02 Aug 2019, 18:20
އިންޑިއާގައި އާސަންދަ ލިބުމުގައި ދިމާވި މައްސަލަތައް ހައްލުކުރަން މަސައްކަތް ފަށައިފިއެވެ.
އާސަންދަ ކުންފުނިން މިއަދު ނެރުނު ބަޔާނުގައި ބުނީ އާސަންދައިގެ ހިދުމަތް އިންޑިއާގެ ކޮޗިން އާއި ޓްރިވެންޑްރަމްގައި ހުންނަ ހޮސްޕިޓަލްތަކުގައި ހިދުމަތް ފޯރުކޮށްދެނީ ތާޑް ޕާޓީ އެޑްމިނިސްޓްރޭޝަން (ޓީޕީއޭ) މެދުވެރިކޮށް ކަމަށެވެ.
އެހެން ނަމަވެސް ޓީޕީއޭގެ އިތުރު އިޝާރާތެއް ނެތި އާސަންދައިގެ ހިދުމަތްތައް އިތުރަށް ކުރިއަށް ނުގެންދެވޭނެ ކަމަށް އެ ހޮސްޕިޓަލްތަކަށް އެންގި ކަމަށާއި ހިދުމަތަށް ބުރޫ އެރީ އޭގެ ސަބަބުން ކަމަށްވެސް އާސަންދައިން ބުންޏެވެ.
އާސަންދައިން އިތުރަށް ބުނީ ހިދުމަތް ލިބުމުގައި ދަތިތައް ދިމާވި ޓްރިވެންޑްރަމްގައި ހުންނަ އާނަންތަޕޫރީ، ޗައިތަންޔާ، އާރުސީސީ އަދި ކިމްްސް ހޮސްޕިޓަލްގެ އިތުރުން ކޮޗިންގައި ހުންނަ އަމްރިތާ ހޮސްޕިޓަލުން މިހާރު ހިދުމަތް ލިބޭނެ ކަމަށެވެ.
އިންޑިއާގެ ހޮސްޕިޓަލްތަކުން އާސަންދައިގެ ހިދުމަތް ކަނޑާލުމުން އިންޑިއާއަށް ބޭސްފަރުވާއަށް ގޮސްތިބި ގިނަ އަދަދެއްގެ ދިވެހިންނަށް ބޭސްފަރުވާ ކުރުމުގައި ވަނީ ގޮންޖެހުންތައް ކުރިމަތިވެފައެވެ. އަދި ހޮސްޕިޓަލްތަކުން ފަރުވާ ދެވޭނީ އަމިއްލައަށް ފައިސާ ދީގެން ކަމަށްވެސް އެ ހޮސްޕިޓަލުތަކުން ވަނީ ބުނެފައެވެ.
ސަން އާ ވާހަކަ ދެއްކި މީހަކު ބުނީ އެނާގެ އާއިލާ އާއެކު އިންޑިއާ އަށް ބޭސްފަރުވާ އަށް ގޮސް މިދިޔަ ބުދަ ދުވަހު ފަރުވާ ނިމުނުއިރު އާސަންދަ އިން ހުރިހާ ކަމެއް ހަމަޖެހުނު ކަމަށެވެ. ނަމަވެސް އިއްޔެ އޮޕަރޭޝަނެއް ކުރަން ތައްޔާރުވެފައި އޮތް އެހެން ދިވެއްސެއްގެ އޮޕަރޭޝަން ކުރުން ފަސްވެފައިވާ ކަމަށާއި އެއީ އާސަންދަ ހިދުމަތް ނުލިބޭތީ ކަމަށް އޭނާ ބުންޏެވެ.