05 Sep 2019, 16:53
އިންސާނީ ހައްގުތައް ހިމާޔަތްކުރުމުގައި ރާއްޖެއަކީ މިސާލެއްކަމަށް އިންސާނީ ހައްގުތަކާ ބެހޭ އދ.ގެ ހައިކޮމިޝަނަރު ހަރ އެކްސެލެންސީ މިޝޭލް ބެޝެލޭ ވިދާޅުވެ ރާއްޖެއަށް ވަރަށް ބޮޑަށް ތައުރީފްކުރައްވައިފި އެވެ.
އޭނާ އެފަދައިން ވިދާޅުވީ އދ. އިންސާނީ ހައްގުތަކާ ބެހޭ ކައުންސިލްގެ މެމްބަރު ގައުމުތަކާއި އޮބްޒާވަރު ގައުމުތަކާ އެކު ހައިކޮމިޝަނަރު ޖެނީވާގައި ހުންނަ އދ.ގެ އޮފީހުގައި އިއްޔެ ބޭއްވެވި ނުރަސްމީ ބައްދަލުވުމުގަ އެވެ.
އެ ނުރަސްމީ ބައްދަލުވުމަކީ އދ.ގެ އިންސާނީ ހައްގުތަކާ ބެހޭ ސެޝަންތަކުގެ ކުރިން އަބަދު ވެސް ހައިކޮމިޝަނަރު ބާއްވަވާ ބައްދަލުވުމެކެވެ.
އެ ބައްދަލުވުމުގައި ހައިކޮމިޝަނަރު ބާލޭ، ރާއްޖެ މިސާލަކަށް ނަންގަވައި ވިދާޅުވީ ނިމިގެން ދިޔަ ރިޔާސީ އިންތިހާބަށް ފަހު ރާއްޖެއިން އޮފީސް އޮފް ދަ ހައިކޮމިޝަނަރު ފޮރ ހިއުމަން ރައިޓްސްއާ ގުޅިގެން ގިނަ މަސައްކަތްތަކެއް ކުރަމުންދާ ކަމަށެވެ. އަދި އިންސާނީ ހައްޤުތަކާ ބެހޭ މުޝީރަކު ދިވެހިރާއްޖެއަށް ފޮނުއްވުމަށް ދިވެހި ސަރުކާރުން އެދިފައިވާކަން ވެސް އޭނާ ވަނީ ފާހަގަކުރައްވައިފަ އެވެ.
އެ ބައްދަލުވުމުގައި ދިވެހިރާއްޖޭގެ ފަރާތުން ބައިވެރިވަޑައިގެންނެވީ ޖެނީވާގައި ހުންނަ އދ.ގެ އޮފީހަށް ކަނޑައަޅާފައި ހުންނަ ދިވެހިރާއްޖޭގެ ދާއިމީ މިޝަންގެ ދާއިމީ މަންދޫބު ހާލާ ހަމީދު އެވެ.
ހާލާ ވަނީ ކުރިއަށް އޮތްތަނުގައި ވެސް އދ.ގެ އިންސާނީ ހައްގުތަކާ ބެހޭ ހައިކޮމިޝަނަރުގެ އޮފީހާ ގުޅިގެން ރާއްޖެއިން މަސައްކަތްކުރަމުންދާނެ ކަމުގެ ޔަޤީންކަން އެމްބެސެޑަރ ހާލާ، ހައިކޮމިޝަނަރަށް އަރުވައިފަ އެވެ.
އަދި ރާއްޖޭގެ ސުޕްރީމް ކޯޓުގެ ފަނޑިޔާރުކަމަށް ދެ އަންހެން ބޭފުޅުން އައްޔަންކުރެވުނު ކަމުގެ މައުލޫމާތު ހައިކޮމިޝަނަރާއި ހިއްސާކުރައްވައި އިންސާނީ ހައްގުތައް ކަށަވަރުކޮށްދީ، ކުރިއެރުވުމަށް ރާއްޖެއިން ކުރަމުންދާ މަސައްކަތްތަކުގެ ނަތީޖާ ފެންނަމުންދާކަން ފާހަގަކުރެއްވި އެވެ.