18 Aug 2019, 22:08
އިސްލާމް އާބާދު (އޮގަސްޓް 18): ޖަންމޫ ކަޝްމީރު އިންޑިއާއާ އެނެކްސްކޮށް އެސަރަހައްދުގެ އާންމުންނާ ދެކޮޅަށް އިންޑިއާ ހިންގަމުން ގެންދާ ހަރުކަށި އަމަލުތަކަށް ބައިނަލްއަގްވާމީ ސަމާލުކަން ހުއްޓިފައިވާ މިދަނޑިވަޅުގައި އެކަން އަނެއްކޮޅަށް ޖެހޭތޯ އިންޑިއާއިން މަސައްކަތްތަކެއް ކުރަމުން ގެންދާކަމަށް ޕާކިސްތާނުން ބުނެފިއެވެ.
ކަޝްމީރުގެ މައްސަލާގައި ބޭއްވި ނޫސްކޮންފަރެންސެއްގައި ޕާކިސްތާނުގެ ޚާރިޖީ ވަޒީރު ޝާހް މަޙްމޫދު ގުރައިޝީ ވިދާޅުވީ ޖަންމޫ ކަޝްމީރުގެ މައްސަލާގައި އިންޑިއާ އަމަލުކުރާ ހަރުކަށިގޮތްތަކުގެ މެސެޖް ބައިނަލްއަގްވާމީ މުޖްތަމައަށް މިހާރު ލިބިފައިވާކަމަށާ އިންޑިއާ ކުށްވެރިކޮށް އދ. ގެ ސަލާމަތީ މަޖިލީހުގައިވެސް ދުނިޔޭގެ ބޮޑެތި ގައުމުތަކުން ވާހަކަ ދައްކާފައިވާ ކަމުގައެވެ.
ގުރައިޝީ ވަނީ ކަޝްމީރުގެ އާންމުންނާ ދެކޮޅަށް އިންޑިއާ ހިންގަމުން ގެންދާ ހަރުކަށި އަމަލުތަކަށް ހުއްޓިފައިވާ ބައިނަލްއަގްވާމީ ސަމާލުކަން އެހެން ދިމާއަކަށް އަނބުރާލުމަށް އިންޑިއާއިން ނުސިޔާނު ފިޔަވަޅެއް އަޅައިފިނަމަ އެކަމަށް ޕާކިސްތާނުން ވަރުގަދަ ރައްދެއް ދޭނެ ކަމުގެ އިންޒާރުވެސް ދެއްވާފައެވެ.
ކަޝްމީރުގެ މައްސަލަ ބައިގަރުނަށްފަހު އދ. ގެ ސަލާމަތީ މަޖިލީހަށް ވެއްދުމުގައި ޕާކިސްތާންވަނީ ކާމިޔާބު ހޯދާފައެވެ. ޗައިނާގެ އެހީތެރިކަމާއެކު ޕާކިސްތާނުން އެމައްސަލަ ސަލާމަތީ މަޖިލީހަށް ހުށަހެޅުމުން ކަޝްމީރުގެ ރައްޔިތުން އެދޭގޮތަށް އެސަރަހައްދުގެ މުސްތަގްބަލް ކަނޑައެޅުމުގެ ފުރްސަތު ދިނުމަށް މީގެ ބައި ގަރުނު ކުރިން ސަލާމަތީ މަޖިލީހުން ފާސްކޮށްފައިވާ ގަރާރު ތަންފީޒުކުރަން އިންޑިއާ ދެކޮޅު ހަދަމުން ގެންދާ މައްސަލަ ދުނިޔޭގެ ސަމާލުކަމަށް އައިކަން ގުރައިޝީ ފާހަގަ ކުރެއްވިއެވެ.
ޖަންމޫ ކަޝްމީރަށް އިންޑިއާގެ ގާނޫނު އަސާސީގައި ލިބިދީފައި އޮތް ސެލްފް ރޫލްގެ މިނިވަންކަމާ ޚާއްސަ ހާލަތާއި އިމްތިޔާޒްތައް އިންޑިއާއިން އުވާލި މައްސަލައާއި ކަޝްމީރު ބަންދުކޮށް ފޯނާއި އިންޓަނެޓް ކަނޑާލައި ކަޝްމީރު ޖަލަކަށް ހަދައިގެން އިންޑިއާ އުޅޭ މައްސަލަ އިންޑިއާއާ ގާތްގުޅުންތައް ބާއްވާ އެމެރިކާފަދަ ބޮޑެތި ގައުމުތަކުންވެސް ކުށްވެރި ކުރުމަކީ އިންޑިއާއަށް ލިބުނު ފިލާވަޅުތަކެއް ކަމަށް ގުރައިޝީ ވިދާޅުވިއެވެ.
ޖަންމޫ ކަޝްމީރުގެ މައްސަލާގައި ސަލާމަތީ މަޖިލީހުގައި އިންޑިއާއަށް ކުރިމަތިވި ފާޑުކިޔުންތަކަށް ރައްދު ދެއްވަމުން އދ. ގައި ހުންނަވާ އިންޑިއާގެ ދާއިމީ މަންދޫބު ސައްޔިދު އަކްބަރުއްދީން ވަނީ އިންޑިއާއަކީ މިނިވަން މުސްތަގިއްލު ގައުމެއްކަމަށާ އިންޑިއާ ކަންކަން ކުރަންވާގޮތް އދ. ފަދަ ބައިނަލްއަގްވާމީ ޖަމިއްޔާ ޖަމާއަތްތަކުން ބުނެދޭން ނުޖެހޭ ކަމަށް ވިދާޅުވެ އދ. އަށް ހަރުކަށި ރައްދެއް ދެއްވާފައެވެ.
ކަޝްމީރުގެ މައްސަލައަކީ އިންޑިއާގެ ދާޚިލީ މައްސަލައެއްކަން ބަޔާން ކުރައްވަމުން، ގައުމެއްގެ ދާޚިލީ ކަންކަމާ އެހެން ފަރާތަކަށް ނުބެހެވޭނެކަމަށްވެސް އިންޑިއާގެ މަންދޫބު ވިދާޅުވިއެވެ.
ކަޝްމީރުގެ މައްސަލާގައި ސަލާމަތީ މަޖިލީހުގެ ގިނަ މެންބަރުން ބާރު އަޅުއްވާފައިވަނީ އިންޑިއާއާއި ޕާކިސްތާން ވާހަކަ ދައްކައިގެން ގޮތެއް ނިންމުމުގެ މައްޗަށެވެ. އެހެންކަމުން ކަޝްމީރުގެ މައްސަލާގައި އދ. ގެ ސަލާމަތީ މަޖިލީހުން އިއްޔެ ބޭއްވި ބައްދަލުވުމުގައި ވަކިގޮތެއް ނިންމާފައެއްނުވެއެވެ. އަދި އެ ބައްދަލުވުމަށްފަހު ބަޔާނެއްވެސް ނެރެފައެއްނުވެއެވެ.
ޖަންމޫ ކަޝްމީރު އިންޑިއާއާ އެނެކްސްކޮށް އެސަރަހައްދުގެ އާންމުންނާ ދެކޮޅަށް އިންޑިއާ ހިންގަމުން ގެންދާ ހަރުކަށި އަމަލުތަކާ ގުޅޭ ކަންކަން ބެލުމަށާއި ކަޝްމީރުގެ ރައްޔިތުން އެދޭ ގޮތަށް އެމީހުންގެ މުސްތަގްބަލް ކަނޑައެޅުމުގެ ކަންތައް ދުނިޔޭގެ ފެންވަރުގައި ޕްރޮމޯޓް ކުރުމަށްޓަކައި ޕާކިސްތާނުގެ ބޮޑުވަޒީރު އިމްރާން ޚާން މިހާރުވަނީ ޕާކިސްތާނުގެ ޚާރިޖިއްޔާގައި ކަޝްމީރަށް ޚާއްސަ ޔުނިޓެއް އުފެއްދުމަށް ނިންމާފައެވެ. ދުނިޔޭގެ ގައުމުތަކުގައި ހުންނަ ޕާކިސްތާނުގެ އެމްބަސީތަކުގައި "ކަޝްމީރު ޑެސްކް" ގެ ނަމުގައި އެ ޔުނިޓްގެ ބްރާންޗްތައް ގާއިމުކުރުމަށް އިމްރާން ޚާން ނިންމަވާފައިވާ ކަމަށްވެސް ޕާކިސްތާނުން ބުނެއެވެ. (ނޫސްއެޖެންސީތައް)