04 Aug 2019, 01:39
ޕާސްޕޯޓު ހިފަހައްޓާފައި ވަނިކޮށް ފިލަން މަސައްކަތް ކުރި ކުރީގެ ނައިބު ރައީސް އަހުމަދު އަދީބު އަބްދުލް ޣަފޫރު ދިރިއުޅުއްވާ އެޕާޓްމަންޓް ބަލާ ފާސް ކުރީ އޭނާ ފިލި މައްސަލައިގެ ހެއްކާ ގަރީނާ ހޯދަން ކަން "ސަން" އަށް ކަށަވަރުވެއްޖެ އެވެ.
ޓަގް ބޯއްޓުގައި ފިލައިގެން ދިއުމުގެ ކުރިން އަދީބު ދިރިއުޅުއްވީ ގ.ހުމަށި ނުވަވަނަ ފަންގިފިލާގައި ހުންނަ އެޕާޓްމެންޓެއްގަ އެވެ.
އަދީބު ފިލައިގެން ދިޔަ މައްސަލައާ ގުޅިގެން ފުލުހުން ވަނީ، އޭނާ ދިރިއުޅޭ ގ. ހުމަށި، ގޭގެ ނުވަ ވަނަ ފަންގިފިލާ ބަލާ ފާސް ކުރުމަށް ކޯޓު އަމުރަކާއެކު މިރޭ 11:15 އެހާކަށް އެ އަޕާޓްމަންޓަށް ވަދެފައެވެ. ފުލުހުންގެ އިންވެސްޓިގޭޓިވް އޮފިސަރުންނާއި ފޮރެންސިކް އެ ގެއިން ނިކުމެފައިވަނީ މިރޭ ދަންވަރު 12:30 އެހާކަށް ހާއިރު އެވެ.
"ސަން" އަށް އެނގިފައިވާ ގޮތުގައި އަދީބު ފިލައިގެން ދިޔަ މައްސަލައިގެ ހެއްކާ ގަރީނާ ހޯދުމަށް އަދީބު ދިރިއުޅޭ އެޕާޓްމަންޓް ބަލާ ފާސްކުރުމަށް ކޯޓު އަމުރު ނެރެފައި ވަނީ ހަތް ގަޑި އިރުގެ މުއްދަތަކަށެވެ.
މިކަމާ ގުޅޭގޮތުން ފުލުހުންގެ ރަސްމީ ބަހެއް އަދި ލިބިފައި ނުވެއެވެ.
ދެ ގަޑިއިރެއްހާއިރު ވަންދެން އަދީބުގެ އެޕާޓްމަންޓް ފުލުހުން ބަލާ ފާސްކުރިއިރު، އެތަން އެއްވެސް އެއްޗެއް ގެންދިޔަ ކަމެއްވެސް ކަށަވަރެއް ނުވެއެވެ. ކޮތަޅުތަކަށް އެއްޗެއް އަޅައިގެން އެޕާޓްމަންޓުން އެއްޗެއް ގެންދިޔަތަނެއް އެތާގައި ތިބި ނޫސްވެރިންނަކަށް ނުފެނެއެވެ.
އަދީބުގެ އެޕާޓްމަންޓް ބަލާ ފާސްކޮށްފައިވަނީ، ސިންގަޕޫރުގައި ހުންނެވުމަށް ފަހު މިއަދު ރާއްޖެ ވަޑައިގެންނެވި އޭނާގެ އަނބިކަބަލުން މަރިޔަމް ނަޝްވާގެ ހާޒިރުގައެވެ. މީގެ އިތުރުން އެޕާޓްމަންޓް ފުލުހުން ބަލާ ފާސް ކުރި އިރު، އަދީބުގެ ގާނޫނީ ވަކީލަކާއި އޭނާގެ ގާތް އެކުވެރިޔަކު ވެސް އެ އެޕާޓްމަންޓުގައި ހަރަކާތްތެރިވަމުން ދިޔައެވެ.
އަދީބު ޓަގް ބޯޓެއްގެ ފަޅުވެރިއަކަށް ހެދިގެން ރާއްޖެއިން ފިލައިގެން ދަނިކޮށް އިންޑިއާގެ ޓުޓިކޮރިންގެ ކަނޑުގެ ސަރަހައްދުން އެ ގައުމުގެ ފުލުހުން އޭނާ ހުއްޓުވީ މިދިޔަ ބުރާސްފަތި ދުވަހު ހެނދުނުއެވެ. އަދި އެއަށް ފަހު މިއަދުގެ ވަގުތެއްގައި އަދީބު ވަނީ ދިވެހި ފުލުހުންނާ ހަވާލުކޮށްފަ އެވެ.
ފުލުހުން ބުރާސްފަތި ދުވަހު ނެރުނު ނޫސް ބަޔާނުގައި ބުނީ، އަދީބު ފިލުމަށް އޭހީތެރިވި މީހުންނާމެދު ފިޔަވަޅު އަޅާނެ ކަމަށެވެ. އަދީބު ރާއްޖެއިން ފިލައިގެން ދިޔައީ، ފުލުހުންގެ ތަހުގީގަށް ފުލުހުންގެ އިދާރާއަށް ހާޒިރުވުމަށް މިދިޔަ ބުދަ ދުވަހު އޭނާއަށް އަންގާފައިވަނިކޮށެވެ.
ޕްރޮސެކުއުޓާ ޖެނެރަލް އައިޝަތް ބިޝާމް ރޭ "ސަން" އަށް ވިދާޅުވީ، އަދީބު ފިލައިގެން ގޮސްފައިވަނީ އޭނާގެ އިސްތިއުނާފީ މައްސަލަ ނިމެންދެން ބަންދުގެ އަމުރަކަށް އެދިފައިވަނިކޮށް ކަމަށެވެ. ބިޝާމް ވިދާޅުވީ، ޖޫން މަހު ދެ ވަނަ ދުވަހު ޕީޖީން އެ އަމުރު ނެރެދިނުމަށް އެދުނުނަމަވެސް ސުޕްރީމް ކޯޓުން އެ އަމުރު ނެރެދީފައި ނުވާ ކަމަށެވެ.
އެކި އެކި ތުހުމަތުތަކުގައި އަދީބުގެ މައްޗަށް ޝަރުއީ ކޯޓުތަކުން 33 އަހަރުގެ ޖަލު ހުކުމްތަކެއް އިއްވި އެވެ. ނަމަވެސް އެހުކުމްތައް ވަނީ ފަހުން ބާތިލް ކޮށްފައެވެ. އެ ހުރިހާ ހުކުމެއްގެ ތެރެއިން ކޯޓު މަރުހަލާގައި އޮތީ އެންމެ ހުކުމެކެވެ.
އެއީ ޅ. މާބިންހުރާގައި ޓޫރިސްޓް ރިސޯޓެއް ތަރައްގީ ކުރުމަށް ކުއްޔަށްދިން ކުރެއްދޫ ހޯލްޑިންގްސް އިން އެމްއެމްޕީއާރްސީއަށް ދިން އެއް މިލިއަން ޑޮލަރަށް ހިޔާނާތްތެރިވި މައްސަލައިގައި އަދީބަށް އިއްވި އަށް އަހަރުގެ ޖަލު ހުކުމް ބާތިލު ކުރި މައްސަލަ ދައުލަތުން އިސްތިއުނާފު ކުރި މައްސަލައެއެވެ. އެ މައްސަލަ އޮތީ ސުޕްރީމް ކޯޓުގައެވެ. އިސްތިއުނާފީ މައްސަލައިގައި ގޮތެއް ކަނޑައަޅަން ދެން ޖޫން، 24 ވަނަ ދުވަހު ސުޕްރީމް ކޯޓުން އޭނާގެ ޕާސްޕޯޓު ހިފެހެއްޓި އެވެ.
ޕާސްޕޯޓު ހިފަހައްޓާފައި ވަނިކޮށް އަދީބު ފިލުމުން ފުލުހުންނަށާއި ކަމާ ގުޅުން ހުރި މުއަސަސާތަކަށް އާންމުގެ ފާޑުކިޔުންވެސް ވަނީ އަމާޒުވެފައެވެ. އަދީބު މާލެ ގެނެވޭ ވަރު ވަނީ މިރޭ ފަތިހު ކަމަށް ލަފާ ކުރެވެއެވެ.