29 Apr 2019, 15:58
ކޮލަމްބޯ (އޭޕްރިލް 29): ސްރީލަންކާގައި މިދިޔަ ހަފްތާގެ އާދިއްތަ ދުވަހު ދިން ހަމަލާތަކާ ގުޅިގެން އެގައުމުގެ ފުލުހުންގެ ވެރިޔާ އިސްތިއުފާ ދެއްވަން ރައީސް އެންގެވި ނަމަވެސް އޭނާ އިސްތިއުފާ ދެއްވަން ދެކޮޅު ހައްދަވައިފި އެވެ.
މިދިޔަ ހުކުރު ދުވަހު ރައީސް މައިތިރިޕާލާ ސިރިސޭނާ ވަނީ ފުލުހުންގެ ވެރިޔާ ޕުޖިތު ޖަޔަސަންދަރާ އިސްތިއުފާ ދެއްވި ކަމަށް ވިދާޅުވެފަ އެވެ. އަދި މިއަދު އެމަގާމަށް ޑެޕިއުޓީ އިންސްޕެކްޓަރު ޖެނެރަލް ޗަންދަނާ ވިކްރަމަރަތުނަ ވަގުތީ ގޮތުން އައްޔަން ކުރައްވައިފަ އެވެ.
ނަމަވެސް ލަންކާގެ ސަރުކާރުގެ އޮފިޝަލުން ވިދާޅުވާ ގޮތުގައި ޖަޔަސަންދަރާ އިސްތިއުފާގެ ސިޓީއެއް ހުށައަޅާފައި ނުވެ އެވެ. އަދި އޭނާ މިހާރު ވެސް ހުންނެވީ ސަރުކާރުން ފުލުހުންގެ ވެރިޔާއަށް ދީފައިވާ ގެކޮޅުގަ އެވެ.
ސިރިސޭނާ ވަނީ އީސްޓާ ސަންޑޭގެ ހަމަލާތަކާ ބެހޭ މައުލޫމާތު ފުލުހުންނަށް ލިބުނު ނަމަވެސް އެމައުލޫމާތާ ހަވާލާދީ ޖަޔަސަންދަރާ ފިޔަވަޅު ނާޅާ ކަމަށް ވިދާޅުވެފަ އެވެ. އޭގެ ސަބަބުން ޑިފެންސް މިނިސްޓްރީ ހެމަސިރީ ފާނަންޑޯގެ އިސްތިއުފާއަށްވެސް ރައީސް ގޮވާލެއްވުމުން އޭނާ ވަނީ މިދިޔަ ހަފްތާގައި މަގާމުން އިސްތިއުފާ ދެއްވާފަ އެވެ. އެމަގާމަށް މިއަދު ވަނީ ޖެނެރަލް ޝަންތާ ކޮޓެގޮޑާ އައްޔަންކޮށްފަ އެވެ.
މިމަހުގެ 21ގައި ލަންކާގެ ފައްޅިތަކާއި ލަގްޒަރީ ހޮޓާތަކަށް އަމާޒުކޮށް ދިން ހަމަލާތަކުގައި 253 މީހުން މަރުވެ، 500 މީހުންނަށް ވަނީ އަނިޔާވެފަ އެވެ. އަދި އެހަމަލާތަކާ ގުޅިގެން ލަންކާއިން ވަނީ މިހާތަނަށް 150އަށް ވުރެ ގިނަ މީހުން ހައްޔަރުކޮށްފަ އެވެ.