14 Jul 2019, 00:12
ރާއްޖޭގެ ގާނޫނީ ދާއިރާގެ ކުރިއެރުވުމަށް ބާ ކައުންސިލް މަސައްކަތް ކުރާނެ ކަމުގެ ފުރިހަމަ ޔަގީންކަން އެބައޮތް ކަމަށް ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރައީސް މިހެން ވިދާޅުވެފައިވަނީ، ގާނޫނީ ވަކީލުންގެ ކަންކަން ބެލެހެއްޓުމަށް ރާއްޖޭގައި ފުރަތަމަ އުފެއްދި ބާ ކައުންސިލަށް އިންތިހާބްވެވަޑައިގަތް ފަރާތްތަކަށް މަރުހަބާ ދަންނަވައި ކުރެއްވި ޓްވީޓެއްގަ އެވެ.
އެގޮތުން ބާ ކައުންސިލްގެ ފުރަތަމަ ރައީސަކަށް އިންތިހާބްވެވަޑައިގަތް މައުމޫން ހަމީދާއި ކައުންސިލްގެ އެހެން މަގާމްތަކަށް އިންތިހާބްވެވަޑައިގަތް މެންބަރުންނަށް ރައީސް ވަނީ ތަހުނިޔާ ދަންނަވާފަ އެވެ.
"އަދި ރާއްޖޭގެ ގާނޫނީ ދާއިރާގެ ކުރިއެރުމަށް ބާ ކައުންސިލް މަސައްކަތް ކުރައްވާނެ ކަމުގެ ފުރިހަމަ ޔަގީންކަން އެބައޮތް،" ރައީސްގެ ޓްވީޓްގައި ވިދާޅުވި އެވެ.
މިއަދު ކުރިއަށް ގެންދިޔަ ބާ ކައުންސިލްގެ އިންތިހާބްގައި ރައީސްގެ މަގާމަށް އިންތިހާބްވެ ވަޑައިގަތީ މަޝްހޫރު ގާނޫނީ ވަކީލް މައުމޫން ހަމީދެވެ. މައުމޫން ހަމީދު އިންތިޚާބު ކާމިޔާބު ކުރެއްވީ ކުރީގެ ބަންޑާރަ ނައިބު ހުސްނުއްސުއޫދުއާ ވާދަކުރައްވަ އެވެ.
ބާ ކައުންސިލްގެ ނައިބު ރައީސްގެ މަގާމަށް ވާދަ ކުރެއްވި ސިވިލް ކޯޓުގެ ކުރީގެ ގާޒީ މުހައްމަދު ހަލީމް ބޮޑުތަފާތަކުން ބަލި ކުރެއްވުމަށްފަހު އިންތިޚާބު ކާމިޔާބު ކުރެއްވީ ކުރީގެ ބަންޑާރަ ނައިބް އަބްދުﷲ މުއިއްޒެވެ.
ބާ ކައުންސިލު ވުޖޫދުވުމަށް ފަހު ގާނޫނީ ވަކީލުންނަށް ވަކީލުކަމުގެ ހުއްދަ ދިނުމާއި ވަކީލުންނާއި ގުޅުން ހުރި ހުރިހާ ކަމެއް ނިންމާނީ އެ ކައުންސިލުން ކަމަށް ގާނޫނުގައި ބުނެފައިވެ އެވެ.