26 May 2019, 13:20
މަޖިލިސް ރައީސް ކަމަށް އެމްޑީޕީ ޕާލިމަންޓަރީ ގުރޫޕުގައި ނަގާ ވޯޓުގައި އެމްޑީޕީގެ 40 އަށް ވުރެ ގިނަ ވޯޓު ލިބޭނެ ކަމަށް ވިލުފުށި ދާއިރާގެ އިންތިހާބީ މެމްބަރު ހަސަން އަފީފު ވިދާޅުވެއްޖެ އެވެ.
އަފީފް އެހެން ވިދާޅުވާ އިރު އޭނާއާ އެންމެ ވާދަވެރި ހިތަދޫ އުތުރު ދާއިރާ މެމްބަރު ވެސް ވިދާޅުވަނީ ވޯޓު ކާމިޔާބު ކުރެވޭނެ ކަމުގެ ފުރިހަމަ ޔަގީން ކަމެއް އެބަ އޮތް ކަމަށެވެ.
އެމްޑީޕީގެ ޕާލިމަންޓަރީ ގުރޫޕުގެ މެދުގައި ނަގާ މަޖިލިސް ރައީސް ކަމުގެ ވޯޓު ނަގާނީ މާދަމާ އެވެ. ހަތަރު ބޭފުޅުން ޝައުގުވެރިކަން ފާޅުކޮށްފައިވާއިރު، މަޖިލިސް ރައީސް ރޭހުގައި ބޮޑަށް ވާދަ ވެރިކަމެއް މިއޮތީ، އަފީފާއި އަސްލަމަށެވެ.
"ސަން" އާ ވާހަކަ ދައްކަވަމުން އަފީފު ވިދާޅުވީ، ވޯޓާ ގުޅިގެން އެމްޑީޕީގެ 65 މެމްބަރުންނާ މަޝްވަރާ ކުރައްވަމުން ގެންދަވާ ކަމަށެވެ. އަދި އެބޭފުޅުންނާ ވާހަކަ ދައްކަވާ އޭނާ އަށް ތާއީދު ހޯއްދެވުމަށް މިހާރުވެސް މަސައްކަތް ކުރައްވަމުން ގެންދަވާ ކަަމަށް ވިދާޅުވި އެވެ. އެ މަސައްކަތުން 40 ވުރެ ގިނަ ވޯޓް ކަށަވަރު ކުރެއްވިއްޖެ ކަމަށް ވެސް ވިދާޅުވި އެވެ.
"ވަރަށް ޔަގީންކަން އެބަ އޮތް އިރާދަ ކުރެއްވިޔާ. މެމްބަރުންނާ ގުޅައިގެން މަސައްކަތް ކުރަމުން މިދަނީ، ޕާޓީގެ ތެރެއިން 40 އަށް ވުރެ މަތިން އަޅުގަނޑަށް ލިބޭނެ ކަމަށް މި ބަލަނީ،" ރައީސް ނަޝީދުގެ ސަރުކާރުގައި ހޯމް މިނިސްޓަރު ކަން ކުރެއްވި އަފީފު ވިދާޅުވި އެވެ.
އޭނާ ވިދާޅުވި ގޮތުގައި މަޖިލިސް ރައީސް ކަމަށް އަސްލަމްގެ އިތުރުން ދެން ޝައުގުވެރިކަން ފާޅުކޮށްފައި ތިބި ބޭފުޅުންގެ ތާއީދު ވެސް އެނާ އަށް ލިބޭނެ އެވެ.
ޕާޓީގެ އެންމެ އިސް ފަރާތް އަދި ރައީސް އިބްރާޙިމް މުހައްމަދު ސޯލިހް ތާއީދު ކުރައްވަނީ އަފީފްއަށެވެ. ޕާޓީގެ ރައީސް އަދި ކުރީގެ ރައީސް މުހައްމަދު ނަޝީދު ތާއީދު ކުރައްވަނީ އެމަނިކުފާނާ ގާތް އަސްލަމަށެވެ.
އަފީފު: އޭނާ ވިދާޅުވަނީ 40 އަށް ވުރެ ގިނަ ވޯޓު ލިބޭނެ ކަމަށް --- ސަން ފައިލް ފޮޓޯ/ މުހަންމަދު އަފްރާހް
އަފީފު ވިދާޅުވި ގޮތުގައި އޭނާ މަޖިލިސް ރައީސް ކަމަށް އާދެއްވިޖެ ނަމަ ރައީސް ސޯލިހާއި ރައީސް ނަޝީދުގެ މަޝްވަރާވެސް ހޯއްދަވާނެ ކަމަށެވެ.
"މަގާމަށް އަތުވެއްޖެއާ އެ ދެބޭފުޅުންނާ [ރައީސްއާއި ރައީސް ނަޝިދު] އެކު އަޅުގަނޑު މަސައްކަތް ކުރައްވާނީ. ރައީސް ނަޝީދާވެސް އަޅުގަނޑާ އެހާ ގާތް. ރައީސް ސޯލިހާ ވެސް އަޅުގަނޑާ އެހާ ގާތް. އެއް ބޭފުޅަކީ ޕާޓީގެ ރައީސް. އަނެއް ބޭފުޅަކީ ރާއްޖޭގެ ރައީސް. އެބޭފުޅުނާ އެއްކޮށް މަސައްކަތް ކުރައްވާނީ. އެބޭފުޅުންގެ މަޝްވަރާވެސް ހޯއްދަވާނަން،" އަފީފު ވިދާޅުވި އެވެ.
އަފީފު ވިދާޅުވީ، އެޕާޓީ އަކީ ޑިމޮކްރެޓިކް ހަމަތަކުގެ މަތިން ވާދަވެރިކޮށް ސުލްހަވެރި ހަރކާތްތައް ކުރިއަށްދާ ޕާޓީއެއް ކަމަށާއި މިހާރު ޕާޓީގެ މެމްބަރުންގެ މެދުގައި ހިޔާލުތަފާތުވުން ހުރި ކަމުގައި ވީނަމަވެސް ވޯޓަށް ފަހު، ހުރިހާ އެންމެންނަކީ ވެސް "އެއް ބައެއް" ކަމަށެވެ.
އަސްލަމް ވިދާޅުވަނީ ރައީސްގެ ތާއީދު ވަކި ބޭފުޅަކަށް ނެތް ކަމަށް
އަސްލަމް: އެނާ ވިދާޅުވަނީ ރައީސް ސޯލިހު ވެކި ކޮޅެއް ނުންނަގަވާ ކަމަށް --- ސަން ފޮޓޯ/ ފަޔާޒު މޫސާ
މަޖިލިސް ރައީސްގެ ރޭހުގެ ކުރީގައި އުޅުއްވާ އަސްލަމަށް ވެސް އެވޯޓު ކާމިޔާބު ކުރެއްވޭނެ ކަމުގެ ޔަގީން އެބައޮތް ކަމަށް އަސްލަމް ވިދާޅުވެއެވެ. އަސްލަމް "ސަން" އަށް ވިދާޅުވީ، ވޯޓު ކާމިޔާބު ކުރެއްވޭނެ ވަކި އަދަދެއް އެނގިވަޑައިނުގަންވާ ކަމަށާއި މެމްމަރުންނަށް ގުޅުއްވައިގެން ތާއީދު ހޯދުމުގެ މަސައްކަތް ކުރައްވަމުން ގެންދަވާ ކަމަށެވެ.
"އަޅުގަނޑަށް ވަރަށް ބޮޑު ޔަގީން ކަމެއް އެބަ އޮތް ވޯޓު ކާމިޔާބު ކުރެއްވޭނެ ކަމުގެ،" ހަތަރު ވަނަ ދައުރަކަށް މަޖިލީހަށް އިންތިހާބުވެވަޑައިގެންނެވި އަސްލަމް ވިދާޅުވިއެވެ.
ރައީސް ސޯލިހް އަފީފަށް ތާއީދު ކުރެއްވުމާ ގުޅޭ ގޮތުން ސުވާލު ކުރުމުން އަސްލަމް ވިދާޅުވީ، ރައީސް ސޯލިހް ވަކި ބޭފުޅަކަށް ތާއީދު ކުރެއްވި ކަމަށް މާނަ ނުކުރެވޭ ކަމަށާއި ރައީސް ސޯލިހް ވަކި ކޮޅެއް ނެންގެވި ކަމަށް އޭނާ ގަބޫލުފުޅު ނުކުރައްވާ ކަމަށެވެ.
"ރައީސް ވަކި ކޮޅެއް ނެންގެވި ކަމަށް އަޅުގަނޑަށް ސާފެއް ނުވޭ. ވަކި ބޭފުޅަކާ ގުޅޭގޮތުން ސުވާލު ކުރުމުން އެބޭފުޅާއަކީ [އަފީފަކީ] ގާބިލު ބޭފުޅެކޭ ވިދާޅުވީ،" އަސްލަމް ވިދާޅުވި އެވެ.
ރައީސް ކަމުގައި ހުންނަވައިގެން އެއްވެސް ބޭފުޅަކަށް ތާއީދު ކުރެއްވުމަކީ ރަނގަޅު ކަމެއް ކަމަށް ރައީސް ވިދާޅުވެފައިވާ ކަމަށާއި އެހެން ކަމުން ރައީސް ވަކި ބޭފުޅަކަށް ތާއީދު ކުރައްވާ ކަން ގަބޫލުފުޅު ނުކުރައްވާ ކަމަށް އަސްލަމް ވދާޅުވި އެވެ.
އަސްލަމް ވިދާޅުވީ، ރައީސް ސޯލިހާ އޭނާއާ އެއްވެސް މައްސަލައެއް ނެތް ކަމަށާއި އޭނާއާއެކު ވެސް މަސައްކަތް ކުރެއްވޭނެ ކަމަށް ރައީސް ސޯލިހް އޭނާ ކައިރީގައި ވިދާޅުވެފައިވާކަމަަށެވެ.
ކޮންމެއަކަސް މަޖިލިސް ރައީސް ކަމަށް އެމްޑީޕީން ފޮނުވާ ނަމެއް އެނގޭނީ މާދާމާ އެޕާޓީގެ ޕާލިމަންޓަރީ ގުރޫޕޫގައި ނަގާ ވޯޓުންނެވެ. މި ވޯޓު ނަގާނީ ސިއްރުންތޯ ނުވަތަ އާންމުކޮށް ފެންނަ ގޮތަށްތޯ ވެސް މެމްބަރުންގެ މެދުގައި ވަނީ ހިޔާލު ތަފާތުވުން އުފެދިފައެވެ. އަދި އަސްލަމަށް ތާއީދު ކުރައްވާ ފަރާތްތަކާއި އަފީފަށް ތާއީދު ކުރައްވާ ފަރާތްތަކާ މެދު ވެސް ދަނީ ބަހުގެ ހޫނު ހަމަލާތަކެއް ދެމުންނެވެ.
އަންގާރަ ދުވަހު 19 ވަނަ ރައްޔިތުންގެ މަޖިލިސް ހުޅުވުގެ ރަސްމިއްޔާތު ބޭއްވުމަށް ހަމަޖެހިފައިވާ އިރު، މަޖިލިސް ރައީސް ކަމަށް 87 މެމްބަރުންގެ މެދުގައި ނެގޭ ސިއްރު ވޯޓު އޮންނާނީ އެރޭ އެވެ. މަޖިލިސް ރައީސް ކަމަށް އަންނާނެ ކަމަށް ބޮޑަށް ބެލެވެނީ، 65 މެމްބަރުންނާއެކު ބޮޑު އަގުލަބިއްޔަތެއް އޮތް އެމްޑީޕީ ޕާލިމަންޓަރީ ގުރުޕުން ފޮނުވާ ނަމެކެވެ.