10 Aug 2019, 21:26
ކަރަންޓް ދިނުމަށް ބޭނުންކުރާ މައި ކޭބަލް ގުޅާފައި ހުރި ޑިސްޓްރިބިއުޝަން ފޮއްޓެއްގައި އަލިފާން ރޯވެ، ތ. ވޭމަންޑޫގެ ބޮޑު ބަޔަކުން ކަރަންޓް ކެނޑިއްޖެ އެވެ.
ވޭމަންޑޫ ކައުންސިލްގެ ރައީސް މުހައްމަދު ނަސހު ވިދާޅުވީ، ޑިސްޓްރިބިއުޝަން ފޮށީގައި ރޯވެ ރަށުގެ ބަޔަކުން ކަރަންޓް ގޮސްފައި ވަނީ މިއަދު ހަވީރު ކަމަށާއި އެ މައްސަލަ ހައްލުކޮށް އަލުން ކަރަންޓް ދިނުމުގެ މަސައްކަތް ކުރަމުން އަންނަ ކަމަށެވެ.
އޭނާ ވިދާޅުވީ، އެ ރަށުގެ ނަރުދަމާގެ މަސައްކަތް ކުރަމުން އަންނަ ކުންފުނިން ރަށުތެރެ ކޮނުމުގެ ތެރޭގައި ކަރަންޓް ކޭބަލްގެ 80 އިންސައްތަ ހަލާކުވެފައިވާ ކަމަށެވެ. އެކަމުގެ ސަބަބުން އިރުއިރުކޮޅާ ހެން ކަރަންޓް ކެނޑި ގިނަ އަދަދެއްގެ އިލެކްޓްރޯނިކް ސާމާނު ހަލާކުވަމުންދާ ކަމުގެ ޝަކުވާ ލިބިފައިވާ ކަމަށެވެ.
"މިއީ މިހާރު މައި ކޭބަލް. އެ ކޭބަލް ވެސް އޮތީ މި މީހުން ދަމައި ގާތް ގަޑަކަށް ހަމަ ބިމުން ފަށައިގެން ހަ އިންޗި ވަރު އަޑީގައި. މުޅި ކޭބަލް އޮތީ އަޑިން ނަގާފައި،" މުހައްމަދު ނަސީހު ވިދާޅުވި އެވެ.
ވޭމަންޑޫގެ ކަރަންޓް ކޭބަލްތަކަށް ގެއްލުން ލިބިފައިވާތީ އެކަން ސަރުކާރުގެ ކަމާ ބެހޭ ފަރާތްތަކާއި ވެސް ހިއްސާ ކޮށްފައިވާ ކަން ނަސީހު ފާހަގަކުރެއްވި އެވެ. ނަމަވެސް އެކަމަށް އަދިވެސް ހައްލެއް ލިބިފައިނުވާ ކަމަށް އޭނާ ވިދާޅުވި އެވެ.
ވޭމަންޑޫގެ ޑިސްޓްރިބިއުޝަން ފޮއްޓެއްގައި އަލިފާން ރޯވެ ރަށުގެ ބަޔަކުން ކަރަންޓް ކެނޑިފައިވާއިރު އެ މައްސަލަ ހައްލު ކުރުމަށް މުޅި ރަށުން ކަރަންޓް ކަނޑާލުމަށް ހަމަޖެހިފައިވާ ކަމަށް އެ ރަށު ކައުންސިލުން ވަނީ ބުނެފައެވެ. އަދި މައްސަލަ ހައްލުކުރެވުނުހާ އަވަހަކަށް ކަރަންޓް ދޭނެ ކަމަށް ވެސް ކައުންސިލުން ބުންޏެވެ.