާރުން ދާދި ފަހުން ވަނީ ބުނެފައެވެ.