02 Jul 2019, 16:59
ގދ ވާދޫގައި ގެސްޓުހައުސް އެޅުމަށް ބިން ދޫކުރަން ނިންމައިފިއެވެ.
ޓޫރިޒަމް މިނިސްޓްރީ އިން އިއްޔެ ނެރުނު ބަޔާނެއްގައި ބުނީ ވާދޫ ގައި ލޯކަލް ޓޫރިޒަމް ތަރައްގީކޮށް ކުރިއެރުވުމަށް އެރަށުން 5000 އަކަފޫޓުގެ 16 ބިން ދޫކުރުމަށް ރައީސުލްޖުމްހޫރިއްޔާ ނިންމަވާފައިވާ ކަމަށެވެ.
އަވަސް މުސްތަގުބަލެއްގައި މި ބިންތައް ދޫކުރުމަށް އެރަށު ކައުންސިލާ ގުޅިގެން މަސައްކަތް ފަށާނެ ކަމަށްވެސް ޓޫރިޒަމްގެ ބަޔާނުގައި ބުންޏެވެ.
ވާދޫ އިން ލޯކަލް ޓޫރިޒަމަށް ބިން ދޫކުރުމާ ގުޅޭގޮތުން އެރަށު ކައުންސިލްގެ ރައީސް މުހައްމަދު ވަހީދު "ސަން" އަށް ވިދާޅުވީ ވާދޫ އަކީ ލޯކަލް ޓޫރިޒަމް ކުރިއެރުވުމަށް މުހިއްމު ރަށެއް ކަމަށެވެ. މަޝްހޫރު ބްލޫ ބޯލް ސާފިން ޕޮއިންޓުވެސް އޮންނަނީ ވާދޫ ކައިރީގައި ކަން ފަހަގަ ކުރައްވާ ވަހީދު ވިދާޅުވީ އަތޮޅުގެ ނިސްބަތުން އާސާރީ އަދި ތާރީހީ ތަންތަންވެސް އެރަށުގައި ގިނަ ކަމަށެވެ.
"ލޯކަލް ޓޫރިޒަމް މިރަށުގައި ކުރިއަށް ގެންދިޔުމަކީ މުހިއްމު ކަމެއް. ވަޒީފާގެ ފުރުސަތު ތައްވެސް އިތުރުވެގެންދާނެ މިކަމުގެ ސަބަބުން،" އޭނާ ވިދާޅުވީ އެރަށުގައި މިހާރުވެސް ގެސްޓްހައުސްއެއް ހިންގާ ކަމަށާއި އިތުރު ގެސްޓުހައުސްތައް ތަރައްގީކުރަމުންދާ ކަމަށެވެ.
"މިރަށް ކައިރީ ގިނަ ސަފާރީތައް އަޅާފައި އޮވޭ. ސަފާރީ ތަކުންވެސް މީހުން އާދޭ މިރަށަށް،" މުހައްމަދު ވަހީދު ވިދާޅުވީ ވާދޫ ކައިރީ ދެ އެއާޕޯތު ތަރައްގީކުރެވެމުންދާއިރު މުސްތަގުބަލުގައި ޓޫރިޒަމްގެ ހަބަކަށް އެ ރަށް ވާނެ ކަމަށެވެ.
ޓޫރިޒަމަށް ދޫކުރާ ބިންތައް ދޫކުރުން ދެ ފިޔަވައްސަކަށް ބަހާލައިގެން ކުރިއަށް ގެންދަން ވިސްނާ ކަމަށާއި ފުރަތަމަ ދޫކުރާ 16 ބިންވެސް ބީޗް ފްރަންޓުން ދޫކުރަން ނިންމާފައިވާ ކަމަށް ވާދޫ ކައުންސިލްގެ ރައީސް ވިދާޅުވިއެވެ.
"އިންވެސްޓަރުންގެ ޝައުގުވެރިކަން ހުރިގޮތަށް ބަލާ އިތުރު ތަންތަނުން ބިން ދޫކުރާނެ،"