20 Sep 2019, 10:09
ވަރުގަދަ އާ ފީޗާސްތަކާއެކު ވާވޭގެ ފްލެގްޝިޕް ފޯނު މޭޓް 30 ސީރީޒްގެ ފޯނުތައް ދައްކާލައިފި އެވެ.
މިއުނިކްގައި ވާވޭއިން ބޭއްވި އިވެންޓުގައި އެކުންފުނިން ވަނީ މޭޓް 30 ސީރީޒްގެ ތިން ފޯނެއް ދައްކާލާފަ އެވެ. ރޭ ދައްކާލާފައިވާ ފޯނުތަކަކީ މޭޓް 30 އާއި މޭޓް 30 ޕްރޯ އަދި ލަގްޒަރީ ފޯނު މޭޓް 30 ޕްރޯ ޕޯޝާ އެވެ.
މިއަހަރުގެ މޭޓް 30 ސީރީޒްގެ ފޯނުތައް ހާއްސަކޮށްފައިވަނީ އާޓިފިޝަލް އިންޓެލިޖެންސް (އޭއައި) އާއި ފޮޓޯގްރަފީ އަދި ވީޑިއޯގްރަފީއަށެވެ.
މޭޓް 30 ޕްރޯގައި ހަތަރު ކެމެރާ ފޯނުގެ ފަހަތުގައި އިންނާނެ --- ފޮޓޯ : ޓެކް ރޭޑާ
މޭޓް 30 ޕްރޯގައި 40 މެގަޕިކްސެލްގެ ދެ ކެމެރާ، އާއި އަށް މެގަޕިކްސެލްގެ ޓެލެފޮޓޯ ލެންސެއްގެ އިތުރުން ޓައިމް އޮފް ފްލައިޓް ސެންސަރެއް ފޯނުގެ ފަހަތުގައި ހުރެ އެވެ. މި ފޯނުގެ ކެމެރާ ކޮލިޓީ އެހެން ފޯނުތަކަށްވުރެ ވަރުގަދަ ވާނެ ކަމަށް ވާވޭއިން ބުނެ އެވެ.
މޮޅު ފެންވަރުގެ ޕޯޓްރެއިޓް ފޮޓޯ އާއި ނައިޓް މޯޑް ވީޑިއޯގްރަފީ މި ފޯނުން ކުރެވޭނެ ކަމަށް ވާވޭއިން ބުނެ އެވެ. އަދި ފޯނުގެ ސްލޯމޯ ވީޑިއޯ 7680 ފްރޭމްސް ޕާ ސެކަންޑް (އެފްޕީއެސް)އަށް ޖައްސާލެވޭނެ އެވެ. މިއީ މިހާތަނަށް ފޯނަކުން ސްލޯމޯޝަން ވީޑިއޯ ނެގޭ ވަރަށްވުރެ މަތީ އަދަދެކެވެ.
މޭޓް 30 ޕްރޯގެ އަގުތައް ދައްކާލަނީ --- ފޮޓޯ : ސީނެޓް
ފްލެގްޝިޕް ފޯނުތަކާ އެއް އަގެއްގައި ހުރި މި ފޯނުތަކުގެ ތެރެއިން މޭޓް 30 ޕްރޯ ވިއްކާނީ 1،210 ޑޮލަރަށެވެ. އަދި މޭޓް 30 ވިއްކާނީ 885 ޑޮލަރަށެވެ.
ހާޑްވެއާ ވަރުގަދަ، ގޫގަލް އެޕެއް ނެތް!
ވަރުގަދަ ހާޑްވެއާއެއް ހުރި ނަމަވެސް ގޫގަލްގެ ހިދުމަތްތައް މޭޓް 30 ސީރީޒްގެ ފޯނުތަކަކަށް ނުލިބޭނެ އެވެ. ވާވޭ އާއި އެމެރިކާއާ ދެމެދު އޮތް "ޓްރޭޑް ވޯ"ގެ ސަބަބުން ގޫގަލްގެ ހިދުމަތްތައް އެ ފޯނުތަކަކަށް ނުލިބެނީ އެވެ. އެހެންކަމުން ޖީމެއިލް އާއި ޔޫޓިއުބް ފަދަ ހިދުމަތްތައް އެ ފޯނަށް ހުންނާނީ ބްލޮކްކޮށްފަ އެވެ.
މޭޓް 30 ގައި ބޭނުންކުރަނީ އެންޑްރޮއިޑް އޮޕަން ސޯސް އެވެ. އޭގެ މާނައަކީ އެ އޮޕަރޭޓިން ސިސްޓަމް މަސައްކަތް ކުރާނީ އެންޑްރޮއިޑް ގޮތަށެވެ. ނަމަވެސް ގޫގަލް ޕްލޭ ސްޓޯ ފަދަ ހިދުމަތްތަކެއް ނުހުންނާނެ އެވެ.
މޭޓް 30 ޕްރޯ ފަސް ކުލައަކުން ލިބޭނެ --- ފޮޓޯ : ސީނެޓް
ވާވޭގެ އަމިއްލަ އެޕް ސްޓޯއެއް އޮވެ އެވެ. ނަމަވެސް އެ އެޕް ސްޓޯގައި މިވަގުތު ހުރީ 45،000 އެޕްލިކޭޝަނެވެ. އެއީ ގޫގަލް ޕްލޭ ސްޓޯގެ ދެ މިލިއަނަށްވުރެ ގިނަ އެޕްތަކާ އަޅާ ބަލާއިރު ވަރަށް މަދު އަދަދެކެވެ.
ވާވޭއިން ބުނެފައިވަނީ ގޫގަލްގެ މައްސަލައަށް ހައްލެއް ދޭނެކަމަށެވެ. ނަމަވެސް މިރޭގެ އިވެންޓުގައި އެކަމާ ގުޅޭގޮތުން އެއްވެސް މައުލޫމާތެއް ހިއްސަކޮށްފައެއް ނުވެ އެވެ. އެހެންވެ، އެއީ ސުވާލެކެވެ.