02 Sep 2019, 15:58
ކާބުލް (ސެޕްޓެމްބަރު 2) : އެމެރިކާއާއި ތާލިބާނުން ސުލްޙައިގެ އެއްބަސްވުމަކަށް ދިޔުމަކީ އަފްޣާން ހަނގުރާމައަށް ނިމުން އައިސް އަފްޣާނިސްތާނުގައި ސުލްހަ ގާއިމް ކުރުމުގެ މަގުތަނަވަސް ވެގެންދާނެ ކަމެއް ކަމަށް އެމެރިކާއިން އަފްޣާނިސްތާނަށް ކަނޑައަޅާފައިވާ މަންދޫބު ޒަލްމޭ ޚަލީލް ޒާދު ވިދާޅުވެއްޖެއެވެ.
ގަތަރުގެ ވެރިރަށް ދައުޙާގައި ތާލިބާނުންނާއެކު ކުރިޔަށްގެންދިޔަ ސުލްހައިގެ ވާހަކަތަކުގެ ނުވަވަނަބުރު ނިމުމަށްފަހު އެވާހަކަތަކާބެހޭ މައުލޫމާތު އަފްޣާން މަސްއޫލުވެރިންނަށް ދެއްވުމަށްޓަކައި ކާބުލްއަށް ފުރާވަޑައިގަތުމުގެ ކުރިން ދެއްވި ބަޔާނެއްގައި ޚަލީލް ޒާދު ވިދާޅުވީ ތާލިބާނުންނާއެކު އެމެރިކާ ކުރިޔަށްގެންދާ ސުލްޙައިގެ ވާހަކަތައް އެއްބަސްވުމަކާ ހަމައަށް ދިޔުމާ ގާތްވެފައިވާ ކަމުގައެވެ.
ތާލިބާނުންނާއެކު ސުލްޙައިގެ އެއްބަސްވުމެއްގައި ސޮއިކުރެވިއްޖެނަމަ އަފްޣާނިސްތާނަށް ސުލްޙަ ގެނައުމަށް މަގުފަހިވުމުގެ އިތުރުން އަފްޣާނިސްތާނަކީ ހަނގުރާމައިގެ ބިރުވެރިކަންނެތް، އެމެރިކާއާއި އެމެރިކާގެ ބައިވެރިންނާ އަދި އަފްޣާން އަވަށްޓެރިންގެ މަސްލަހަތު ރައްކާތެރި ކުރެވޭހާލަތުގައި އޮންނަ ގައުމަކަށް ވެގެންދާނެކަމުގެ ޔަގީންކަން އެބައޮތްކަމަށް ޚަލީލް ޒާދު ވިދާޅުވިއެވެ.
ތާލިބާނުން އެމެރިކާއާ ސުލްޙައިގެ ވާހަކަތައް ކުރިޔަށްގެންދިޔަނަމަވެސް އަފްޣާން ސަރުކާރާ ސުލްހައިގެ ވާހަކަތައް ދައްކަން ތާލިބާނުން ގެންދަނީ ދެކޮޅު ހަދަމުންނެވެ. އެހެންކަމުން އެމެރިކާއާއި ތާލިބާނުން ސުލްޙައިގެ އެއްބަސްވުމެއްގައި ސޮއިކުރިނަމަވެސް އަފްޣާނިސްތާނަށް ސުލްހައެއް ނާންނާނެއެވެ. އަދި އަފްޣާން ސިފައިންނާއި ތާލިބާނުންނާދެމެދު ހިނގާ ހަނގުރާމަވެސް ހުއްޓުމަކަށް ނާންނާނެއެވެ. ނަމަވެސް އެމެރިކާ ސިފައިން އަފްޣާނިސްތާނުން ބޭލުމުގެ ތާވަލެއް އެމެރިކާއިން ކަނޑައަޅައި އެއާއެކު އެމެރިކާއާއި ތާލިބާނުން ސުލްޙައިގެ އެއްބަސްވުމެއްގައި ސޮއިކޮށްފިނަމަ އަފްޣާން ސަރުކާރާއި ތާލިބާނުންގެ މެދުގައި ސުލްހައިގެ ވާހަކަތައް ފެށުމަށް މަގުފަހިވާނެކަމަށް އޮބްޒާވަރުން ދެކެއެވެ.
ކާބުލްއަށް ފުރާވަޑައިގަތުމުގެ ކުރިން ގަތަރުގައި ދެއްވި ބަޔާނުގައި ޚަލީލް ޒާދުވެސްވަނީ އެމެރިކާއާއި ތާލިބާނުން ސުލްޙައިގެ އެއްބަސްވުމެއްގައި ސޮއިކޮށްފިނަމަ އަފްޣާނިސްތާނުގެ ދާޚިލީ ސުލްޙައަށް މަގުފަހިވާނެ ކަމަށް ވިދާޅުވެފައެވެ. އެމެރިކާ ތާލިބާނުންނާއެކު ގަތަރުގައި ކުރިޔަށްގެންދާ ސުލްހައިގެ ވާހަކަތަކުގައި ތާލިބާނުންވަނީ އެމެރިކާއަށްވެސް އަދި އެހެންގައުމަކަށްވެސް ނުރައްކާވަފަދަ ގައުމަކަށް އަފްޣާނިސްތާން ނުހެދުމަށާ އެއްވެސް ގައުމަކަށް ހަމަލާދިނުމަށް އަފްޣާން ބިން ބޭނުންކުރުމުގެ ފުރްސަތު ނުދިނުމަށް އެއްބަސްވެ އެކަމުގެ ޔަގީންކަން އެމެރިކާއަށް ދީފައެވެ.
އެމެރިކާއާއި ތާލިބާނުން ސުލްޙައިގެ އެއްބަސްވުމެއްގައި ސޮއިކުރުމުން ތާލިބާނުން ހިމެނޭގޮތަށް އަފްޣާނިސްތާނުގެ އެކިޖަމާއަތްތަކާއި އަފްޣާން ސަރުކާރާދެމެދު ސުލްހައިގެ ވާހަކަތައް ފެށުމަށްވަނީ ރާވާފައެވެ. މި ވާހަކަތައް ކުރިޔަށްގެންދަން ހަމަޖެހިފައިވަނީ ނޯވޭގެ ވެރިރަށް އޮސްލޯގައެވެ.
ތާލިބާނުން އެމެރިކާއާ ސުލްޙައިގެ ވާހަކަތައް ދައްކަމުން ދިޔަނަމަވެސް ތާލިބާނުން މި ހަފްތާގައިވެސްވަނީ އަފްޣާނިސްތާނުގެ އުތުރުގެ މުހިއްމު ސިޓީއެއް ހިފުމަށްޓަކައި އަފްޣާން ސިފައިންނާ ދެކޮޅަށް ވަރުގަދަ ހަމަލާތަކެއް ދީފައެވެ. އޭގެކުރިން މިދިޔަ ހަފްތާގައިވެސް ތާލިބާނުން ވަނީ އަފްޣާނިސްތާނުގެ ސްޓްރެޓީޖިކް ސަރަހައްދެއް ކަމަށްވާ ގުންދުޒް ގައިވާ އަފްޣާން ސިފައިންނަށް ވަރުގަދަ ހަމަލާތަކެއްދީ އެސަރަހައްދުގައި ހަނގުރާމަ ފަށާފައެވެ.
މިގޮތަށް އަފްޣާން ސިފައިންނާއި އެމެރިކާ ސިފައިންވެސް ގެންދަނީ އަފްޣާނިސްތާނުގައިވާ ތާލިބާނުންގެ މަރުކަޒުތަކަށް ވަރުގަދައަށް ހަމަލާތައް ދެމުންނެވެ. ތާލިބާނުން ސުލްޙައާ ދިމާއަށް އެނބުރުމުގެ ސަބަބުތަކުގެ ތެރޭގައި އައިއެސް ޖަމާއަތް އަފްޣާނިސްތާނުގައި ބާރުގަދަކޮށް އެޖަމާއަތުގެ ނުރައްކާ ތާލިބާނުންނަށް ފޯރަމުންދިޔުންވެސް ހިމެނޭކަމަށް މުހައްލިލުން ވިދާޅުވެއެވެ. (ނޫސްއެޖެންސީތައް)