03 May 2019, 11:07
ސްރީލަންކާގެ ތިން ސިޓީއެއްގައި ދިން ޖާނުން ފިދާވުމުގެ ހަމަލާތަކާ ގުޅިގެން ބަންދުކޮށްފައި ހުރި އެގައުމުގެ ސްކޫލުތައް މި ފެށޭ ހަފްތާ ތެރޭގައި އަލުން ހުޅުވަން މަސައްކަތްކުރަން ފަށއިފިއެވެ.
ސްރީލަންކާގެ އެޑިއުކޭޝަން މިނިސްޓަރު އަކިލަ ވިރާޖް ކަރިޔަވަސަމް ވިދާޅުވީ، މި ފެށޭ ހަފްތާގެ ހަވަނ ދުވަހު ސްކޫލުތައް އަލުން ހުޅުވާނެ ކަމަށާއި، އެކަން ކުރަނީ ސަލާމަތީ ބާރުތަކުން މުޅި ގައުމުގެ ހުރިހާ ސްކޫލެއްގެ ސެކިއުރިޓީގެ ހާލަތު ބަލައި، އެ ފަރާތްތަކުގެ ހުއްދަ ލިބުމުން ކަމަށެވެ.
މިނިސްޓަރު ކަރިޔަވަސަމް ވިދާޅުވީ ސްކޫލުތައް އަލުން ހުޅުވަން ޖެހޭނީ ވަރަށް ސަލާމަތީ ކަންކަން ވަރަށް ވަރުގަދަކޮށް، އަދި ރައްކާތެރިކަމުގެ ފިޔަވަޅުތައް ވަރަށް ހަރުކަށިކަމާއެކު އަޅައިގެން ކަމަށެވެ.
މީގެ އިތުރން އޭނާ ވިދާޅުވީ ހުރިހާ ސްކޫލެއްގައި ސެކިއުރިޓީގެ ކަންކަން ކުރިއަށް ގެންދާނެ ގޮތް ބަޔާންކޮށް، 18 ނުކުތާގެ މައްޗަށް އެކުލެވޭ ސާކިއުލާއެއް ތައްޔާރުކޮށްފައިވާ ކަމަށާއި ގައުމުގެ ހުރިހާ ސްކޫލެއްވެސް އަމަލުކުރަން ޖެހޭނީ އެ ނުކުތާތަކުގެ މައްޗަށް ކަމަށެވެ. އަދި އެ ސާކިއުލާތައް ހުރިހާ ސްކޫލެއްގެ ޕްރިންސިޕަލުންނާ މިހާރު ވަނީ ހިއްސާކޮށްފައެވެ.
މީގެ ދެ ހަފްތާ ކުރިން ސްރީލަންކާގެ ކޮލޮމްބޯ، ނެގަމްބޯ އަދި ބަޓިކަލޯގައި ދިން ޖާނުން ފިދާވުމުގެ ހަތް ހަމަލާއާ ގުޅިގެން 300 އަށް ވުރެ ގިނަ މީހުން ވަނީ މަރުވެފައެވެ.
އެ ހަމަލާ ދިނީ ސްރީލަންކާގެ ހަރުކަށި ފިކުރުގެ ޖަމިއްޔާއެއް ކަމުގައިވާ ނޭޝަނަލް ތައުހީދު ޖަމާއަތުންނެވެ. އަދި އެ ހަމަލާގެ ޒިންމާ، އައިއެސް ޖަމާއަތުންވެސް ވަނީ ނަގާފައެވެ.
އެހެން ނަމަވެސް ސްރީލަންކާގެ ދިފާއީ ބާރުތަކުން ވަނީ، ނޭޝަނަލް ތައުހީދު ޖަމާއަތުން މި ހަމަލާ ރޭވުމަށްޓަކައި ބޭނުންކުރަމުން ދިޔަ ބައެއް ތަންތަން ހޯދައި، މައްސަލައާ ގުޅުންހުރި ކަމަށް ބެލެވޭ ގިނަ އަދަދެއްގެ ބަޔަކު ހައްޔަރުކޮށްފައެވެ.