10 Apr 2019, 19:37
އިސްލާމިކް ޔުނިވާސިޓީން 571 ދަރިވަރަކު ދަސްވެނިވެއްޖެއެވެ.
ރޭ ދަރުބާރުގޭގައި ބޭއްވި އެ ޔުނިވާސިޓީގެ ދަސްވެނިވުމުގެ ހަފްލާގައި އިސްލާމިކް ޔުނިވާސިޓީން ދަސްވެނިވި ކުދިންނަަށް ވަނީ ސެޓްފިކެޓްތަކާއި އެވޯޑްތައް ހަވާލުކޮށްފައެވެ.
އޭގެ ތެރޭގައި މާސްޓާސް ޑިގްރީ ފުރިހަމަކުރި 105 ދަރިވަރުންނާއި، ޕޯސްޓްގްރެޖުއޭޓް ލެވަލްގެ 46 ދަރިވަރުންނާއި ޑީގްރީ ފުރިހަމަ ކުރި 107 ދަރިވަރުންގެ އިތުރުން ޑިޕްލޮމާ ހާސިލްކުރި 67 ދަރިވަރުން އަދި ސެޓްފިކެޓް ލެވަލް ނިންމި 246 ދަރިވަރުން ހިމެނެއެވެ.
ރޭގެ ހަފްލާގައި އިސްލާމިކް ޔުނިވާސިޓީން ދޭ އެންމެ ޝަރަފްވެރި އިނާމްތަކުގެ ތެރޭގައި ހިމެނޭ " ބެސްޓް ސްޓޫޑަންޓް އެވޯޑް" އަށް ދަރިވަރަކަށް ވަނީ އަރުވައިފައެވެ. ރޭގެ ރަސްމިއްޔާތު ޝަރަފްވެރިކޮށްދެއްވައި އެ އެވޯޑްތައް ހަވާލުކޮށްދެއްވީ ރައީސް އިބްރާހިމް މުހައްމަދު ސޯލިހްއެވެ.
އިސްލާމިކް ޔުނިވާސިޓީން ރޭ ބޭއްވި ދަސްވެނިވުމުގެ ހަފްލާގެ ތެރެއިން--- ފޮޓޯ: ރައީސް އޮފީސް
އެ އެވޯޑްތަައް ހާސިލްކުރި ދަރިވަރުންނަށް އިސްލާމިކް ޔުނިވާސިޓީގައި ކިޔަވައިދޭ ކޯސްތަކުގެ ތެރެއިން ބޭނުން ކޯޯހެއް ހިލޭ ކިޔެވުމުގެ ފުރުސަތުވެސް ވަނީ ދީފައެވެ.
އަދި އޭގެ އިތުރުން މާސްޓާސް ޕްރޮގްރާމްތަކުގެ ތެރެއިން އެންމެ މަތީ މާކްސް ހޯދާ ދަރިވަރަކަށް ކަމަނަ އަލް ހައްޖު ވަލް އުމްރާ ގެ ފަރާތުން ދޭ އުމްރާ ދަތުރެއްވެސް ވަނީ އަރުވައިފައެވެ.
އެ އުމްރާ ދަތުރު ލިބިފައިވަނީ ދ. މީދޫ ފެހިގެ ސަލްވާ އަބްދުއް ލަތީފަށެވެ. އޭނާ ވަނީ މާސްޓާސް އިން ފިގްހް އެންޑް އުސޫލުލް ފިގްހު ކޯހުން އެއްވަނަ ހާސިލްކޮށް ބެސްޓް ސްޓޫޑަންޓްގެ އެވޯޑްވެސް ހާސިލްކޮށްފައެވެ.