15 Jun 2010, 15:17
19:00
ރާއްޖޭގެ ތަޢްލީމުގެ ޤައުމީ މަންހަޖު ތަރައްޤީ ކުރެއްވުމަށް މިނިސްޓަރ އޮފް އެޑިޔުކޭޝަން ޑރ. މުޞްޠަފާ ލުޠުފީ ކުރައްވަމުން ގެންދަވާ މަސައްކަތްޕުޅުތަކަކީ، ވަޒީރުންގެ މަޖިލީހުން ބަލައިގަންނަ މަސައްކަތްޕުޅުތަކެއް ކަމަށް، އެމަޖިލީހުން ނިންމަވައިފި އެވެ.
އެ މަޖިލީހުން މިގޮތަށް މި ނިންމެވީ، ޑރ. މުޞްޠަފާ ލުޠުފީއަށް އިތުބާރު ނެތްކަމުގެ ވޯޓެއް ނެގުމުގެ މައްސަލައެއް ރައްޔިތުންގެ މަޖިލީހަށް މިހާރު ހުށަހެޅިފައިވުމާއެކު، މިއަދުގެ ޖަލްސާގައި، އެކަމުގެ މައްޗަށް ވާހަކަފުޅު ދައްކަވަމުންނެވެ.
މަޖިލީހުގެ މެންބަރުން މިއަދު ދެއްކެވި ވާހަކަފުޅުގައި ޑރ. މުޞްޠަފާ ލުޠުފީ، ރާއްޖޭގެ ތަޢްލީމީ ދާއިރާ ތަރައްޤީ ކުރެއްވުމަށް ކުރައްވަމުން ގެންދަވާ މަސައްކަތްޕުޅުތަކާ ދޭތެރޭގައި، އެބޭފުޅުން ވަރަށް ބޮޑަށް ހިތްޕުޅުހަމަޖެހިވަޑައިގަންނަވާކަން ހާމަކުރެއްވި އެވެ. އަދި ޑރ. މުޞްޠަފާ ލުޠުފީއާ ދޭތެރޭގައި ވަޒީރުންގެ މަޖިލީހުގެ މެންބަރުންގެ ފުރިހަމަ އިތުބާރު އެބައޮތް ކަމަށް ވެސް އެބޭފުޅުން ވިދާޅުވި އެވެ.
ޑރ. މުޞްޠަފާ ލުޠުފީއަށް އިތުބާރު ނެތްކަމުގެ ވޯޓެއް ނެގުމާ ދޭތެރޭގައި، ދިވެހި ރައްޔިތުންގެ ޕާޓީ (ޑީއާރްޕީ) ން ވަކި އަތަކަށް އެއްޗެއް ނުބުނާތީ، އެކަމުން ހިތްވަރު ލިބިވަޑައިގަންނަވާ ކަމަށްވެސް މަޖިލީހުގެ މެންބަރުން ވިދާޅުވި އެވެ. އަދި ރާއްޖޭގެ ތަޢްލީމީ މަންހަޖު އިޞްލާޙު ކުރުމާއި، ތަޢްލީމީ ނިޒާމުގެ ތެރެއިން ރާއްޖޭގައި ދީނީ ތަޢްލީމާއި ތަރުބިއްޔަތު ދެއްވަމުން ގެންދަވާ ގޮތާ ގުޅޭގޮތުން ޑީއާރްޕީއާ މަޝްވަރާ ކުރައްވަން މަޖިލީހުގެ މެންބަރުން ތައްޔާރަށް ތިއްބެވިކަން ވެސް ނިންމެވި އެވެ.