23 May 2019, 14:42
ވޮޝިންޓަން (މޭ 23) : ފަލަސްތީނަށް އިގްތިދާސީ ގޮތުން އެހީތެރިވުމުގެ ނަމުގައި އެމެރިކާގެ ބެލުމުގެ ދަށުން ބަހްރައިންގައި ބާއްވާ އިގްތިސާދީ މަހާސިންތާގައި ބައިވެރިވުމަށް އެމެރިކާ އިން ފަލަސްތީނަށް ގޮވާލައިފި އެވެ.
މެދުއިރުމައްޗަށް އެމެރިކާއިން ކަނޑައަޅާފައިވާ މަންދޫބު ޖިސޮން ގްރީންބްލެޓް ވިދާޅުވީ ބަހްރައިންގައި ބާއްވާ އިގްތިސާދީ މަހާސިންތާއަކީ ފަލަސްތީނުގައި އިސްވެސްޓްކުރުމަށާއި ފަލަސްތީނުގައި ވަޒީފާގެ ފުރްސަތުތައް އިތުރުކޮށް ފަލަސްތީނު ރައްޔިތުންގެ ދިރިއުޅުމުގެ ފެންވަރު ރަނގަނޅު ކުރުމަށް ބާއްވާ މަހާސިންތާއެއް ކަމަށާއި އޭގައި ބައިވެރިނުވެއްޖެ ނަމަ ފަލަސްތީނަށް ގެއްލިގެންދަނީ ދެން ނުލިބޭ ފަދަ ފުރްސަތެއްކަމުގަ އެވެ.
ގްރީންބްލެޓް ވިދާޅުވީ ފަލަސްތީނު ރައްޔިތުންގެ ދިރިއުޅުމުގެ ފެންވަރު ރަނގަނޅު ކުރެވިއްޖެ ނަމަ ފަލަސްތީނު ރައްޔިތުންގެ އުންމީދުތައް ހާސިލްކުރަން ފަސޭހަވާނެ ކަމުގަ އެވެ. ފަލަސްތީނުގެ މައްސަލަ ސިޔާސީ ގޮތުން ހައްލުވާނެ ދުވަހެއްގެ އިންތިޒާރުގައި އިގްތިސާދީ ކަންކަން އިހްމާލުކޮށްލައިގެން ނުވާނެކަން ފަލަސްތީނުން ދަންނަންޖެހޭނެ ކަމަށް ވިދާޅުވެ ގްރީންބްލެޓް ވަނީ ބަހްރައިންގައި ބާއްވާ އިގްތިސާދީ މަހާސިންތާގައި ބައިވެރިވުމަށް ފަލަސްތީނަށް އިލްތިމާސް ކުރައްވާފަ އެވެ. ނަމަވެސް އިސްރާއީލު ނޭދޭ ފަދަ އެއްވެސް ހައްލެއް ފަލަސްތީނުގެ މައްސަލައަށް ނުގެނެވޭނެ ކަމާއި އެމެރިކާ އިސްކަންދޭނީ އިސްރާއީލުގެ މަސްލަހަތަށް ކަމަށް ގްރީންބްލެޓް ވިދާޅުވި އެވެ.
އެމެރިކާގެ ބެލުމުގެ ދަށުން އަންނަ ޖޫން މަހު ބަހްރައިންގައި ބޭއްވުމަށް ހަމަޖެހިފައިވާ އިގްތިސާދީ މަހާސިންތާއަކީ ފަލަސްތީނުގެ މައްސަލަ ހައްލުކުރުމުގެ ނަމުގައި ރައީސް ޑޮނަލްޑް ޓްރަމްޕް އިއްލާން ކުރައްވާ ސުލްހައިގެ މަޝްރޫއު "ޑީލް އޮފް ދަ ސެންޗަރީ" ރަސްމީ ގޮތުން އިއްލާންކުރުމަށް މަގުފަހިކުރުމުގެ ގޮތުން ބާއްވާ މަހާސިންތާއެއްކަމަށް ވެ އެވެ.
"ޑީލް އޮފް ދަ ސެންޗަރީ" ބިނާކޮށްފައި ވަނީ ފަލަސްތީނުގެ ހުޅަނގު އައްސޭރީގައި ބޭރުގެ ފަރާތްތަކުން އިންވެސްޓްކޮށް އިސްރާއީލުގެ އިސްތިއްމާރުގެ ދަށުގައި އެތަން ބާއްވައިގެން ފަލަސްތީނު މީހުންގެ ދިރިއުޅުމުގެ ހާލަތު ރަނގަނޅުކުރުމުގެ މައްޗަށް އެކަނި ކަމަށާއި ފަލަސްތީނުގެ ބިންތަކުން އިސްރާއީލު ފާބައި ފަލަސްތީނުގެ މިނިވަން މުސްތަގިއްލު ދައުލަތެއް އުފެއްދުން ފަދަ ފަލަސްތީނަށް ލިބެން ޖެހޭ ސިޔާސީ ހައްގުތައް އޭގައި ނުހިމެނޭ ކަމަށް ޚަބަރުތައް ބުނެ އެވެ.
ފަލަސްތީނުގެ މަސްއޫލުވެރިން ވަނީ "ޑީލް އޮފް ދަ ސެންޗަރީ" އަކީ އުފަންވުމުގެ ކުރިން މަރުވެފައިވާ މަޝްރޫއެއް ކަމަށް ސިފަކުރައްވައި ފަލަސްތީނުން އެމަޝްރޫއު ގަބޫލުނުކުރާނެކަން އިއްލާން ކުރައްވައިފަ އެވެ. އަދި އދ.ގެ ގަރާރުތަކާއި ބައިނަލްއަގްވާމީ ގާނޫނާ ޚިލާފަށް އިސްރާއީލު ވެރިވެގަނެގެންއުޅޭ ގުދްސަށް އެމެރިކާގެ އެންބަސީ ބަދަލުކޮށްފައިވާތީ އެމެރިކާ އިސްވެ އޮވެގެން ކުރިޔަށްގެންދާ ސުލްޙައިގެ އެއްވެސް ކަމެއްގައި ފަލަސްތީނު ބައިވެރިނުވެ އެމެރިކާގެ ސުލްހައިގެ ހަރަކާތްތައް ބޮއިކަޓް ކުރުމަށް ވެސް ފަލަސްތީނުން ވަނީ ނިންމަވާފަ އެވެ.
އެހެންކަމުން އެމެރިކާގެ ބެލުމުގެ ދަށުން ބަހްރައިންގައި ބާއްވާ އިގްތިސާދީ މަހާސިންތާގައި ބައިވެރިނުވާނެކަމަށް ފަލަސްތީނުގެ ބޮޑުވަޒީރު މުހައްމަދު އިޝްތިޔާ ވަނީ ވިދާޅުވެފަ އެވެ. އަދި ފަލަސްތީނަށް ބޭނުންވަނީ މިނިވަންކަމާއި ސިޔާދަތާއި އިސްތިގްލާލް ކަމަށާ އިންވެސްޓްމަންޓާއި ފައިސާއަށް ފަލަސްތީނުގެ މިނިވަންކަމާއި ސިޔާދަތާއި ހައްގުތައް ގުރްބާންކޮށް ނުލެވޭނެ ކަމަށް ވެސް ފަލަސްތީނުގެ ބޮޑުވަޒީރު ވިދާޅުވި އެވެ. (ނޫސްއެޖެންސީތައް)