29 Jul 2019, 18:50
ބޭންކް އޮފް މޯލްޑިވްސް (ބީއެމްއެލް)ގެ ބޯޑަށް ސަރުކާރުގެ ފަރާތުން ހަމަޖައްސާ ޑިރެކްޓަރުންގެ ތެރޭގައި ހިމެނޭ އެ ބޭންކްގެ ޑެޕިއުޓީ ސީއީއޯ، މުހައްމަދު ޝަރީފްގެ ނަން ސަރުކާރުން އަނބުރާ ގެންގޮސްފި އެވެ.
ބީއެމްއެލްގެ މިދިޔަ އަހަރުގެ އަހަރީ އާންމު ޖަލްސާ މާދަމާ ރޭ ބާއްވާ އިރު، ކުރިއަށް އޮތް އަހަރަށް ސަރުކާރުގެ ފަރާތުން ބޭންކްގެ ބޯޑަށް ހަމަޖައްސަން ހުށަހެޅި ހަތް ނަމުގެ ތެރޭގައި ޝަރީފްގެ ނަން ވަނީ ހިމެނިފަ އެވެ. މިދިޔަ އަހަރުގެ ނޮވެމްބަރުން ފެށިގެން ޑެޕިއުޓީ ސީއީއޯގެ ހައިސިއްޔަތުން ބޭންކުގެ ހިންގުމާ ހަވާލުވެ ހުންނެވި، ޝަރީފްއަކީ މިހާރުވެސް ބީއެމްއެލްގެ ބޯޑް ޑިރެކްޓަރެކެވެ.
ސަރުކާރުގެ އިސް އޮފިޝަލަކު ޔަގީންކަން ދެއްވި ގޮތުގައި، ބީއެމްއެލްގެ ޑިރެކްޓަރުންގެ ބޯޑަށް ހަމަޖައްސަން ހުށަހެޅި ބޭފުޅުންގެ ނަންތަކުގެ ތެރެއިން ޝަރީފްގެ ނަން މިހާރު ވަނީ އަނބުރާ ގެންގޮސް، އެކަން ބޭންކަށް ވެސް އަންގައިފަ އެވެ.
"އާ ބޭފުޅެއްގެ ނަން އަދި ފޮނުވާފައެއް ނުވޭ. ޝަރީފްގެ ނަން އަނބުރާ ގެނައީ،" ނަން ނުޖަހާ ގޮތަށް ވާހަކަ ދެއްކެވި ސަރުކާރުގެ އޮފިޝަލް ވިދާޅުވި އެވެ.
އެހެން ނަމަވެސް އެކަމާ ގުޅޭ ގޮތުން ބޭންކްގެ ބަހެއް ލިބޭ ގޮތެއް ނުވި އެވެ.
ބޭންކްގެ ބޯޑަށް ދެން ހުށަހެޅި ނަންތައް:
1- ޓިމޮތީ ސޯޔާ، ޓިމް- ބޭންކްގެ އާ ސީއީއޯ
2. ޖުވައިރިޔާ ސައީދު، މއ. ކޮށީގެ، މާލެ
3. ޘަނާ މަންސޫރު، މއ. މަނަސް، މާލެ
4. ނަޖީމް އިބްރާހީމް ޒަކަރިއްޔާ، މ. ދާޝިން، މާލެ
5. ހައްވާ ސަފުނާ، ހ. ވައިފިލާގެ، މާލެ
6. ހުސައިން ތައުފީގު އަލީ، މ. މުއިރި، މާލެ
ބޭންކްގެ ބޯޑަށް ސަރުކާރުގެ ފަރާތުން ހަމަޖައްސަން ފޮނުއްވި ބޭފުޅުން (ކ-ވ) ޖުވޭރިޔާ، ޘަނާ މަންސޫރު، އާ ސީއީއޯ ޓިމް، ސަފުނާ، ތައުފީގު އަދި ނަޖީމް.
ޝަރީފްގެ ނަން ޑިރެކްޓަރުންގެ ބޯޑުން އަނބުރާ ނެގި ނަމަވެސް، ބޭންކުގެ ޑެޕިއުޓީ ސީއީއޯގެ މަގާމުން އަދި އޭނާ ވަކިކޮށްފައެއް ނުވާކަން ވަނީ ޔަގީންވެފަ އެވެ.
އެމްއެމްޕީއާރުސީގެ ބޮޑު ހިޔާނާތުގެ މައްސަލައިގައި ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވާހަކަ ދައްކަވަމުން، ޝަރީފް ތެދު ނޫން މައުލޫމާތުތަކެއް ދެއްވި ކަމަށް ތުހުމަތުވެ، މަޖިލީހުން އެ މައްސަލަ ފުލުހަށް ހުށަހެޅުމުން ވަނީ އޭނާގެ މައްޗަށް ތަހުގީގެއް ވެސް މިހާރު ފަށައިފަ އެވެ.
އެމްއެމްއެމްޕިއާރުސީއަށް ލިބުނު "ނަން ނެގޯޝިއަބުލް" އެއްވެސް ޗެކެއް އެންޑޯސްކޮށްގެން، އެސްއޯއެފްގެ އެކައުންޓަށް ބީއެމްއެލްއިން ޖަމާކޮށްދީފައި ނުވާނެ ކަމަށް ޝަރީފް މަޖިލީހުގެ ކޮމިޓީގައި ވިދާޅުވި ކަމަށް މަޖިލީހުގެ އިދާރާއިން ބުނެ އެވެ.
އެހެން ނަމަވެސް، އެސެޓް ރިކަވަރީ ކޮމިޝަނުން މަޖިލީހަށް ފޯރުކޮށްދިން މައުލޫމާތުތަކުން ހާމަވެފައިވާ ގޮތުގައި ނަން ނެގޯޝިއަބުލް ޖަހައި ކުރޮސްކޮށްފައިވީ، ނަމަވެސް ހަ ޗެކެއް އެންޑޯސްކޮށްގެން ވަނީ އެސްއޯއެފްގެ އެކައުންޓަށް ޖަމާކޮށްދީފަ އެވެ.
ބީއެމްއެލްއިން ބުނެފައި ވަނީ "ނަން ނެގޯޝިއަބުލް" ޖަހައި ކްރޮސްކޮށްފައި ވަނިކޮށް އެޗްއެސްބީސީގެ ޗެކުތަކެއް އެމްއެމްޕީއާރުސީއިން އެންޑޯސްކޮށްގެން އެސްއޯއެފްގެ އެކައުންޓަށް ޖަމާކޮށްދީފައިވާ މައްސަލަ ބޭންކްގެ ސަމާލުކަމަށް އައިސްފައިވާ ކަމަށެވެ. އަދި އެ ޗެކްތަކުގެ އަސްލު އެޗްއެސްބީސީ މެދުވެރިކޮށް ހޯދައިގެން އެ މައްސަލަ ބޭކުން ތަހުގީގު ކުރަމުން އަންނަ ކަމަށް ވެސް ބުނެފައިވެ އެވެ.