05 Sep 2019, 12:05
ތެގޫސިގަލްޕާ (ސެޕްޓެމްބަރު 5): ހޮންޑޫރަސްގެ ކުރީގެ ރައީސް ޕޯފީރިއޯ ލޮބޯ ސޯސާގެ އަނބިކަނބަލުން ރޯޒާ އެލީނާ ބޮނިލާގެ މައްޗަށް ކޮރަޕްޝަނުގެ ދައުވާތަކެއް ސާބިތުވެ، 58 އަހަރަށް ޖަލަށް ލާން ހުކުމްކޮށްފި އެވެ.
ބޮނީލާގެ މައްޗަށް ކޮރަޕްޝަނުގެ ދައުވާ ކުރީ ބޭރު ގައުމުތަކުން ހޮންޑޫރަސްއަށް ހަދިޔާ ކުރި ފައިސާ އާއި ދައުލަތުގެ ފައިސާގެ ތެރެއިން 779،000 ޑޮލަރު އަމިއްލަ ބޭނުމަށް ހަރަދު ކުރެއްވި ތުހުމަތުގަ އެވެ.
ހޮންޑޫރަސްގެ އެޓާނީ ޖެނެރަލްގެ އޮފީހުން ކުރިއަށްގެންދިޔަ ތަހުގީގަކުން ދެއްކި ގޮތުގައި 2010 އާއި 2014އާ ދޭތެރޭ ބޮނީލާ ވަނީ ހޮސްޕިޓަލް ފީ އާއި ދަރިންގެ ޓިއުޝަން ހަރަދަށާއި ގަހަނާ ގަތުމަށް އެފައިސާ ބޭނުންކޮށްފަ އެވެ.
ބޮނީލާގެ ވަކީލުން ވަނީ އެމައްސަލަ އިސްތިއުނާފު ކުރުމަށް ހޮންޑޫރަސްގެ ސުޕްރީމް ކޯޓަށް ހުށަހަޅާނެ ކަމަށް ވިދާޅުވެފަ އެވެ. އެހުކުމް ސުޕްރީމް ކޯޓުން ބާތިލު ނުކުރިޔަސް ބޮނީލާ ޖަލުގައި ހޭދަ ކުރައްވަން ޖެހޭނީ ގިނަވެގެން 30 އަހަރެވެ. އެއީ އެގައުމުގެ ގާނޫނުން ޖަލު ހުކުމް ތަންފީޒު ކުރުވާ އެންމެ ދިގު މުއްދަތެވެ.
ހޮންޑޫރަސްގައި 2010އަކުން 2014އަށް ވެރިކަން ކުރެއްވި ރައީސް ލޮބޯގެ މައްޗަށް ވަނީ މަސްތުވާތަކެތި ޓްރެފިކް ކުރާ ޖަމާއަތަކާ ގުޅުން އޮތް ކަމުގެ ތުހުމަތުކޮށްފަ އެވެ. އަދި އޭނާގެ ދަރިފުޅު ފާބިއޯ ލޮބޯގެ މައްޗަށް ވަނީ އެމެރިކާއަށް މަސްތުވާތަކެތި އެތެރެ ކުރަން އުޅުމުގެ ދައުވާ 2017 ވަނަ އަހަރު ސާބިތުވެ، އެގައުމުގައި 24 އަހަރަށް ޖަލަށް ލާން ހުކުމްކޮށްފަ އެވެ.
ލޮބޯ ވަނީ އޭނާގެ މައްޗަށް ކޮށްފައިވާ ތުހުމަތުތައް ދޮގު ކުރައްވާފަ އެވެ.