17 May 2019, 17:08
އައިސިސްގެ މައުލޫމާތު ހިމެނޭ ފޮތެއް ފެނުނު މައްސަލައިގައި ސްރީލަންކާ ފުލުހުން ހައްޔަރުކޮށްފަައިވާ ދެ ދިވެހީންގެ ބަންދުގެ މުއްދަތު އަނެއްކާވެސް އިތުރުކޮށްފި އެވެ.
ލަންކާގައި މިދިޔަ މަހު ދިން ބޮމުގެ ހަމަލާތަކާ ގުޅިގެން އެގައުމުގެ ފުލުހުން ހިންގި އޮޕަރޭޝަނުގެ ތެރެއިން ހައްޔަރު ކުރީ އާދަމް މުހައްމަދު މަނިކު (ފުނަމާ) އާއި ހަސަން މަނިކު (ބައިކެނޑި) އެވެ.
އެ ދެމީހުން ހައްޔަރު ކުރީ އޭޕްރިލް މަހުގެ 26 ވަނަ ދުވަހުއެވެ. އެފަހުން އެ ދެ ދެމީހުންގެ ބަންދު އިތުރުކުރަމުން ގޮސް މިއަދު ވަނީ އަނެއްކާވެސް ބަންދަށް ތިން ދުވަސް އިތުރުކޮށްފައެވެ.
އެކަން ލަންކާގައި ހުންނަވާ ދިވެހި ސަފީރު އުމަރު އަބްދުއްރައްޒާގު ވަނީ "ސަން"އަށް ކަށަވަރުކޮށްދެއްވައިފައެވެ. އޭނާ ވިދާޅުވި ގޮތުގައި ދެން އެ މީހުންގެ ބަންދުގެ މުއްދަތުގެ އަޑުއެހުމެއް އޮންނާނީ އަންނަ އަންގާރަ ދުވަހުއެވެ. އެއީ ހޯމަ ދުވަހަކީ ލަންކާގެ ސަރުކާރު ބަންދު ދުވަހެއް ކަމުގައި ވުމުންނެވެ.
ހައްޔަރު ކުރި ދެ މީހުންގެ ތެރެއިން އާދަމް މަނިކު އަކީ ލަންކާއަށް ބޭސްފަރުވާއަށް ގޮސް އުޅުނު މީހެކެވެ. އޭނާ އެ ގައުމުގައި މަޑުކޮށްގެން ހުރީ ހަސަން މަނިކު ލަންކާގައި ދިރިއުޅޭ ގޭގައެވެ.
އެނގިފައިވާ ގޮތުގައި ހަސަން މަނިކުގެ ގެއިން ފެނުނު އައިސިސްގެ މައުލޫމާތު ހިމެނޭ ފޮތަކީ "ބްލެކް ފްލެގްސް ދަ ރައިޒް އޮފް އައިސިސް" އެވެ. އަދި ހައްޔަރު ކުރި ދެ މީހުންނާ އެ ފޮތާ ގުޅުމެއް ނެތް ކަމާއި، އެ ފޮތަކީ ލަންކާގައި ޕޮލިޓިކަލް ސައިންސް ކިޔަވާ ދިވެހި ދަރިވަރަކު ގެންގުޅުނު ފޮތެއްކަން ވަނީ އެނގިފައެވެ. އެ ފޮތަކީ ލަންކާގެ ބުކްޝޮޕްތަކުން ލިބެން ހުންނަ ފޮތެކެވެ.
ލަންކާގައި ބޮން ގޮއްވާލި ހާދިސާއާ ގުޅިގެން ހިންގި އޮޕަރޭޝަނުގެ ތެރެއިން ފޭކް ލައިސެސްއަކާއެކު އެއާ ރައިފަލް ގެންގުޅުނު ހަތަރު ދިވެއްސަކުވެސް ހައްޔަރު ކުރިއެވެ. ނަމަވެސް އެ މީހުން ފަހުން ވަނީ ދޫކޮށްލާފައެވެ.