23 Apr 2019, 08:26
ގާނޫނީ ގޮތުން ތަޖުރިބާ ހޯއްދެވުމުގެ ގޮތުން ރަށެއްގެ ކޯޓުގެ މެޖިސްޓްރޭޓްގެ މަގާމް އަދާކުރުމަށް ބޭނުންފުޅުވާ ކަމަށް ކުރީގެ ބަންޑާރަ ނައިބު އަދި މަޝްހޫރު ގާނޫނީ ވަކީލު ހުސުނުއްސުއޫދު ވިދާޅުވެއްޖެ އެވެ.
ރާއްޖެ ޓީވީގެ ޕްރޮގްރާމެއްގައި ރޭ ވާހަކަފުޅު ދައްކަވަމުން ސުއޫދު ވިދާޅުވީ، ޖުޑިޝަރީ އިސްލާހު ކުރުމަށް ކުރުމުންދާ މަސައްކަތުގައި މަތީ ކޯޓެއްގެ ފަނޑިޔާރުކަމުގެ ބަދަލުގައި ބޭނުންވަނީ އަތޮޅުތެރޭގެ ރަށެއްގެ ކޯޓެއްގެ މެޖިސްޓްރޭޓެއްގެ މަގާމް އަދާކުރުމަށް ކަމަށެވެ.
"ވަކި ހިސާބަކަށް ދިޔައީމަ އަޅުގަނޑުގެ އުންމީދަކީ ޅ. އަތޮޅުގެ ރަށެއްގެ ނޫނީ އަރިއަތޮޅު ރަށެއްގަ ނޫނީ ބ. އަތޮޅު ރަށެއްގަ މެޖިސްޓްރޭޓެއްގެ ވަޒީފާ އަދާކުރުމަކީ އަޅުގަނޑު ވަރަށް ދެކޭ ހިތްވާ ދުވަހެއް،" ސިވިލް ކޯޓުގެ ގާޒީކަން ވެސް ކުރެއްވި ސުއޫދު ވިދާޅުވި އެވެ.
ގާނޫނީ ދާއިރާއިން އެންމެ ބޮޑު ތަޖުރިބާއެއް ލިބޭނީ އެންމެ ދަށު ކޯޓުގައި މަސައްކަތް ކޮށްގެން ކަމަށް އޭނާ ވިދާޅުވި އެވެ.
"އަޅުގަނޑަކީ ގާނޫނީ ފޮތް ލިޔާ މީހެއް. ދިރާސާ ކުރާ މީހެއް. އެހެންވީމަ އަޅުގަނޑަށް އެންމެ އެއްޗިހިތަކެއް އުނގަނެވޭނީ އަޅުގަނޑަށް ދަސްވާނީ އެ ޝަރީއަތްކުރާ ކޯޓެއްގައި މަސައްކަތް ކޮށްލައިގެން. އެހެންވީމަ އަޅުގަނޑު އުންމީދު ކުރަން ކޮންމެވެސް ދުވަހެއްގައި މެޖިސްޓްރޭޓް ކޯޓެއްގައި ވަޒީފާ އަދާ ކޮށްލުން،" މަރުތައް ތަހުގީގު ކުރުމަށް އެކުލަވާލާފައިވާ ރިޔާސީ ކޮމިޝަނުގެ ރައީސްކަން ވެސް ކުރައްވަމުން ގެންދަވާ ސުއޫދު ވިދާޅުވި އެވެ.
މެޖިސްޓްރޭޓެއްގެ މަގާމް އަދާކުރާނެ ރަށެއް ވެސް މިހާރު ނިންމާފައިވާ ކަން ސުއޫދު ފާހަގަ ކުރެއްވި އެވެ. އެގޮތުން އެ ރަށަކީ ޅ. އޮޅުވެލިފުށި ކަމަށާއި އެއީ ހިތް ފަސޭހަ ރަށެއް ކަމަށް ވެސް ސުއޫދު ވިދާޅުވި އެވެ.