14 Apr 2019, 10:06
ވިހިވިހި އަންނަންވާއިރަށް އައިލެންޑް އޭވިއޭޝަނުން ސިންގަލް ޔޫސް ޕްލާސްޓިކް ބޭނުންކުރުން ހުއްޓާލުމަކީ އަމާޒެއް ކަމަށް އެ ކުންފުނިން ބުނެފިއެވެ.
އައިލެންޑް އޭވިއޭޝަނުން 19 ވަނަ އަހަރީ ދުވަހާ ގުޅިގެން ބޭއްވި ކުޑަ ރަސްމިއްޔާތެއްގައި، އެކުންފުނީގެ ޑެޕިއުޓީ މެނޭޖިން ޑިރެކްޓަރު އާއިޝަތު ޖެނިފާ ވިދާޅުވީ އައިލެންޑް އޭވިއޭޝަނުން ހިންގާ ގައުމީ އެއާލައިން، މޯލްޑިވިއަންގެ އެތެރޭގެ އުދުހުންތަކުގައި ސިންގަލް ޔޫސް ޕްލާސްޓިކް ބޭނުން ކުރުން އެއްކޮށް ހުއްޓާލާފައިވާ ކަމަށެވެ.
"އެތެރޭގެ އުދުހުންތަކުގައި އެއްވެސް ވަރަކަށް މިހާރު ޕްލާސްޓިކް ކަޕްސް ބޭނުމެއް ނުކުރަން. އިންޓަނޭޝަނަލް ދަތުރުތަކުގައި މިހާރު ބޭނުންކުރާ ޕްލާސްޓިކް ކަޓްލަރީސްގެ ބަދަލުގައި މިހާރު އަޅުގަނޑުމެން މިވަނީ ވުޑްން ކަޓްލަރީސް ބޭނުން ކުރަން ނިންމާފައި،" ޖެނިފާ ވިދާޅުވީ މިއީ ފެށުމެއް ކަމަށާއި އަންނަ އަހަރުގެ ނިޔަލަށް ކުންފުނިން ބޭނުން ކުރާ ސިންގަލް ޔޫސް ޕްލާސްޓިކް ބޭނުން ކުރުން އެއްކޮށް ހުއްޓާލުމަށް އަމާޒު ހިފާފައި ވާކަމަށެވެ.
މީގެ އިތުރުން އައިއޭއެސް އިން މިއަދު ވަނީ ކުންފުނީގެ ބޯޑު ރޫމްތަކުގައި ޕްލަސްޓިކް ފެންފުޅި ބޭނުންކުރުން ހުއްޓާލައިފައެވެ. އޭގެ ބަދަލުގައި ބޭނުންކުރާނެ ބިއްލޫރު ފުޅި ތައާރަފުކޮށް މިއަދު ވަނީ ދައްކާލައިފައެވެ. އެ ކުންފުނީގެ މުވައްޒަފުންނަށްވެސް އެއްފަހަރަށް ވުރެ ގިނަ ފަހަރު ބޭނުންކުރާ ފެންފުޅި ހަދިޔާ ކުރަން ނިންމާފައިވާކަމަށް އައިއޭއެސް އިން ބުންޏެވެ.