03 Oct 2019, 14:41
މޯލްޑިވް ގޭސްއިން ކޮންމެ އަހަރަކު ދެ މުވައްޒަފުން ހައްޖަށް ފޮނުވަން ނިންމައިފި އެވެ.
އެ ކުންފުނީގެ އަހަރީ ދުވަހާ ގުޅިގެން މިއަދު ހެނދުނު ހުޅުމާލޭގައި ބޭއްވި ހާއްސާ ހަރަކާތެއްގައި އެކުންފުނީގެ މެނޭޖިން ޑިރެކްޓަރު ޝާޒިލް ޝިޔާމް ވަނީ އެކަން އިއުލާންކޮށްފަ އެވެ.
މޯލްޑިވްގޭސް އިން ބުނީ ހައްޖަށް މުވައްޒަފުން ފޮނުވާއިރު އެ ފުރުސަތު އެކުންފުނީގައި މަސައްކަތް ކުރާ ބިދޭސީންނަށް ވެސް އޮންނާނެކަމަށެވެ. އެ ފުރުސަތުގެ ދަށުން ހައްޖަށް މުވައްޒަފުން ފޮނުވަން ފަށާނީ އަންނަ އަހަރުން ފެށިގެން ކަމަށްވެސް އެ ކުންފުނިން ބުންޏެވެ.
މޯލްޑިވް ގޭސްއިން ބުނީ އެ ކުންފުނީގެ އަހަރީ ދުވަހާ ގުޅިގެން ކުރިއަށް އޮތް ހަ މަސްދުވަހުވެސް ހާއްސަ ހަރަކާތްތަކެއް ކުރިއަށްގެންދިއުމަށް ނިންމާފައިވާ ކަމަށެވެ. އޭގެ ތެރޭގައި ޑިނާނައިޓާއި އެހެނިގެން ހަރަކާތްތައް ހިމެނެ އެވެ.
މޯލްޑިވް ގޭސް އިން މިހާރުވެސް ދަނީ އެކުންފުނީގެ މުވައްޒަފުންނަށް އެކި ކުރުމުއްދަތުގެ ކޯސްތައް ހިންގަމުންނެވެ. އޭގެ އިތުރުން އެ ކުންފުނިީގެ ސްޕޮންސާގެ ދަށުން މުވައްޒަފުން ދަނީ ޑިގްރީއަށާއި މާސްޓާސްއަށްވެސް ތައުލީމް ހާސިލްކުރަމުންނެވެ.