03 Oct 2019, 08:16
މެގަ ހިޓް ޓީވީ ސީރީޒް ފްރެންޑްސް ގެ މަގުބޫލުކަން، އެ މަޖާގަނޑު އަދިވެސް ކުޑައެއް ނުވެ އެވެ. ސްޓްރީމިން ސާވިސް، ނެޓްފްލިކްސްއިން ފްރެންޑްސް ބަލާމީހުންގެ އަދަދު އަދިވެސް ވަނީ އިތުރެވެ.
ފްރެންޑްސް އަކީ ދިވެހިންގެ އެއް ނަމްބަރު ޝޯ އެވެ. ރަހުމަތްތެރިންނާ އާއިލާ އާއެއްކޮށް ސީރީޒެއް ބަލަންވެސް ފްރެންޑްސް ވަރެއް ނޯވެ އެވެ. ކާ ގަޑީގައިވެސް ފްރެންޑްސް އެވެ. ގިނަ މީހުންނަށް ފްރެންޑްސްގެ އެޕިސޯޑެއް ނުބަލައި ދުވަސް ފުރިހަމަވާ ކަމަކަށް ނުވެ އެވެ.
"އެ ބަލަން ފެށުނީއްސުރެ އަބަދުވެސް އެ ބަލަން. ކޮންމެ ދުވަހަކު މަދުވެގެން ބަލަން ދެ އެޕިސޯޑް ވަރު. މިހާރު ނޭނގެ ސީރީޒް އެއްކޮށް ބަލައި ނިންމައި އަލުން އެ ފަށައި ބެލުނު އަދަދުވެސް. އެއީ އަދިވެސް އެއްވަން،" ޒުވާނަކު ބުންޏެވެ.
"ފްރެންސްޑް" ދިވެހިންގެ ހިތްތަކަށް ވަނީ ރަނގަޅަށް ވެސް ސަވާރުވެފަ އެވެ.
އެކުގައި އުޅޭ ހަ ރަހުމަތްތެރިއަކަށް ބިނާކޮށް ގެނެސްދީފައިވާ އެ ސީރީޒަކީ ހުރިހާ ރަހަތަކެއް އެކުލެވޭ ސީރީޒެކެވެ.
ޖުމްލަ 10 ސީޒަން ގެނެސްދީފައިވާއިރު ފަހު އެޕިސޯޑް ގެނެސްދީފައިވަނީ 2004 ވަނަ އަހަރުއެވެ. އެންމެ ފުރަތަމަ އެޕިސޯޑް ގެނެސްދިނީ 1994ގައެވެ.
ދާދިފަހުން ވަނީ "ފްރެންޑްސް" ދައްކަން ފެށިތާ 25 އަހަރު ފުރުން ވަރަށް ކުލަގަދަކޮށް ފާހަގަކޮށްފައެވެ. ދުނިޔޭގެ އެންމެ އުސް އިމާރާތް، ބުރުޖު ހަލީފާ ވަނީ "ފްރެންޑްސް" އިން ދިއްލާލާފައެވެ.
މި އަހަރަކީ ފްރެންޑްސް ނެޓްފްލިކްސް އިން ދައްކާ އެންމެ ފަހު އަހަރެވެ. ނެޓްފްލިކްސްއިން ވަނީ އެ ސީރީޒް ނަގާނެ ކަމަށް އިއުލާންކޮށްފައެވެ. ދެން އެ ސީރީޒް ދައްކާނީ އެޗްބީއޯ އިން އަލަށް ތައާރަފުކުރާ ސްޓްރީމިން ސާވިސް މެކްސް އިންނެވެ.
"ނެޓްފިލްސް ފުރިހަމަ ވަނީ ފްރެންޑްސް އާއެކު. ފްރެންޑްސް ނެތި ނެޓްފްލިކްސް ނުވާނެ ނެޓްފްލިކްސް އަކަށް،"
ނެޓްފްލިކްސް ދޫކޮށް ފްރެންޑްސް ދިޔަސް ދިވެހިންގެ ހިތްތަކުން ފްރެންޑްސް ނުދާނެއެވެ. އެއީ އަދިވެސް ގިނަ ބަޔަކަށް އެންމެ ކަމުދާ ޝޯއެވެ.