05 Sep 2019, 13:34
ރައްޔިތުންގެ މަޖިލީހުގެ މި ދައުރުގެ ޗުއްޓީ މާދަމާ ފެށުނު ނަމަވެސް ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) ކުރިއަށް ދާނެ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މި ދައުރުގެ ފަހު ޖަލްސާ މިހާރު ދަނީ ކުރިއަށެވެ. މިއަދު ޖަލްސާ ފަށަމުން ރައީސް ނަޝީދު ވިދާޅުވީ ކުއްލި މައްސަލައެއް ދިމާވެއްޖެނަމަ މަޖިލީހުގެ ކޮމިޓީ ބައްދަލުވުންތައް ބޭއްވޭ ގޮތަށް މަޖިލިސް ބަންދުނުކޮށް ބޭއްވުން މުހިންމު ކަމަށެވެ.
އަދި ކޮންމެ ހާލަތެއްގައިވެސް ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީގެ މަސައްކަތް މުޅި ޗުއްޓީގެ ހުރިހާ ދުވަހެއްގައިވެސް ހުއްޓުމެއް ނެތި ކުރިއަށް ގެންދާ ގޮތަށް ނިންމަން ރައީސް ނަޝީދު ހުށަހެޅުއްވިއެވެ.
"އެއީ މަރުތަކާ ގުޅޭ ރިޕޯޓު އިރާދަކުރެއްވިޔާ މިއަދު ނިމި އެ ރިޕޯޓުގެ މަސައްކަތް އެ ކޮމިޓީއާ ހަވާލުވެ، އެ ކޮމިޓީގެ މަސައްކަތް ކުރައްވަމުން ގެންދެވުން. އެހެން އިއްޒަތްތެރި މެމްބަރުން ޗުއްޓީއަށް ދިއުމާ ގުޅޭ ގޮތަކުންނެއް އަޅުގަނޑަށް މިވަގުތު އިއުތިރާޒެއް ކުރެވޭކަށް ނެތް. އެހެން ނަމަވެސް ސަލާމަތީ ހިދުމަތްތަކާ ބެހޭ ކޮމިޓީގެ މަސައްކަތައިގެން އެބޭފުޅުން ސެޕްޓެމްބަރު މަސް އެކުގައިހެން ތިއްބެވުން." ރައީސް ނަޝީދު ވިދާޅުވިއެވެ.
ގެއްލުވާލާފައިވާ މީޙުންނާއި މަރާލަފައިވާ މީހުންގެ މައްސަލަތައް ބަލާ ކޮމިޝަނުން ނޫސްވެރިޔާ އަހުމަދު ރިލްވާނު އަބްދުﷲގެ މައްސަލައިގައި ހޯދުނު ހޯދުންތަކުގެ ތަހުގީގު ރިޕޯޓު އެކުލަވާލައި އެ ރިޕޯޓު ވަނީ މަޖިލީހަށް ހުށަހަޅާފައެވެ.
އެ ރިޕޯޓު މަޖިލީހަށް ހުށަހަޅައި ރިޕޯޓަށް ބަހުސް ކުރުން މިހާރު ކުރިއަށް ދެއެވެ. ރައީސް ނަޝީދު ވިދާޅުވީ މިއަދު ބަހުސް ނިންމައި އެ ރިޕޯޓު ސަލާމަތީ ހިދުމަތްތަކާ ބެހޭ ކޮމިޓީއަށް ފޮނުއްވާ ވާހަކައެވެ.
އެ ރިޕޯޓުގެ ބަހުސްގެ ތެރެއިން ރިޕޯޓާއި ގުޅިގެން އަޅަންޖެހޭ ފިޔަވަޅުތައް އެޅުމަށް ތުޅާދޫ ދާއިރާގެ މެމްބަރު ހިސާން ހުސައިން އިއްޔެ ވަނީ ތިން ހުށަހެޅުމެއް ހުށަހަޅުއްވާފައެވެ.
ހިސާންގެ ހުށަހެޅުންތައް
- މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަނުގެ ރިޕޯޓު ދިރާސާކުރުމަށްފަހު ފުލުހުންގެ ގާނޫނާއި އަދިވެސް ކަމާ ގުޅޭ އެހެން ގާނޫނުތައް ދިރާސާކޮށް އެ ގާނޫނުތަކަށް ގެންނަން ޖެހޭ އިސްލާހުތައް ފާހަގަކޮށް އެ އިސްލާހުތައް ގެނައުން.
- މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަނުގެ ރިޕޯޓުގައި ފާހަގަކޮށްފައިވާ މައްސަލަތައް ބެލުމައްޓަކައި އެކަމަށް ހާއްސަ އިޖުރާއަތުތައް ކަނޑައަޅައި އެ އިޖުރާއަތުތައް ގާނޫނުގެ ސިފައިގައި ގެނައުން.
- މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަނުގެ ރިޕޯޓުގައި ފާހަގަކޮށްފައިވާ މައްސަލަތައް ކުރިއަށްދާ ގޮތާއި މިންވަރު ބަލައި އެކަންކަން ދިރާސާކުރުމަށް ދައުލަތުގެ ކަމާބެހޭ އެންމެހާ މުއައްސަސާތައް ހިމެނޭ ޓާސްކްފޯސްއެއް ރައްޔިތުންގެ މަޖިލީހުގެ ފަރާތުން އެކުލަވާލުން.
ރިލްވާންގެ މައްސަލައިގައި މަރު ކޮމިޝަނުން އެކުލަވާލު ރިޕޯޓުގައި ވާގޮތުން ހުޅުމާލެއިން ރިލްވާން ރަހީނުކޮށް، ޑިންގީއަކަށް އަރުވައިގެން ގެންގޮސް ދެން އެރުވީ އއ. އުކުޅަހު ދޯންޏަކަށެވެ. އަދި ރިލްވާން އެ ދޯންޏަށް އެރުވުމަށްފަހު، ކަރު ބުރިކޮށްލައި، ކަނޑުފައްތާފައި ވާކަމަށް ސިއްރު ހެކިވެރިޔަކު ބުނެފައިވާ ކަމަށް އެ ރިޕޯޓުގައި ބުނެއެވެ.
ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތައް ބަލާ ކޮމިޝަނުން އާންމު ކުރި އަހުމަދު ރިލްވާން އަބްދުﷲ ގެއްލުވާލި މައްސަލައިގެ ތަހުގީގު ރިޕޯޓުގައި ވާގޮތުން އޭނާ ރަހީނުކޮށްގެން ގެންގޮސް ކަނޑު ފައްތާ މަރާލީ ދީނީ ހަރުކަށި ފިކުރުގެ އަލްގައިދާއަށް ނިސްބަތްވާ ދިވެހިންތެކެކެވެ.