28 Jul 2019, 13:23
މާލޭގައި މިދިޔަ ހަފްތާ މަގުމަތީގެ 50 އެކްސިޑެންޓު ހިނގި ކަމަށް ފުލުހުންގެ ތަފާސް ހިސާބުތައް ދައްކައިފި އެވެ.
ފުލުހުން އާންމުކޮށްފައިވާ ޓްރެފިކް މެނޭޖުމެންޓް ޑިޕާޓްމެންޓުގެ ތަފާސްހިސާބުތައް ދައްކާގޮތުން މިދިޔަ ހަފްތާ ހިނގި 50 އެކްސިޑެންޓުގައި 15 މީހަކަށް ވަނީ އެކި ވަރުގެ އަނިޔާވެފަ އެވެ. އެކްސިޑެންޓުތަކާ ގުޅިގެން ފަސް މީހެއްގެ ލައިސެންސްވެސް ފުލުހުން ވަނީ ހިފަހައްޓައިފަ އެވެ.
މިދިޔަ ހަފްތާގެ ތަފާސްހިސާބުތަކަށް ބަލާއިރު ފުލުހުން ވަނީ 250 ވެހިކަލެއްގައި ސްޓިކާ ޖަހާ، 43 ވެހިކަލް ޓޯ ކޮށްފަ އެވެ. މި މުއްދަތުގައި 220 އުޅަނދެއް ބަލާ ފާސްކޮށްފައިވާ ކަމަށްވެސް ފުލުހުން ބުންޏެވެ.
މި މުއްދަތުގައި ދުއްވަން ކަނޑައަޅާފައިވާ ސްޕީޑަށްވުރެ ބާރަށް ދުއްވި 55 މައްސަލައަކާއި އަށާރަ އަހަރުން ދަށުގެ ކުދިން އިންޖީނުލީ ދުއްވާ އެއްޗެހި ދުއްވި ދެ މައްސަލައެއްވެސް ފުލުހުންވަނީ ފާހަގަކޮށްފަ އެވެ.
މީގެ އިތުރުން ޓްރެފިކް ނިޝާންތަކަށް ނުބަލާ ދުއްވި 13 މައްސަލައަކާއި އަތުގައި ލައިސެންސް ނެތި ދުއްވި 66 މައްސަލައެއްގެ އިތުރުން އެއްގޮތަކަށްވެސް ލައިސެންސް ނެތް މީހުން ދުއްވާ އެއްޗެހި ދުއްވި 109 މައްސަލައެއްވެސް ފުލުހުން ވަނީ ފާހަގަކޮށްފަ އެވެ.