30 Jun 2019, 19:13
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ނޫސްވެރިންނާ ބައްދަލު ނުކުރައްވާތާ ފަސް މަސްދުވަސް ވެއްޖެއެވެ.
ރައީސް ސޯލިހު އެންމެ ފަހުން ނޫސްވެރިންނާ ބައްދަލުކޮށް ސުވާލުތަކަށް ޖަވާބު ދެއްވާފައިވަނީ މިއަހަރުގެ ޖެނުއަރީ މަހުގެ 24 ވަނަ ދުވަހުއެވެ. އެއީ ވެރިކަމަށް ވަޑައިގެން ބޭއްވި ދެވަނަ ނޫސްވެރިންގެ ބައްދަލުވުމެވެ. ވެރިކަމަށް ވަޑައިގަތުމުގެ ކުރިން ރައީސް ސޯލިހު ވިދާޅުވެފައިވަނީ މީޑިއާއަށް ފިއްލަވައިގެން ނޫޅުއްވާނެ ކަމަށާއި ކޮންމެ މަހަކު އެއްފަހަރު ނޫސްވެރިންގެ ބައްދަލުވުން ބާއްވަވާނެ ކަމަށެވެ.
ރައީސް ސޯލިހު ނޫސްވެރިންގެ ބައްދަލުވުން ނުބާއްވާ ސަބަބާ ބެހޭ ގޮތުން ސުވާލު ކުރެއްވުމުން ރައީސް އޮފީހުގެ ތަރުޖަމާނު އިބްރާހިމް ހޫދު ވިދާޅުވީ މަސައްކަތްތައް ހުންނަ ގޮތުން ރައީސްއަށް ނޫސްވެރިންނާ ބައްދަލުނުކުރެވެނީ ކަމަށާއި އެހެން ސަބަބެއް ނެތް ކަމަށެވެ.
"މަސައްކަތްތައް ހުންނަ ގޮތުން ރައީސުލްޖުމްހޫރިއްޔާއަށް ނޫސްވެރިންނާ ބައްދަލު ނުކުރެއްވެނީ." ތަރުޖަމާނު ހޫދު ވިދާޅުވިއެވެ.
ވޭތުވެ ދިޔަ ފަސް މަސްދުވަސް ތެރޭގައިވެސް ރާއްޖޭގައި ގިނަ ބޮޑެތި ކަންތައްތަކެއް ހިނގުމާއި ސަރުކާރުގެ ކަންކަމާ ބެހޭ ގޮތުން ރައީސް ރައްޔިތުންނަށް މައުލޫމާތު ނުދެއްވާތީ ބައެއް މީހުން ވަނީ ސޯޝިއަލް މީޑިއާގައި ކަންބޮޑުވުން ފާޅުކޮށްފައެވެ.
އާންމުންގެ ކަންބޮޑުވުމަކީ ރައްޔިތުންނާ ގުޅުން ހުރި ކަންކަމުގައި ރައްޔިތުންގެ މަޖިލީހުން އާންމުންނަށް ޖަވާބުދާރީވަމުން ދާއިރު ކަންކަން އޮޅުއްފިލުވައި ދެއްވުމަށް ރައީސް ސޯލިހު މީޑިއާ ކުރިމައްޗަށް ވަޑައިނުގަންނަވާތީއެވެ.
ވޭތުވެދިޔަ ފަސް މަސްދުވަހުގެ ތެރޭގައި ރައީސް ސޯލިހު ޕަބްލިކްގައި ވާހަކަފުޅު ދައްކަވާފައި ވަނީ ރަސްމީ ޖަލްސާތަކުގައި ޕޯޑިއަމް ތަކުގައެވެ. އޭގެ އިތުރުން ފާހަގަކުރާ ހާއްސަ ދުވަސް ދުވަހާ ދިމާކޮށް ރައީސް އޮފީހުގެ ވެބްސައިޓުގައި ލިޔުމުން ހިތާބެއް އާންމު ކުރައްވައިގެންނެވެ.
ފަސް މަސްދުވަހުގެ ތެރޭގައި ހިނގާ ދިޔަ ކަންކަމުގެ ތެރޭގައި ރައީސް ސޯލިހު ނިސްބަތްވެވަޑައިގަންނަވާ އެމްޑީޕީއިން ރައްޔިތުންގެ މަޖިލީހުގެ ސުޕަ މެޖޯރިޓީއެއް ހޯދުން ހިމެނެއެވެ. އެކަމުގައިވެސް ރައީސް ސޯލިހު ނޫސްވެރިންނާ ބައްދަލުކުރައްވައި ސުވާލުތަކަށް ފުރުސަތު ދެއްވާފައެއް ނުވެއެވެ. އަދި ކޯލިޝަން ލީޑަރުންގެ މަޝްވަރާތައް ކުރިއަށް ނުދާ ސަބަބެއްވެސް އޮޅުން ފިލުވައެއް ނުދެއްވައެވެ.
ނިމިދިޔަ ކުރީގެ ރައީސް އަބްދުﷲ ޔާމީންގެ ވެރިކަމުގައިވެސް ނޫސްވެރިންނަށް ބައްދަލު ނުކުރައްވާ އާންމުންނަށް ސީދާ ރައީސް ކަންކަން އޮޅުންފިލުވައި ނުދެއްވުމަކީ ގިނަ ބަޔަކު ވަރަށް ބޮޑަށް ހިތްހަމަ ނުޖެހުން ފާޅުކުރި ކަމެކެވެ.