10 Jul 2019, 10:55
ޖިންސީ ފުރައްސާރަ ކުރުމަކީ ވިސްކް ބްލޯ ކުުރެވޭ ކަމެއްގެ ގޮތުގައި ހިމެނުމަށް ވިސްލް ބްލޯ ކުރުމުގެ ބިލުގައި ހިމެނުމަށް ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފް ގޮވާލައްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ހަސަން ލަތީފް ވިދާޅުވީ ވިސްލް ބްލޯވިން ބިލު މަޖިލީހުން ފާސްވެ ގާނޫނަކަށް ވެގެންދާއިރު ޖިންސީ ފުރައްސާރައިގެ ވަހަކަ ވަކި ޕޮއިންޓެއްގެ ގޮތުގައި ހިމަނަން ޖެހޭ ކަމަށެވެ.
"މި މަޖިލީހުގައި ފާއިތުވި ދޮޅުމަހެއްހައި ދުވަހުގެ ތެރޭގައި އެތައްބައިވަރު ކަންކަމެއްގެ ވާހަކަ އަޑުއިވިއްޖެ. އެކި އެކި ކޮމެޓީތަކުގައި އަޅުގަނޑުމެން ކުރަމުންދާ މަސައްކަތުގައި، ޖިންސީ ފުރައްސާރަ ކުރުމާއި ޖިންސީ ގޯނާ ކުރުމަކީ އެއީ އާންމު ކަމެއްގެ ގޮތުގައި އެތައް ބައިވަރު މުވައްސަސާތަކެއްގައި ހިނގަމުންދާ ކަމުގެ މައުލޫމާތު މި މަޖިލީހުގެ ކޮމެޓީ ތަކުގައި މިހާރު ހުންނާނެ. އަޅުގަނޑު އެދެން މި ބިލުގައި ސާފު ކޮށް ބަޔާން ކުރުން، ޖިންސީ ފުރައްސާރަ ކުރުމާއި ޖިންސީ ގޯނާ ކުރުމަކީ އެއީ ވިސްލް ބްލޯ ކުރެވޭނެ ކަމެއްކަމުގައްޔާއި އަދި އެކަން ކުރާ ފަރާތަށް މި ގާނޫނުގެ ތެރެއިން ހިމާޔަތް ލިބެން،" ހަސަން ލަތީފް ވިދާޅުވި އެވެ.
އޭނާ ވިދާޅުވީ އެފަދަ ގިނަ ހާދިސާތަކުގެ ވާހަކަ މިހާރުވެސް ދެކެވިފައިވާ ކަމަށެވެ.
ވިސްލް ބްލޯވަރުންނަށް ރައްކާތެރިކަން ދިނުމުގެ ބިލު ރައްޔިތުންގެ މަޖިލީހަށް ހުށަހެޅުއްވީ ސަރުކާރުގެ ފަރާތުން ގަލޮޅު އުތުރުދާއިރާގެ މެންބަރު އީވާ އަބްދުﷲ އެވެ. ބިލުގައި ވާ ގޮތުން ގާނޫނީ ޒިންމާއެއް އާދަ ނުކުރުމުންނާއި އިންސާނީ ހައްގަކާއި ހިލާފުވުމުންވެސް މައުލޫމާތު ހާމަ ކުރެވޭނެ އެވެ.
ކޮރަޕްޝަނާއި ތިމާވެއްޓަށް ނުރައްކާވާ ކަންކަން ކުރުމާއި ދައުލަތުގެ މަގާމުގެ ނުފޫޒެއް ނާޖާޒު ގޮތުގައި ބޭނުން ކުރާނަމަ އެކަމުގެ މައުލޫމާތު ހާމަ ކުރުމަކީވެސް ވިސްލްބްލޯވް ކުރުން ކަމުގައި އެ ބިލުގައި ވަނީ ހިމަނައިފަ އެވެ.
ވިސްލްބްލޯ ކުރެވިދާނެ ފަރާތްތަކެއް ކަމަށް ބިލުގައި ބުނެފައިވަނީ ދައުލަތުގެ ފަރާތެއްގެ މުވައްޒަފެއް ނުވަތަ އަމިއްލަ ފަރާތެއްގެ މުވައްޒަފެއް ނުވަތަ އަމިއްލަ ނަމުގައި ދައުވާ ކުރުމާއި ދައުވާ ލިބިގަތުމުގެ ހައސިއްޔަތު ލިބިފައިވާ ގާނޫނީ އެއްވެސް ޝަހުސެކެވެ.
ކޮރަޕްޝަނުގެ މައްސަލަތައް އާންމުކުރާ ފަރާތްތަކަށް ގާނޫނީ ގޮތުން ގިނަ ހިމާޔަތްތަކެއް ލިބިދެވޭ ގޮތަށް ބިލު ވަނީ ފަރުމާކޮށްފައެވެ. އެގޮތުން މައުލޫމާތު ހާމަ ކޮށްގެން ވަޒީއިން ވަކި ކުރުމާއި ޒިންމާއިން އެކަހެރި ކުރުމާއި ގެއްލުންދިނުމާއި ބިރު ދެއްކުން ފަދަ ކަންކަން ނުކުރެވޭނެ ކަމަށް ބިލުގައި ވަނީ ބުނެފަ އެވެ.
މައުލޫމާތު ހާމަކުރާ ފަރާތްތަކުގެ ވަނަވަރު ސިއްރު ކުރުމަށްވެސް ބިލުގައި ވަނީ ބުނެފައެވެ. އެގޮތުން ނަމާއި އެޑްރެސް އުމުރު އަދި އާއިލާއާ ބެހޭ މައުލޫމާތު ސިއްރުކޮށްފައި ބާއްވަން ޖެހޭނެ ކަމަށް ބިލުގައި ބުނެފައިވެއެވެ. ވިސްލްބްލޯ ކުރާ ފަރާތުން ދޭ މައުލޫމާތަކީ އެފަރާތުން އެކަން ހިނގިކަން ސާބޮތުކޮށްދޭން ޖެހޭނެ ކަމެއް ނޫން ކަމަށްވެސް ބިލުގައި ވަނީ ބުނެފަ އެވެ.
ވިސްލްބްލޯ ކުރަން އުޅެގެން ނުވަތަ ކޮށްގެން އެކަން ހުއްޓުވަން ނުވަތަ އިންޒާރުދީ ހެދުމަކީ ގާނޫނީ ކުށެއްގެ ގޮތުގައި ބިލުގައި ވަނީ ހިމަނާފަ އެވެ. އެ ކުށުގެ އަދަބަކީ ފަސް އަހަރާއި ހަ މަސް ދުވަހާއި ދެމެދުގެ ޖަލު ހުކުމެކެވެ.