30 Jul 2019, 22:59
ބޭންކް އޮފް މޯލްޑިވްސް (ބީއެމްއެލް)ގެ ހިއްސާ އަކަށް 24 ރުފިޔާ ބަހަން ފާސްކޮށްފި އެވެ.
މިރޭ ހޮޓެލް ޖެންގައި ބޭއްވި އެ ބޭންކުގެ އަހަރީ އާންމު ޖަލްސާގައި، ކުންފުނީގެ ހިއްސާ އަކަށް 24 ރުފިޔާ ބަހަން ފާސްކޮށްފައިވާ އިރު، މިއީ 2018 ވަނަ އަހަރު ލިބުނު ފައިދާގެ ތެރެއިން 129.16 މިލިއަން ރުފިޔާ އެވެ.
ބީއެމްއެލް އަށް 2018 ވަނަ އަހަރު ފައިދާގެ ގޮތުގައި 1.6 ބިލިއަން ރުފިޔާ ލިބުނެވެ. މިއީ 2017 ވަނަ އަހަރާ އަޅާބަލާއިރު 13 ޕަސެންޓް އިތުރު އަދަދެކެވެ.
ހޮޓެލް ޖެންގައި މިރޭ ބޭއްވި ބީއެމްއެލްގެ އަހަރީ އާންމު ޖަލްސާގެ ތެރެއިން --- ސަން ފޮޓޯ/ ފަޔާޒު މޫސާ
ދެހާސް ސަތާރަވަނަ އަހަރަށްވުރެ 2018 ވަނަ އަހަރު ހިންގުމުގެ ޚަރަދު ބޮޑުވި ނަމަވެސް ފައިދާގެ ތެރެއަށް އެއްފަހަރާ ގަނޑުކޮށް ލިބޭ އާމްދަނީ ނުހިމަނައި ވަރަށް ބޮޑު ފައިދާއެއް ހޯދުނުކަމަށް ބީއެމްއެލްއިން ބުންޏެވެ.
ބޭންކުން ވަނީ މިދިޔަ އަހަރު ހިއްސާގެ ފައިދާ އާއި ޓެކުހުގެ ގޮތުގައި 390 މިލިޔަން ރުފިޔާ ދައުލަތަށް ދައްކައިފަ އެވެ.
ހޮޓެލް ޖެންގައި މިރޭ ބޭއްވި ބީއެމްއެލްގެ އަހަރީ އާންމު ޖަލްސާގައި ސީއީއޯ ހިމޮތީ ސޯޔާ ވާހަކަ ދައްކަވަނީ --- ސަން ފޮޓޯ/ ފަޔާޒު މޫސާ
ބޭންކުގެ އާ ސީއީއޯ ހިމޮތީ ސޯޔާ ވިދާޅުވީ ބެންކުގެ ރެކޯޑް ފައިދާއަކުން ހިއްސާ ދާރުންނަށް ފައިދާ ބެހުމަކީ އުފަލެއް ކަމަށެވެ.