02 Sep 2019, 12:32
ގުދުސް (ސެޕްޓެމްބަރު 2): ހުޅަނގު އައްސޭރީގައި އިސްރާއީލުން ޔަހޫދީން ވަޒަންވެރިކޮށްފައިވާ ހުރިހާ ބިންތައް އިސްރާއީލުގެ ބަޔަކަށް ހަދާނެ ކަމަށް އެގައުމުގެ ބޮޑުވަޒީރު ބެންޖަމިން ނަތަންޔާހޫ އަނެއްކާ ވެސް ވިދާޅުވުމުން، ފަލަސްތީނުން ފާޑު ކިޔައިފި އެވެ.
ހުޅަނގު އައްސޭރީގައި ޔަހޫދީ ބޮޑެތި އާބާދީތައް އޮންނަ ސަރަހައްދުތައް އިސްރާއީލުގެ ބަޔަކަށް ހަދާނެ ކަމަށް ނަތަންޔާހޫ ވިދާޅުވީ މިމަހު ބާއްވާ މަޖިލިސް އިންތިހާބަށް ކެމްޕެއިން ކުރެއްވުމަށް އިއްޔެ ބޭއްވި ރެލީއެއްގަ އެވެ.
އަދި ނަތަންޔާހޫގެ ވާހަކަތައް ކުށްވެރި ކުރައްވަމުން ފަލަސްތީނުގެ ރައީސް މަހުމޫދު އައްބާސްގެ ތަރުޖަމާނު ނަބީލް އަބޫ ރުދެއިނާ ވަނީ ހުޅަނގު އައްސޭރީގެ ބިންތައް އިސްރާއީލުގެ ބަޔަކަށް ހެދުމަކީ "ސުލްހަވެރިކަމާއި ސަލާމަތާއި ހަމަޖެހުމަށް މަގުފަހިވާނެ" ގޮތެއް ނޫން ކަމަށް ވިދާޅުވެފަ އެވެ.
އަދި ފަލަސްތީން ލިބަރޭޝަން އޯގަނައިޒޭޝަން (ޕީއެލްއޯ)ގެ ސެކްރެޓަރީ ޖެނެރަލް ސައިބް އެރެކަތު ވަނީ ނަތަންޔާހޫ ދެއްކެވި ވާހަކައާ ގުޅިގެން އިސްރާއީލާ ދެކޮޅަށް ފިޔަވަޅު އެޅުމަށް ބައިނަލްއަގުވާމީ މުޖުތަމައަށް ގޮވާލައްވާފަ އެވެ.
އިސްރާއީލުން ހުޅަނގު އައްސޭރި ހިފީ 1967ގައި އިސްރާއީލާއި އަރަބި ގައުމުތަކާ ދެމެދު ކުރި ހަ ދުވަހުގެ ހަނގުރާމައިގެ ތެރޭގަ އެވެ. އަދި އިސްރާއީލުން އެސަރަހައްދުގައި އެގައުމުގެ ރައްޔިތުން ވަޒަންވެރި ކުރަމުން ދަނީ ބައިނަލްއަގުވާމީ ގާނޫނުތަކަށާ ހިލާފަށެވެ.
އިސްރާއީލުގައި ވަނީ މިދިޔަ އޭޕްރިލް މަހު ވެސް މަޖިލިސް އިންތިހާބު ބާއްވާފަ އެވެ. އެއިންތިހާބުގައި ނަތަންޔާހޫގެ ލިކުދް ޕާޓީއަށް ގިނަ ގޮނޑިތައް ކާމިޔާބު ކުރެވުނު ނަމަވެސް ކޯލިޝަން ސަރުކާރެއް އެކުލަވާލެވޭ ގޮތެއް ނުވި އެވެ. އޭގެ ސަބަބުން މިމަހުގެ 17ގައި އަނެއްކާ ވެސް އިންތިހާބު ބާއްވަން ނިންމީ އެވެ.
އޭޕްރިލްގައި ބޭއްވި އިންތިހާބުގެ ކުރިން އިސްރާއީލުގެ އެޓާނީ ޖެނެރަލް ވަނީ ނަތަންޔާހޫގެ މައްޗަށްކޮށްފައިވާ ކޮރަޕްޝަނުގެ ތުހުމަތުތަކާ ގުޅިގެން މި އަހަރު ތެރޭ އޭނާގެ މައްޗަށް ދައުވާ ކުރައްވާނެ ކަމަށް ވިދާޅުވެފަ އެވެ. އެހެންކަމުން އިދިކޮޅު ފަރާތްތަކުން ބުނާ ގޮތުގައި ނަތަންޔާހޫ ބޮޑުވަޒީރުކަމުގައި ހުންނަވަން ބޭނުންފުޅުވަނީ އެދައުވާތަކުން ހިމާޔަތް ހޯއްދެވުމަށެވެ.
ހުޅަނގު އައްސޭރީގައި އިސްރާއީލުން ވަޒަންވެރިކޮށްފައިވާ 400،000އަށް ވުރެ ގިނަ މީހުން ދިރިއުޅެ އެވެ. އަދި އިސްރާއީލުން ވެރިވެގަނެފައިވާ އިރުމަތީ ގުދުސްގައި އެގައުމުގެ އިތުރު 200،000 މީހުން ދިރިއުޅެ އެވެ.