20 May 2019, 14:35
ޚުރްތޫމް (މޭ 20 ) ސޫދާނުގެ ވެރިކަން މަދަނީ އިންގިގާލީ ސަރުކާރަކާ ހަވާލުކުރުމާ ބެހޭ ގޮތުން އަސްކަރީ މަޖިލީހާއި އެގައުމުގެ އިދިކޮޅު ފަރާތްތަކާ ދެމެދު ކުރިޔަށްދިޔަ ވާހަކަތައް ހުއްޓާލާފައި އޮތުމަށް ފަހު އެވާހަކަތައް އަލުން ފަށައިފި އެވެ.
ރޭ ފެށި ދެފަރާތުގެ ވާހަކަތައް ފަތިސްވާންދެން ކުރިޔަށް ދިޔަކަމަށާއި މަޝްވަރާ ކުރެވުނީ ސޫދާނުގެ ވެރިކަން ހަވާލުކުރުމަށް ހަމަޖެހިފައިވާ އިންތިގާލީ ސަރުކާރުގެ އޮނިގަނޑުގައި ހިމެނޭ ބައިތަކާދެމެދުގައި ކަމަށް އަސްކަރީ މަޖިލީހުން ބުނެފައިވެ އެވެ. އިންތިގާލީ ސަރުކާރުގެ އޮނިގަނޑުގައި ހިމެނެނީ ސިޔާދީ މަޖިލީހަކާއި ގާނޫނު ހަދާ މަޖިލީހަކާއި ތަންފީޒީ މަޖިލީހެކެވެ. ރޭގެ ބައްދަލުވުމުގައި މަޝްވަރާ ކުރެވުނީ މިމަޖިލިސްތަކަށް ބޭފުޅުން ހަމަޖެއްސުމާ ބެހޭ ގޮތުންނާއި އެކިފަރާތްތަކަށް މަގާމުތައް ދޭނެ މިންވަރާ ބެހޭ ގޮތުން ކަމަށް އަސްކަރީ މަޖިލީހުގެ ތަރްޖަމާން ޝަމްސުއްދީން ކައްބާޝީ ވިދާޅުވި އެވެ.
އަސްކަރީ މަޖިލީހާއި އިދިކޮޅު ކޯލިޝަނާ ދެމެދު ކުރިޔަށް ދިޔަ ވާހަކަތައް މީގެދިހަވަރަކަށް ދުވަސްކުރިން ހުއްޓުނީ ޚުރްތޫމުގައި ހުންނަ ސޫދާން ސިފައިންގެ މައި މަރުކަޒުގެ ކުރިމަތީގައި އެއްވެ މުޒާހަރާކުރި އިދިކޮޅު ކޯލިޝަންގެ މީހުންގެ ގަޔަށް ގޮތްނޭންގޭ ފަރާތަކުން ދެފަހަރެއްގެ މަތިން ބަޑިޖަހައި ހަ މީހުން މަރާލައި އެތައް ބަޔަކު ޒަޚަމް ކޮށްލި ހާދިސާތަކާ ގުޅިގެންނެވެ.
ބަޑިޖެހުމުގެ ފަހަތުގައި ވަނީ ސޫދާނަށް ޑިމޮކްރަސީ ގެންނަން ބޭނުންނުވާ ފަރާތްތަކެއް ކަމަށް ބެލެވިފައިވާއިރު އެއީ ސިފައިންގެ ތެރޭގައި ހިމެނޭ ރެޕިޑް ސަޕޯޓް ފޯސްކަމަށް އިދިކޮޅު ކޯލިޝަނުން ވަނީ ތުހުމަތުކޮށްފަ އެވެ. އަދި ބަޑިޖެހުމުގެ ބޭނުމަކީ ސޫދާނުގެ ވެރިކަން ހަވާލުކުރާ އިންތިގާލީ ސަރުކާރުގެ އޮނިގަނޑާމެދު އިދިކޮޅު އެލަޔަންސާއި އަސްކަރީ މަޖިލިހުން އެއްބަސްވި އެއްބަސްވުން ހަރާބުކޮށް އެދެފަރާތުގެ ދެމެދުގައި އޮތް ގުޅުންތައް ގޯސްކޮށްލުން ކަމަށް އިދިކޮޅު އެލަޔަންސުން ވަނީ ތުހުމަތުކޮށްފަ އެވެ.
މިޙާދިސާތަކާގުޅިގެން އަސްކަރީ މަޖިލީހުންވަނީ އިދިކޮޅު އެލަޔަންސްގެ މުޒާހަރަތަކަކީ ސުލްޙަވެރި މުޒާހަރާތަކެއް ނޫންކަމަށް ސިފަކޮށް ހަމަނުޖެހުންތަކަށް ފުރްސަތު ނުދޭނެކަމަށް ބުނެ އިދިކޮޅު އެލަޔަންސާ އެކު ދައްކަމުން ގެންދިޔަ ވާހަކަތައް ހުއްޓާލައިފަ އެވެ. މިވާހަކަތައް ހުއްޓާލި ނަމަވެސް އިދިކޮޅު ކޯލިޝަންގެ މުޒާހަރާތަކަށް ހުއްޓުމެއް އައިސްފައިނުވުމާއި ސޫދާނުގެ ވެރިކަން މަދަނީ އިންގިގާލީ ސަރުކާރަކާ ހަވާލުކުރަންދެން މުޒާހަރާތައް ކުރިޔަށްގެންދާނެ ކަމުގެ އިންޒާރު އިދިކޮޅު ކޯލިޝަނުން ތަކުރާރުކޮށް ދެމުން ގެންދިޔުމުގެ ނަތީޖާއެއްގެ ގޮތުން އަސްކަރީ މަޖިލީހުން މިވަނީ އިދިކޮޅު ކޯލިޝަނާ އެކު ދައްކަމުން ގެންދިޔަ ވާހަކަތައް ދިހަދުވަހުގެ މެދުކެނޑުމަކަށް ފަހު ރޭ އަލުން ފަށައިފަ އެވެ.
މިއީ އިދިކޮޅު ކޯލިޝަނަށް ރައްޔިތުންގެ ސަޕޯޓް އޮތްމިންވަރުގެ ސަބަބުން އަސްކަރީ މަޖިލިސް ޖެހިލުންވެފައިވާ މިންވަރު ހާމަވެގެން ދިޔަ ކަމެއްކަމަށް މުރާސިލުން ވަނީ ސިފަކޮށްފަ އެވެ. (އަލްޖަޒީރާ)