06 Jun 2019, 00:07
އީދާއި ގުޅިގެން އިއްޔެ ހަވީރު މާލޭގައި ވެހިކަލްތައް ދުއްވުން މަނާކުރި ކުޑަ ވަގުތުކޮޅުގެ ތެރޭގައިވެސް ވައިގެ ސާފުކަން ވަރަށް ބޮޑަށް ރަނގަޅުވި ކަމަށް އީޕީއޭއިން ބެލި ބެލުމުން އެނގިއްޖެއެވެ.
އެންވަޔަރަމަންޓަލް ޕްރޮޓެކްޝަން އޭޖެންސީ (އީޕީއޭ)އިން ވަނީ އިއްޔެ އަދި އޭގެ ކުރީ ދުވަހުގެ ހަވީރު ދަރުބާރުގެ ސަރަހައްދުގެ ވައިގެ ސާފުކަން ހުރި ވަރު ބަަލައި މޮނީޓާކޮށްފައެވެ. ސިނަމާލެ ބުރިޖު ހުޅުވުމާއެކު ދަރުބާރުގެ ސަރަހައްދަކީ އާންމު ގޮތެއްގައި ވަރަށް ގިނައިން ވެހިކަލްތައް ދަތުރުކުރާ ސަރަހައްދެއްވެސް މެއެވެ.
އީޕީއޭއިން ނެރުނު ވައިގެ ކޮލިޓީ ތަފާސް ހިސާބުތަކުގައިވާގޮތުން މިދިޔަ ހޯމަ ދުވަހު ހަވީރު ދަރުބާރު ގޭގެ ސަރަހައްދުގައި ވަނީ ސަލްފަޑައި އޮކްސައިޑް ކާބޮން މޮނޮއޮކްސައިޑް މަތީ އަދަދަކަށް ހުއްޓެވެ. އެހެން ނަމަވެސް އިއްޔެ ހަވީރު އެ ދެ ގޭހުގެ މިންވަރު ހުރީ ވަރަށް ކުޑަކޮށެެވެ.
" އޭގެންވެސް އެނގިގެން ދަނީ ވެހިކަލްތައް މަނާކުރުމުން ވައި ތަގައްޔަރުވުން ކުޑަވެފައިވާކަން" އީޕީއޭއިން ބުންޏެވެ.
ވެހިކަލްތައް ދުއްވުން މަނާކޮށްފައި އޮތީ އިއްޔެ ހަވީރު 04:00 އިން 06:00 އެއް ޖަހަން ދެނެވެ. ނަަމަވެސް އެ ގަވައިދާ ހިލާފުވެ ބައެއް މީހުން ވަނީ ވެހިކަލް ދުއްވައިފައެވެ. ފުލުހުން ބުނީ އެފަދަ މައްސަލަތަކުގައި އިއްޔެ 97 މީހަކަށް ފިޔަވަޅު އެޅި ކަމަށެެވެ.