އަދުރޭ ރައީސް މައުމޫނަށް: ފަސް މަސް ތެރޭވެސް ޕާޓީއެއް ނުހެދުނު

28 Apr 2019, 00:25

ކުރީގެ ރައީސް މައުމޫން އަބްދުލްގައްޔޫމަށް ފަސް މަސް ވީއިރުވެސް ސިޔާސީ ޕާޓީއެއް ނުހެދުނު ކަމަށް އިދިކޮޅު ޕީޕަލްސް ނޭޝަނަލް ކޮންގްރެސް ޕާޓީ (ޕީއެންސީ) ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާ މެމްބަރު އަބްދުއްރަހީމް އަބްދުﷲ (އަދުރޭ) ވިދާޅުވެއްޖެ އެވެ.

ރައީސް މައުމޫން އަންނަނީ މޯލްޑިވްސް ރީޕޯމް މޫވްމަންޓް(އެމްއާރުއެމް) ގެ ނަމުގައި އާ ސިޔާސީ ޕާޓީއެއް ހެދުމުގެ މަސައްކަތް ކުރަމުންނެވެ.

މިރޭ ބިލަބޮންގް ހައި އިންޓަނޭޝަނަލް ސުކޫލުގައި ބޭއްވި ޕީއެންސީގެ މަތީ މަޖިލިސް ނުވަތަ ކޮންގްރެސް ނިިމުމުގެ ރަސްމިއްޔާތުގައި ވާހަކަފުޅު ދައްކަވަމުން އަދުރޭ ވިދާޅުވީ، 24 ގަޑިއިރުތެރޭ ރާއްޖޭގައި ސިޔާސީ ޕާޓީ އުފެއްދުމަކީ މިހާތަނަށް އެއްވެސް ބަޔަކަށް ކުރެވުނު ކަމެއް ނޫން ކަމަށާއި ނަމަވެސް ޕީއެންސީ އުފެއްދުމަށް އިލެކްޝަންސް ކޮމިޝަނަށް ހުއްދަ ދިންތާ 24 ގަޑި އިރުތެރޭ 3،000 މެމްބަރުން ހަމަކުރި ކަމަށެވެ.

"ޒަމާންތަކެއް ވަންދަން ރާއްޖޭގައި ޝާނާއި ޝައުކަތުގައި، ޖާހާއި ގަދަރުގައި، ވެރިކަން ކުރެއްވި ބޭފުޅުން ސިޔާސީ ޕާޓީ ހައްދަވަން އުޅުއްވާތާ ފަސް މަސް ދުވަސް ހަމަސް ދުވަސް ވެއްޖެ،" ރައީސް މައުމޫންގެ ނަން ވިދާޅުނުވެ ރައީސް މައުމޫނަށް ފާޑުވިދާޅުވެ ވާހަކަފުޅު ދައްކަވަމުން އަދުރޭ ވިދާޅުވިއެވެ.

އޭޕްރީލް 28، 2019: ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ފުރަތަމަ ކޮންގްރެސް ނިންމާލުން -- ސަން ފޮޓޯ/ ފަޔާޒު މޫސާ

އަދުރޭ ވިދާޅުވީ، ޕީއެންސީއަށް 3،000 މީހުންގެ ސޮއި 24 ގަޑިއިރުތެރޭ ހަމަވުމަކީ ކުރީގެ ރައީސް އަބްދުﷲ ޔާމީން އަބްދުލް ގައްޔޫމުގެ ހިދުމަތް ރައްޔިތުން ބަލައިގަންނަ ކަމުގެ ހެއްކެއް ކަމަށެެވެ.

ޕީޕީއެމްގެ މިލްކުވެރިކަމާ މެދު ސުވާލު އުފައްދަވާ ފަރާތްތަކުން އާ ސިޔާސީ ޕާޓީއެއް ހެދުމަށް މަސައްކަތް ކުރައްވަމުންދާއިރު، "އެބޭފުޅުން ނިކުމެ ހަމަސް ދުވަސް ވެގެން ދާއިރު" ސިޔާސީ ޕާޓީއެއް ނުހެއްދެވިގެން އުޅުއްވަނީ ކީއްވެގެންތޯ އަދުރޭ ސުވާލު އުފެއްދެވިއެވެ.

"އެ ވިދާޅުވާ ތާއީދު އޮތް ނަމަ، ޕާޓީ ހަދާކަށް އެހާ ދުވަހެއް ނުނަގާނެ. އަޅުގަނޑު އެހެންވީމަ މި ދަންނަވަނީ، ޕީޕީއެމް ވުޖޫދަށް ގެނައީވެސް ރައީސް ޔާމީން އޭ،" އަދުރޭ ވިދާޅުވިއެވެ.

އަދުރޭ ވިދާޅުވީ، ޑީއާރުޕީއަކީ ވެސް ރައީސް ޔާމީން އިސްވެ ހުންނަވާ އުފެއްދެވި ޕާޓީއެއް ކަމަށެވެ.

އަދުރޭ އިތުރަށް ވިދާޅުވީ، ޕީއެންސީ އަކީ ރައީސް ޔާމީން އެންމެ ބޭނުންފުޅުވެގެން އުފެއްދެވި ޕާޓީއެއް ކަމަށާއި މުސްތަގުބަލުގައި ރައީސް ޔާމީން ހުންނަވާނެ ކަމަށް ޔަގީން ކުރާ ޕާޓީ އަކީ ވެސް ޕީއެންސީ ކަމަށެެވެ.