28 May 2019, 14:29
އިނގިރޭސި ޕްރިމިއާ ލީގުގެ ފޭނުން ހޮވާ އެންމެ މޮޅު ކުޅުންތެރިޔާގެ އެވޯޑް (ޕީއެފްއޭ ފޭންސް އެވޯޑް) ޗެލްސީގެ ތަރި އެޑެން ހަޒާޑަށް ލިބިއްޖެ އެވެ.
މި އެވޯޑަކީ ޕްރިމިއާ ލީގު ކުލަބުތަކުގެ އޮފިޝަލް ސަޕޯޓަރުންގެ މެދުގައި ނަގައި ވޯޓަކުން ކޮންމެ އަހަރަކު ވެސް ހޮވާ އެވޯޑެކެވެ. މިފަހަރުގެ މި އެވޯޑަށް ވާދަ ކުރި އިތުރު ކުޅުންތެރިންނަކީ ލިވަޕޫލްގެ ވެން ޑައިކް އާއި މާނޭ އަދި މެންޗެސްޓާ ސިޓީގެ ބާނޭޑޯ ސިލްވާއާއި ރަހީމް ސްޓާލިންގް ގެ އިތުރުން ސާޖިއޯ އަގުއޭރޯ އެވެ. ހަޒާޑް މި އެވޯޑް ހޯދީ 34 ޕަސެންޓް ވޯޓް ހޯދައިގެންނެވެ.
މި ނިމުނު ސީޒަނުގައި ހަޒާޑް ވަނީ ޗެލްސީއަށް ޕްރިމިއާ ލީގުގައި 16 ގޯލު ޖަހައިދީ 15 އެސިސްޓް ކޮށްދީފަ އެވެ. އޭނާ މި ސީޒަނުގައި ދެއްކި މޮޅު ކުޅުމާ އެކު އޭނާއަށް ވަނީ ޕްރިމިއާ ލީގުގެ ބެސްޓް ޕްލޭ މޭކާގެ މަގާމު ވެސް ލިބިފަ އެވެ.
ހަޒާޑަށް މި ލިބުނު އެވޯޑަކީ 2005 ވަނަ އަހަރު ފްރޭންކް ލަމްޕާޑަށް މި އެވޯޑް ލިބުނު ފަހުން ޗެލްސީގެ ކުޅުންތެރިއަކަށް މި އެވޯޑް ލިބުނު ފުރަތަމަ ފަހަރެވެ. ޗެލްސީއިން މި ސީޒަނުގައި އިނގިރޭސި ޕްރިމިއާ ލީގުގެ ތިން ވަނަ ހޯދުމުގައި މުހިއްމު ދައުރެެއް އަދާ ކުރި ހަޒާޑް ވަނީ މީގެ ކުރިން ވެސް ޕްރިމިއާ ލީގުގެ މޮޅު ކުޅުންތެރިޔާގެ މަގާމު ވެސް ހޯދާފަ އެވެ.
މީގެ އިތުރުން ކުރިއަށް އޮތް ޔޫރޮޕާ ލީގުގެ ފައިނަލުގައި ވާދަ ކުރުމަށް ޗެލްސީއާ އެކު ހަޒާޑު މިވަގުތު ހުރީ އަޒަރުބައިޖާނުގެ ބަކޫގަ އެވެ. މި މެޗަކީ އޭނާ ޗެލްސީއާ އެކު ކުޅޭ ފަހު މެޗަށް ވުމަކީ ވެސް އެކަށީގެންވާ ކަމަކެވެ. މި ސީޒަން ނިމުމާ އެކު ހަޒާޑް ރެއާލް މެޑްރިޑަށް ބަދަލުވާން އުޅޭ ކަމުގެ ވާހަކަތައް ފެތުރިފައިވާ އިރު އޭނާ ވެސް ވަނީ އެކަމަށް އިޝާރާތެއް ކޮށްފަ އެވެ.
ވޭތުވެ ދިޔަ އަހަރު މި އެވޯޑް ހޯދާފައި ވަނީ ލިވަޕޫލްގެ މުހައްމަދު ސަލާހު އެވެ. ސަލާހުއަށް މި ސީޒަނުގައި އެންމެ ރަނގަޅު ކުޅުމެއް ދެއްކިފައި ނުވި ނަމަވެސް އޭނާ ވަނީ ޕްރިމިއާ ލީގުގެ އެންމެ ގިނަ ގޯލު ޖެހި ކުޅުންތެރިޔާގެ މަގާމު ހޯދައިފަ އެވެ.