21 Apr 2019, 16:49
ކުޑަކުއްޖެއްގެ ކަރާމާތަށް ގެއްލުންވާފަދަ ކަމެއް ކުރި މަންމައަކު 150 ރުފިޔާ އިން ޖޫރިމަނާކޮށްފިއެވެ.
އެ ހުކުމް ކުރީ އުމުރުން ދެ އަހަރުގެ އޭނާގެ ދަރިފުޅު ގޮވައިގެން މާރުކޭޓް ސަރަހައްދުގައި ސަލާންޖަހައި، ކުއްޖާގެ ކަރާމާތަށް ގެއްލުންވާގޮތަށް އަމަލުކޮށްފައިވާތީ އެވެ.
ކްރިމިނަލް ކޯޓުގެ ހުކުމްގައި ވަނީ އެ އަންހެންމީހާއަށް އެކިފަހަރުމަތިން ޖެންޑާ މިނިސްޓްރީން ނަސޭހަތްދިނުމުން ވެސް ނަސޭހަތަށް ހުރުމަތްތެރިކޮށް ހިތާފައިނުވާކަން އޭނާގެ އިއުތިރާފުން ޝަރީއަތަށް ސާބިތުވާ ކަމަށެވެ.
ކުރީގެ ގާނޫނުލް އުގޫބާތުގެ ދަށުން ދައުލަތުން އޭނާގެ މައްޗަށް ކުރީ އަމުރަށްނުކިޔަމަންތެރިވުމުގެ ދައުވާއެވެ. އެ ދައުވާ ސާބިތުވުމުން ކުރި ޖޫރިމަނާގެ ފައިސާ މިއަދުން ފެށިގެން 30 ދުވަހުގެ ތެރޭގައި މޯލްޑިވްސް އިންލެންޑް ރެވެނިއު އޮތޯރިޓީއަށް ދެއްކުމަށް އޭނާއަށް ވަނީ އަމުރުކޮށްފައެވެ.