21 Jun 2019, 17:00
ހަނދާންނެތިގެން ފިހާރައެއްގެ ކައުންޓަރު މަތީގައި މީހަކަށް ބޭއްވުނު ވޮލެޓަކުން ވިޔަފާރިކުރި ދެމަފިރިންގެ މައްސަލަ ފަޅާއަރުމުން އެދެމަފިރިން އަމިއްލައަށް އެ ވޮލެޓް ފުލުހުންނާ ހަވާލުކޮށްފި އެވެ.
އެ މައްސަލަ ފުލުހުން ބަލަން ފެށިއިރު އެ ހާދިސާގެ ވީޑިއޯ ސޯޝަލް މީޑިއާގައި އާންމުވެ ފުލުހުންވެސް އެ މައްސަލަ ވަނީ ބަލަންފަށައިފަ އެވެ.
ފުލުހުންގެ މީޑިއާ އޮފިޝަލް ވިދާޅުވީ އެދެމަފިރިން އެ ވޮލެޓް ފުުލުހުންނާ ހަވާލުކުރީ އިއްޔެގެ ވަގުތެއްގައި ކަމަށެވެ. އެ ވޮލެޓް ހަވާލުކުރިއިރު އޭގައި ފައިސާ ހުރިކަމެއް ފުލުހުންނެއް ނުބުނެ އެވެ. ފުލުހުން ބުނީ އެ މައްސަލަ ތަހުގީގްކުރަމުންދާތީ އިތުރު ތަފްސީލް ދެވެން ނެތް ކަމަށެވެ.
ސޯޝަލް މީޑިއާގައި އާންމުވި ވީޑިއޯއިން ފެންނަ ގޮތުގައި ދުވަސްވީ މީހަކު ވިޔަފާރިކޮށް ނިމިގެން ހަނދާން ނެތިގެން ވޮލެޓް ކައުންޓަރު މަތީގައި ބާއްވާފައިދެވެ އެވެ.
އޭގެ ފަހުން ދެން ވީޑިއޯއިން ފެންނަނީ އަންހެނަކާއި ފިރިހެނަކު ކައުންޓަރު ކައިރިއަށް އަންނަ ތަނެވެ. އެތަނުގައި ތިއްބައި އެމީހުންނަށް އެ ވޮލެޓް ފެނި، ފިރިހެން މީހާ އެ ވޮލެޓްގައި ހުރި ފައިސާ ނަގައި ވިޔަފާރިކުރާތަން ފެނެ އެވެ. އެއަށްފަހު އެ ވޮލެޓް ނަގައި ފިރިހެން މީހާގެ ޖީބަށްވެސް ލައެެވެ.