26 Sep 2019, 12:51
ގަވައިދާ ހިލާފަށް އުޅޭ ބިދޭސީން ދެވަނަ ފުރުސަތު ހޯދުމަށް ރޭގަނޑުން ފެށިގެން ކިއު ޖެހުމަކީ، ބޭކާރު ކަމެއް ކަމަށާއި މިނިސްޓްރީއަށް ހިދުމަތް ދެވޭނީ، ދުވާލަލަށް 150 މީހުންނަށް ކަމަށް އިކޮނޮމިކް މިނިސްޓަރު ފައްޔާޒު ވިދާޅުވެއްޖެ އެވެ.
ގާނޫނާއި ހިލާފަށް ރާއްޖޭގައި މަސައްކަތް ކުރަމުންދާ ބިދޭސީން ގާނޫނީ އިމުގެ ތެރެއަށް ވަނުމުގެ ފުރުސަތު ދިނުމަށް މިނިސްޓްރީން އިއުލާން ކުރީ މިދިޔަ ހަފްތާ ބުދަ ދުވަހު އެވެ.
މަޖީދީ މަގުގައި ކުރިން ޕީޖީ އޮފީސް ހިންގި އިމާރާތުގައި ހުންނަ، ރެގިއުލަރައިޒޭޝަން ޔުނިޓް ދޮށުގައި މިދިޔަ ބުރާސްފަތި ދުވަހުން ފެށިގެން ބިދޭސޯން އަންނަނީ ރޭގަނޑުން ފެށިގެން ކިޔޫ ޖައްސަމުން އެވެ.
މިކަމާ ގުޅިގެން މިނިސްޓަރު ރޭ ކުރެއްވި ޓްވީޓެއްގައި ބުނީ، ކިއުގެ ކަންތައް ފަސޭހަ ކުރުމަށްޓަކައި މަސައްކަތް ކުރައްވާނެ ކަމަށާއި ނަމަވެސް މިވަގުތު މިނިސްޓްރީގެ ވަސީލަތްތައް ހުރީ ދުވާލަކު 100 އާއި 150 ދެމެދުގެ މީހުންނަށް ހިދުމަތް ދެވޭނެ ވަރަށް ކަމަށެވެ.
"އަޅުގަނޑުގެމެން ވަނީ ހަ މަސް ދުވަސް ގަވާއިދާ ހިލާފަށް އުޅޭ ބިދޭސީން ރަޖިސްޓްޝަން ހެދުމަށް ދީފައި. ރޭގަނޑުން ފެށިގެން ކިއު ޖެހުމަކީ، ބޭނުންތެރިކަމެއް ނޫން،" ފައްޔާޒު ވިދާޅުވި އެވެ.
ރޭ 8:00 އިން ފެށިގެންވެސް އިކޮނޮމިކް މިނިސްޓްރީގެ ރެގިއުލަރައިޒޭޝަން ޔުނިޓްގައި ބިދޭސީން ވަނީ، ކިއު ހަދަން ފަށާފަ އެވެ. މިއަދު ހެނދުނު 10:00 ވީއިރުވެސް އެ ސަރަހައްދަށް ގިނަ އަދަދެއްގެ ބިދޭސީން ވަނީ ޖަމާވެފަ އެވެ.
އިމިގްރޭޝަން އިން މީގެ ކުރިން ބުނެފައިވާ ގޮތުގައި 63،000 އަށް ވުރެ ގިނަ ބިދޭސީން ރާއްޖޭގައި ގަވައިދާ ހިލާފަށް ދަނީ އުޅެމުންނެވެ.