29 Sep 2019, 13:47
ކޮޅުވެއްޓި އެކްސިޑެންޓްގައި އަނިޔާވި ތިން މީހުންގެ ތެރެއިން އެކަކު މަރުވެއްޖެ އެވެ.
ރޭ 18:43 ހާއިރު އދ. ތުނޑިފުށީ ރިސޯޓްގައި އޮތް ކޮޅުވެއްޓިއެއްގައި މަސައްކަތް ކުރި ތިން ބިދޭސީއަކަށް އަނިޔާވެ އިތުރު ފަރުވާ އދ. އަތޮޅު ހޮސްޕިޓަލަށް ގެންދިޔަައެވެ.
އޭޑީކޭ ހޮސްޕިޓަލުގެ މެނޭޖިން ޑިރެކްޓަރު އަހްމަދު އަފްއާލް މިއަދު "ސަން" އަށް ވިދާޅުވީ، ކޮޅުވެއްޓީގައި އެކްސިޑެންޓްވެ ދެ މީހަކު އެ ހޮސްޕިޓަލަށް ގެނައިކަމަށެވެ.
އަފްއާލް ވިދާޅުވީ، އޭގެ ތެރެއިން 56 އަހަރުގެ ބަންގްލަދޭޝްގެ ފިރިހެން މީހާ މިއަދު ހެނދުނު 8:50 އެހާއިރު މަރުވެފައިވާ ކަމަށެވެ. ދެވަނަ ބިދޭސީ މީހާގެ ހާލު ރަނގަޅު ކަމަށާއި އޭނާ މިހާރު އައިޖީއެމްއެޗަށް ބަދަލުކޮށްފައިވާ ކަމަށް އަފްއާލް ވިދާޅުވިއެވެ.
އދ. އަތޮޅު ހޮސްޕިޓަލްގެ އޮފިޝަލަކު ރޭ "ސަން" އަށް ވިދާޅުވީ، އަނިޔާވި ބައެއް މީހުންގެ ބޯ ފަޅައިގެން ގޮސް ހޭވެސް ނެތް ކަމަށެވެ.
ފުލުހުން ރޭ ބުނީ، އެކްސިޑެންޓްގައި އެކެއްގެ އިނގިލިތައްވަނީ ޗިސްވެ އަދި އަނެއް ދެމީހުންގެ ބޮލަށް ބޮޑެތި އަނިޔާތަކެއް ލިބިފައިވާ ކަމަށެވެ.
އެ ހާދިސާ ހިނގަން މެދުވެރިވީ ކޮޅުވެއްޓީގެ ރޭމްޕް ހިއްލުމަށް ޗެއިން ބްލޮކް ބޭނުންކުރިއިރު އޭގެ އެއްފަޅި ފެއިލްވެގެން ކަމަށް ފުލުހުން ބުންޏެވެ. އަދި އެ ވަގުތު އެ ތިން މީހުން ތިބީ ރޭމްޕް މަތީގައި ކަމަށްވެސް ފުލުހުން ބުންޏެވެ.
ފުލުހުން ބުނީ އެ ރޭމްޕް ފެއިލްވެ އޭގައި ތިބި ތިން މީހުން ވިއްސައިގެން ގޮސް ބޯޓުގެ ދަގަނޑު ބައެއްގައި ޖެހުނު ކަމަށެވެ.