17 Jun 2019, 15:42
ގެސްޓް ހައުސް ވިޔަފާރިތަކަށް ދައުލަތުން ސޮވަރިން ގެރެންޓީ ދިނުމަށް ގޮވާލާ، ކާށިދޫ ދާއިރާގެ މެންބަރު އަބްދުﷲ ޖާބިރު މިއަދު މަޖިލީހަށް ހުށަޙެޅި ގަރާރު މަޖިލީހުން ބޭރުކޮށްލައިފި އެވެ.
ޖާބިރު ހުށަހެޅުއްވި ގަރާރުގައި ވަނީ ރަށްރަށުގެ ރައްޔިތުންނަށް ސީދާ މަންފާ ލިބެމުން އަންނަ ގެސްޓް ހައުސްގެ ވިޔަފާރި ކުރިއެރުވުމަށް ބޭންކްތަކުން މިހާރު އެކަށީގެންވާ ފައިނޭންސް ފޯރުކޮށްދެވެމުން ނުދާ ކަމަށެވެ. އެހެންކަމުން ގެސްޓްހައުސް ވިޔަފާރިއަށް ފައިސާ ހޯދުމަށް ދައުލަތުން ސޮވަރިން ގެރެންޓީ ދިނުމަށް ވަނީ ގޮވާލައިފަ އެވެ.
އެ ގަރާރު މަޖިލީހަށް ބަލައިގަތުމަށް މިއަދު ނެގި ވޯޓްގައި އެ ގަރާރު ބަލައިގަތުމަށް ތާއީދު ކުރެއްވީ، 15 މެންބަރުން އެވެ. އަދި ގަރާރު ބަލައިގަތުމާ ދެކޮޅަށް 63 މެންބަރުން ވޯޓް ދެއްވި އެވެ.
އެ ގަރާރު ހުށަހެޅުމުން މިއަދު މަޖިލީހުގައި ކުރިއަށް ދިޔަ ބަހުސްގެ މަރުހަލާގައި އެމްޑީޕީއަށް ނިސްބަތްވާ ގިނަ މެންބަރުން ވިދާޅުވީ ސޮވަރިން ގެރެންޓީ އާންމު ވިޔަފާރިތަކަށް ދިނުމަކީ ރަނގަޅުކަމެއް ނޫން ކަމަށެވެ. އަދި ގެސްޓް ހައުސް ވިޔަފާރި ކުރިއަރުވަން މި ސަރުކާރުން މިހާރުވެސް އެކަށީގެންވާ ގޮތެއްގައި ލޯނު ދެމުން ދާ ކަމަށް ވެސް އެބޭފުޅުން ވިދާޅުވި އެވެ. އެގޮތުން އެ ދާއިރާއަށް އެސްއެމްއީ ބޭންކުން ލޯނު ދޭކަން ވެސް ފާހަގަކޮށްފައިވެ އެވެ.