09 May 2019, 09:01
ބަރަކާތްތެރި ރަމަޟާން މަހުގައި ރޯދަ ހިފުމަކީ ބޮޑެތި މީހުންނެކޭ އެއްފަދައިން އަޅުގަނޑުމެންގެ ތެރޭގައި ކުޑަކުދީން ވެސް ހާއްސަ ސަމާލު ކަމެއް ދޭ ކަމެކެވެ. ރޯދަ ހިފުމުން ލިބޭ ތައުރީފުގެ ބަސްތަކާއި ހާއްސަ ހަދިޔާތަކަކީ ކުޑަކުދީންގެ ރޯދައިގެ އެންމެ ބޮޑު ހިތްވަރެވެ.
ރޯދަ ހިފުމަށް އާދަވެފައި ނުތިބޭ ކުޑަކުދީން ރޯދަ ހިފާއިރު ބައެއް ކަހަލަ އުނދަގޫތަކާ ކުރިމަތިވެއެވެ. މި ކަންކަމަކީ އެ ކުދީންގެ މައިންބަފައިން ނުވަތަ ބެލެނިވެރީން ސަމާލު ވާން ޖެހޭ ކަމެކެވެ.
ރޯދަ ހިފައިގެން ތިބޭ ކުޑަކުދީންނަށް ސިއްހީ ގޮތުން ކުރިމަތި ވެދާނެ ހާލަތްތަކާއި އެކަމުގެ ހައްލު ހޯދާނެ ގޮތާ މެދު މި ރޯދަ މަހުގެ ކޮންމެ ހަފްތާއަކު އެއް ދުވަހު ހުށަހަޅާ މި މައުލޫމާތު ލިޔެފައި މި ވަނީ ސިއްހީ ދާއިރާގެ ތަޖްރިބާކާރުންނާ ވާހަކަ ދައްކައިގެން އެ ބޭފުޅުންގެ އިރުޝާދާ އެއް ގޮތް ވާ ގޮތުގެ މަތީންނެވެ. މި ގޮތުން މި ހަފްތާގެ މައުލޫމާތު ހާއްސަ ކޮށްލާފައި މިވަނީ ބަނޑުގައި ވައި ހެދުމާ ބެހޭ ގޮތުންނެވެ.
ކުޑަކުދީންނަށް ބަނޑުގައި ވައި ހެދުމުގެ މައްސަލަ ނުވަތަ ގޭހުގެ މައްސަލަ ކުރިމަތި ވުމުގެ ސަބަބުތައް ވަރަށް ގިނައެވެ. އޭގެ ތެރޭގައި ވައިރަލް ރޯގާއެއްގެ ސަބަބުން، ނުވަތަ އެ ކުއްޖާއަށް ކެވުނު އެއްޗެއް ނުވަތަ ބޮވުނު އެއްޗެއްގެ ސަބަބުން، ނުވަތަ ބޭނުން ކުރާ ބޭހެއްގެ ސަބަބުން، ނުވަތަ ގިނަ އިރު ނުކައި ހުރުމުގެ ސަބަބުން ގޭހުގެ މައްސަލަ ކުރިމަތިވުން ހިމެނެއެވެ.
ގޭހުގެ މައްސަލައަކީ މާ ކުޑަކަމެއް ކަމަށް ހީކޮށްގެން ކުޑަ ދަރިފުޅަށް ގޭގައި ތަފާތު ވައްތަރުގެ ބޭސް ދިނުމަކީ އެއްގޮތަކަށް ވެސް ރަނގަޅުކަމެއް ނޫނެވެ. ގޭހުގެ މައްސަލައެއް ކަން މައިންބަފައިންނަށް ނުވަތަ ބެލެނިވެރިޔާއަށް ޔަގީން ވި ނަމަވެސް، އެ ކަމަށް ފަރުވާ ކުރާން ވާނީ ޑޮކްޓަރަކަށް ދައްކައިގެން ޑޮކްޓަރު ދޭ އިރުޝާދާ އެއްގޮތް ވާ ގޮތުގެ މަތީންނެވެ. ގޭހުގެ މައްސަލައެއް ތޯ ނޫންތޯ ހަގީގަތުގައި ކަނޑައަޅުއްވާނީ ޑޮކްޓަރެވެ.
ޑޮކްޓަރަށް ދައްކާން ދަރިފުޅު ގޮވައިގެން ދާ އިރު، ދަރިފުޅު މިހާރު ބޭނުން ކުރާ ބޭސްތަކަކީ ކޮބައިކަން އެނގޭނެ ލިޔުންތަކާއި އެންމެ ފަހުން ހައްދައިފައި ހުރި ލެބޯޓަރީ ޓެސްޓުތަކުގެ ނަތީޖާ ހިފައިގެން ދިއުން މުހިއްމެވެ.
ދަރިފުޅުގެ ބަނޑަށް ތަދުވާ ނަމަ، ނުވަތަ މޭ ނުބައި ކުރާ ނަމަ، ނުވަތަ އޯކަށް ދެމޭ ނަމަ، ނުވަތަ ހޮޑުލެވޭ ނަމަ، ނުވަތަ އުކުނޑި ކޮއްޓާ ނަމަ އެކަމަށް ސަމާލުކަން ދޭން ޖެހޭނެއެވެ.
ދަރިފުޅު ހުން އަތުވެއްޖެ ނަމަ ނުވަތަ ބަނޑަށް ތަދުވުމާއި، މޭ ނުބައި ކުރުމާއި، އޯކަށް ދެމުމާއި، ހޮޑުލެވުމާއި، އުކުނޑި ކޮއްޓުން އާއްމުކޮށް ދިމާވާ މިފަދަ ކަންކަމަށް ވުރެ ދިގުލައިގެން ދާ ނަމަ އަވަހަށް ޑޮކްޓަރެއްގެ އެހީތެރިކަން ހޯދާށެވެ. ގޭގައި ރެންޓެކް ނުވަތަ ޑައިޖީން ހުރި ނަމަވެސް ޑޮކްޓަރެއްގެ އިރުޝާދު ނުހޯދައި އެއްވެސް ބޭހެއް އަމިއްލަ ގޮތުން ދަރިފުޅަށް ނުދޭށެވެ.
ސަމާލުކަން ދޭން ޖެހޭ މުހިއްމު ނުގުތާތަކެއް
ދަރިފުޅު އާއްމުކޮށް ކާން ޖެހޭ ބޭހެއް ހުރި ނަމަ، ޑޮކްޓަރާ ވާހަކަ ދައްކައިގެން ރޯދަ މަހުގައި އެ ބޭސްތައް ބޭނުން ކުރާނީ ކޮންކޮން ގަޑިތަކެއްގައި ތޯ އޮޅުން ފިލުވައިގެން ޑޮކްޓަރު އިރުޝާދު ދެއްވި ގޮތަށް ކުރިޔަށް ގެންދާށެވެ.
އެ ކާނާއެއްގެ ސަބަބުން ދަރިފުޅުގެ ބަނޑަށް އުނދަގޫ ވާ ކަމަށް ފާހަގަ ކުރެވިފައިވާ ކާނާ ނުދޭށެވެ.
ރޭގަނޑުގެ ވަގުތުތަކުގައި ގިނަގިނައިން ދިޔާތަކެތި ދިނުން މުހިއްމެވެ.
ކޮފީއާއި ޗޮކްލެޓް ފަދަ ތަކެތި ނުދޭށެވެ.
ހަވާދުގެ ބާވަތްތަކާއި މިރުސް ހިމެނޭ ކާނާ ދިނުމުގައި ފަރުވާތެރިވާށެވެ.
ދަރިފުޅު ހާރު ކާ ގަޑީގައި ވެސް އަދި ރޯދަ ވީއްލާ ގަޑީގައި ވެސް ހަވާދުގެ ބާވަތްތަކާއި މިރުސް ލީ ބާވަތްތައް ދިނުމުގައި ފަރުވާތެރިވާށެވެ.
ރޯދަ ވީއްލާ ގަޑީގައި މާ ގިނަ ތަކެތި އެއްފަހާ ކާން ނުދޭށެވެ.
ކުއްޖާ އަމިއްލައަށް ރޯދައަށް ނުހުރެވޭނޭ ކަމަށް ބުނާ ނަމަ މަޖުބޫރުކޮށްގެން އޭނާ ރޯދައަށް ނުބަހައްޓާށެވެ.