21 Sep 2019, 15:46
ރޭ ހެންވޭރު އަބަދަށްފެހިމަގުގައި ހުރި ގުދަނެއް ގޮވައި، ހިނގި އަލިފާނުގެ ހާދިސާއާ ގުޅިގެން މީހުން ހުސްކުރި 43 ގޭގެ އިންޖިނިއަރިން އެސެސްމަންޓް ހަދަން މިއަދު ފަށާނެކަމަށް ޑިޒާސްޓާ މެނޭޖްމަންޓް އޮތޯރިޓީން ބުނެފިއެވެ.
ހެންވޭރުގައި ގުދަނެއް ގޮވައި، އަލިފާންގަނޑު ފެތުރިގަތް ވަގުތު އެ ސަރަހައްދުގެ ގިނަ ގެތަކުން މީހުން ހުސްކުރިއެވެ. އަލިފާންގަނޑު ޖުމްލަ ހަތް އިމާރާތަކަށް ފެތުރުނެވެ.
ޑިޒާސްޓާ މެނޭޖްމަންޓުން މިއަދު ވަނީ ރޭގެ ހާދިސާއާ ގުޅިގެން ރައީސް އިބްރާހިމް މުހައްމަދު ސޯލިހާ ބައްދަލުކުރައްވާފައެވެ. މިއީ އެ އޮތޯރިޓީން ބުނީ، މީހުން ހުސްކުރެވިފައިވާ 43 ގޭގެ ހާލަތު ވަޒަންކުރުމަށްޓަކައި އިންޖިނިއަރިން އެސެސްމެންޓެއް ހައްދަވާނެ ކަމަށެވެ. އަދި އެ ގެތަކަށް މީހުން ވަނުމުގެ ހުއްދަ ދެއްވާނީ އެ ގެތަކުގެ ހާލަތު ވަޒަންކޮށް ސާފުކުރުމަށްފަހުގައި ކަމަށްވެސް އެ އޮތީރިޓީން ހާމަކުރައްވާފައިވެއެވެ.
ރޭގެ ހާދިސާއާ ގުޅިގެން ހާލުގައި ޖެހިގެން 400އަށް ވުރެ ގިނަ މީހުންނަށް ވަނީ އެމަޖެންސީ ސެންޓަރުގައި ރެޖިސްޓްރީ ކޮށްފައެވެ. ޑިޒާސްޓާ މެނޭޖްމަންޓުން ބުނި ގޮތުގައި މިހާރު ބޯހިޔާވަހިކަން ބޭނުންވާ ހުރިހާ ފަރާތްތަކަށް ވަގުތީ ބޯހިޔާވަހިކަން ދީފައިވާ ކަމަށެވެ.
ރޭ އަލިފާނުގެ ހާދިސާ ހިނގާފައިވަނީ ކެމިކަލް ގުދަނެއްގައެވެ. ރައީސް ސޯލިހު މިހާރު ވަނީ އެ ކެމިކަލް ގުދަންތައް މީހުން ދިރިނޫޅޭ ސަރަހައްދުތަކަށް ބަދަލުކުރުމުގެ މަސައްކަތް ފެށުމަށް ކަމާ ބެހޭ ފަރާތްތަކަށް އަންގަވާފައެވެ.