29 Apr 2019, 09:04
އަންނަ މަހު ބޭއްވުމަށް ހަމަޖެހުނު އިންޑިއާގެ 66 ވަނަ ނޭޝަނަލް ފިލްމު އެވޯޑްސް ފަސްކޮށްފިއެވެ.
ފިލްމުތަކާއި ފިލްމީ ފަންނާނުންނަށް އިންޑިއާ ސަރުކާރުން ދޭ އެވޯޑު ހަފްލާ ފަސްކޮށްފައިވަނީ މިހާރު އިންޑިއާގައި ކުރިއަށް ގެންދަމުންދާ އިންތިހާބާ ގުޅިގެން ކަމަށް ބޭރުގެ ހަބަރުތައް ބުނެއެވެ.
އެ އެވޯޑު ލިބޭ ފަރާތްތަކުގެ ނަންތައް އިއުލާންކުރާނީ އިންޑިއާގައި ކުރިއަށް ގެންދާ އިންތިހާބަށް ފަހު ކަމަށް ވެސް ހަބަރުތައް ބުނެއެވެ.
އިންޑިއާގެ އިންތިހާބު ފަށާފައިވަނީ މި މަހުގެ 11 ވަނަ ދުވަހުއެވެ. އަދި ވޯޓުލުން އަންނަ މަހުގެ 19ވަނަ ދުވަހާ ހަމައަށް ކުރިއަށްދާނެއެވެ.
ގިނަ ފިލްމީ ތަރިންވެސް މިހާރު ވަނީ އެ އިންތިހާބުގައި ވޯޓުލާފައެވެ. އޭގެ ތެރޭގައި ޕްރިޔަންކާ ޗޯޕްރާ، ރެކާ އަދި ޕޫނަމް ހިމެނެއެވެ.