27 Aug 2019, 15:26
ސްރީލަންކާގެ ބޮޑުވަޒީރު ރަނިލްވިކްރަމަސިންހަގެ ދެކަނބަލުން ރާއްޖެއަށް ރަސްމީ ދަތުރުފުޅެއް ކުރައްވާގޮތަށް ހަމަޖެހިއްޖެއެވެ.
ރަނިލް ރާއްޖެއަށް ކުރައްވާ ދަތުރުފުޅަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ދައުވަތަކަށް ކުރައްވާ ދަތުރުފުޅެކެވެ. މި ދަތުރުފުޅުގައި ލަންކާގެ ބޮޑުވަޒީރުގެ އަރިހުގައި ކެބިނެޓުގެ ބައެއް މެންބަރުން ބައިވެރިވެ ވަޑައިގަންނަވާނެއެވެ.
އަންނަ މަހުގެ ދެވަނަ ދުވަހު ކުރައްވާ މި ދަތުރުފުޅުގައި ދެ ގައުމުގެ ދެމެދު އެއްބާރުލުން ދިނުމުގެ މަޝްވަރާތައް ކުރާނެ ކަމަށާއި ދެގައުމުގެ ގުޅުން ބަދަހިކުރުމާ ގުޅޭގޮތުން މަޝްވަރާ ކުރައްވާނެކަމަށް ރައީސް އޮފީހުން ބުންޏެވެ.
މީގެ އިތުރުން އަންނަ މަހުގެ ތިނަކުން ހަތަރަކަސް ރާއްޖޭގައި ބާއްވާ އިންޑިއަން އޯޝަން ކޮންފަރެންސް 2019 ޗެއާކުރައްވާނީވެސް ރަނިލްކަމަށް ރައީސް އޮފީހުން ބުންޏެވެ.
އިންޑިއަން އޯޝަން ކޮންފަރެންސް އަކީ ދިވެހި ސަރުކާރާއި އިންޑިއަން ފައުންޑޭޝަން ގުޅިގެން ބާއްވާ ކޮންފަރެންސެކެވެ. ސިންގަޕޫރުގެ އެސް ރާޖަރަތުނަމް އިންޓަނޭޝަނަލް ސްޓަޑީސް އަކީވެސް މި ކޮންފަރެންސްގެ ޕާޓްނަރެކެވެ.