03 Aug 2019, 21:58
ވޮޝިންޓަން (އޮގަސްޓް 3) : އެމެރިކާގެ ޖާސޫސީ ކަންތައްތަކާބެހޭ ގައުމީ އިދާރާގެ ވެރިޔާ ގެ މަގާމަށް ރައީސް ޑޮނަލްޑް ޓްރަމްޕް އިޚްތިޔާރު ކުރެއްވި ޖޯން ރެޓްކްލިފް ގެ ނަން އަނބުރައި ގެންދެވުމަށް ޓްރަމްޕް ނިންމަވައިފިއެވެ.
ޓްރަމްޕް ކުރެއްވި ޓްވީޓެއްގައި ވިދާޅުވީ ރެޓްކްލިފްގެ ނަން އަނބުރައި ގެންދަވަން ނިންމެވީ އޭނާއަކީ އެމެރިކާގެ ޖާސޫސީ ކަންތައްތަކާބެހޭ ގައުމީ އިދާރާގެ ވެރިޔާ ގެ މަގާމަށް ކުފޫ ހަމަނުވާ ބޭފުޅެއް ކަމަށް ސިފަކޮށް އެމެރިކާގެ ޚަބަރު ފަތުރާ ވަސީލަތްތަކުން އޭނާއަށް ދިން ހަރުކަށި ބަހުގެ ހަމަލާތަކާ ގުޅިގެން ކަމުގައެވެ. އެމެރިކާގައި ވެރިކަންކުރާ ރިޕަބްލިކަން ޕާޓީ އަށް ނިސްބަތްވެ ވަޑައިގަންނަވާ ކޮންގްރެސް މެންބަރެއްގެ ގޮތުގައި ހުންނެވި ރެޓްކްލިފަށް އެމެރިކާގެ މީޑިއާ ތަކުގެ ހަމަލާތައް ރައްދުވީ އޭނާއަކީ އެދާއިރާގެ ތަޖްރިބާ ނެތް ބޭފުޅެއް ކަމަށް ސިފަކޮށެވެ.
ޓްރަމްޕް ވިދާޅުވީ އެމެރިކާގެ މީޑިއާ ތަކުން ރެޓްކްލިފްއަށް ވަރަށް "ވަރުކޮށްލައިފި" ކަމަށާ އެހެންކަމުން މިހާރު އެމަގާމާ ހަވާލުވެ ވަޑައިގަންނަވަން ޚުދު ރެޓްކްލިފް ވެސް ބޭނުންފުޅު ނުވާކަމުގައެވެ. އެމެރިކާގެ ޖާސޫސީ ކަންތައްތަކާބެހޭ ގައުމީ އިދާރާގެ ވެރިޔާ ގެ މަގާމު ހުސްވީ އެމަގާމުގައި ހުންނެވި ޑެނިއަލް ކޯޓްސް މަގާމުން ވަކިވެ ވަޑައިގަންނަވާތީއެވެ.
އަންނަ އޮގަސްޓް މަހުގެ 15 ވަނަދުވަހު މަގާމުން ވަކިވެވަޑައިގަންނަވާކަން ކޯޓްސް ވަނީ ދާދިފަހުން ހާމަކުރައްވާފައެވެ. އަދި ޓްރަމްޕްވެސް ވަނީ އެކަން ކަށަވަރުކޮށް ދެއްވާފައެވެ. ޓްރަމްޕްއާއި ކޯޓްސްއަކީ ޖާސޫސީ އެކި މައްސަލަތަކުގައި ވަރަށް ބޮޑަށް ޚިޔާލުތަފާތުވާ ދެ ބޭފުޅުންނެވެ. ޚާއްސަކޮށް ރަޝިޔާއާއި އުތުރު ކޮރެޔާއާ އީރާނާ ގުޅުންހުރި މައްސަލަތަކުގައި ދެބޭފުޅުންގެ ދެބަސްވުންތައް ބޮޑުވެގެން ދިޔުމުން މަގާމުގައި ދެމިހުންނަވަން ކޯޓްސް އަށް ދަތިވެފައިވާތާ އެތަށް ދުވަހެއް ވެއްޖެކަމަށް ރިޕޯޓްތައް ބުނެއެވެ.
ކޯޓްސްގެ ބަދަލުގައި އެމަގާ ހަވާލުކުރައްވާ ގޮތަށް ޓްރަމްޕް ހަމަޖެއްސެވީ ކޮންގްރެސްގެ ރިޕަބްލިކަން މެންބަރު ޖޯން ރެޓްކްލިފް ކަމަށް ވިޔަސް އެމެރިކާގެ މީޑިއާގެ ހަމަލާތައް ރެޓްކްލިފަށް އަމާޒުވުމުން ޓްރަމްޕް ވަނީ މުޅިން އައު ބޭފުޅަކު އެމަގާމަށް އިޚްތިޔާރު ކުރައްވާނެ ކަމަށް ވިދާޅުވެފައެވެ.
އެމެރިކާގެ ޖާސޫސީ ކަންތައްތަކާބެހޭ ގައުމީ އިދާރާއަކީ 2001 ވަނަ އަހަރު އުފެއްދި އިދާރާއެކެވެ. އެއިދާރާގެ މެންޑޭޓްގެ ތެރޭގައި އެމެރިކާގެ ޖާސޫސީ އިދާރާތަކުގެ ގޮތުގައި ހިންގާ ސަތާރަ މަރުކަޒު ބެލެހެއްޓުން ހިމެނެއެވެ. މި ސަތާރަ މަރުކަޒުގެ ތެރޭގައި ޖާސޫސީ ކަންތައްތަކާބެހޭ އެމެރިކާގެ މަރުކަޒީ އިދާރާ ސީއައިއޭ ވެސް ހިމެނެއެވެ.
މަގާމުން އިސްތިއުފާ ދެއްވުމުގެ ގޮތުން ކޯޓްސް ޓްރަމްޕަށް ހުށަހެޅުއްވި ސިޓީގައި ކޯޓްސް ވަނީ އޭނާގެ ބެލުމުގެ ދަށުން އެމެރިކާގެ ޖާސޫސީ އިދާރާގެ ކަންކަން ކުރިއަށްވުރެ އެތައް ގުނައެއް ހަރުދަނާވެ ފުރިހަމަވެފައިވާކަން ހާމަކުރައްވައި އެކަމާމެދު އުފާކުރައްވާ ކަމަށް ވިދާޅުވެފައެވެ. އަދި މަގާމުން އިސްތިއުފާ ދެއްވީ އުމުރުން ދުވަސްވެފައި ވުމާއެކު އަމިއްލަ ނަފްސަށާއި ދިރިއުޅުއްވުމުގެ ކަންތައްތައް އިސްކަން ދެއްވުމުގެ ގޮތުން ކަމަށްވެސް ކޯޓްސް ވިދާޅުވެފައިވެއެވެ. (ނޫސްއެޖެންސީތައް)