25 Sep 2019, 21:45
މާލޭ ޖަލުގެ ޖާގައިގެ ދަތިކަން ހައްލުކުރުމުގެ ގޮތުން ޖަލުގެ ހާލަތު ދެނެގަތުމަށް ހޯމް މިނިސްޓަރު އިމްރާން އަބްދުﷲ މިއަދު ޖަލަށް ޒިޔާރަތްކުރައްވައިފިއެވެ.
ހޯމް މިނިސްޓަރުގެ އެ ޒިޔާރަތުގައި ޖަލުގެ ގޮޅިތަކަށް ވަޑައިގެން ޖަލުގެ ހާލަތު ބެއްލެވިއެވެ.
އޭގެ އިތުރުން ޖަލުގެ ގޮޅިތަކުގެ ހާލަތު ރަނގަޅުކޮށް ޖާގަ އިތުރުކުރުމަށް ކުރެވެން ހުރި ކަންކަން ދެނެގަނެ މައުލޫމާތު އޮޅުން ފިލުއްވައި ކަންކަން ރަނގަޅު ކުރުމަށް އިރުޝާދު ދެއްވައިފައެވެ.
އެ ޒިޔާރަތުގައި އިމްރާން ވަނީ ޖަލުގައި ތިބި ގައިދީންގެ ކަންބޮޑުވުންތައް އައްސަވައި ޖަލުގެ ހާލަތު ރަނގަޅުކުރައްވާނެ ކަމުގެ ޔަގީންކަން ދެއްވައިފައެވެ. އަދި ޖަލުތަކުގެ ހާލަތު ރަނގަޅު ކުރުމަށް ކުރަންޖެހޭ ކަންކަން އަވަސް ކުރުމަށް މޯލްޑިވްސް ކަރެކްޝަނަލް ސާވިސްގެ އިސްވެރިންނަށްވެސް އިމްރާން ވަނީ އަންގަވާފައެވެ.
މާލޭ ޖަލުގެ ހާލަތު އިމްރާން ބައްލަވާލައްވަނީ--- ފޮޓޯ: ހޯމް މިނިސްޓްރީ
އިމްރާން ޖަލުގެ ހާލަތު ބެއްލެވިއިރު ޖަލުގެ ހާލަތާ ބެހޭގޮތުން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)އިން ވަނީ ކަންބޮޑުވުން ފާޅުކުރައްވައިފައެވެ. މާލޭ ޖަލުގެ އެނެކްސް 1 ގެ ހާލަތު ދަށްވެފައި ވަނިކޮށް ގައިދީން ބަންދުކޮށްގެން ގެންގުޅެމުންދާތީ އެކަން ހުއްޓާލުމަށް އެދި އެ ކޮމިޝަނުން ވަނީ ކަރެކްޝަނަލް ސާވިސްއަށް 48 ގަޑިއިރުގެ މުހުލަތެއްވެސް ދީފައެވެ.
އެ ކޮމިޝަނުން ބުނީ ޖަލުގެ ތެރޭގައި ބާވެފައިވާ ދަނގަޑާއި، ކުދި ހިލަ ގޯންޏާއި، ވެލި ގޯންޏާއި އަދި ގޮޅިތަކުގައި ހިރަފުސް ބޯވެ ސާފު ތާހިރު ނޫން ކަން ފާހަގަކުރެވިފައިވާ ކަމަށް ބުނެފައެވެ.
މާލޭ ޖަލު އެނެކްސްގައި ތިބި ގައިދީންނާއި ބަންދު މީހުން ރައްކާތެރި މާހައުލަކަށް ބަދަލުކޮށް އެތަނުގައި އެއްވެސް ގައިދީއެއް އަދި ބަންދު މީހެއް ވެސް ބަންދު ނުކުރުމަށް އެ ކޮމިޝަނުން ވަނީ ކަރެކްޝަންސް އަށް އަންގާފައެވެ.